1 Mandânə, Jezu rô na ye lə agala də aaya aəgɔ bale bale ə mʉ̂ Ə̂rɔ̂ Əpʉ gâ pâ Əgɔngerə nə̂ Ndjapä. Əndje də azü-awla nə̂ ye nə morofo amanə bishi nə kə na ana nə kɔ, 2 də alabə̈ ayashe ə̂në tshə grɔ̂ arəka də aafrɔ ayirə̂ tə̂ əndje gâ ye kɔ: Marə̂, ətshə ə̂në əndje ê ətshə də Marə̂ əzü tshe Magədala kɔ, ə̂në aafrɔ ayirə̂ mindû amanə bishi wûtu lə ye gâ ye kɔ, 3 də Zanə, ə̂në äkɔ̈ nə də Shuza sə̂ tə awobata aərə nə̂ Erɔdə kɔ, də Suzanə də alabə̈ ayashe ə̂në əndje ngbâ ə ngbâ kɔ. Əndje kô aərə nə̂ əndje ndə kə yi kəna də nə kə Jezu də atrawaya nə̂ ye.

4 Ə̂kpû azü ə̂në əndje ngbâ tə bandanə kɔ âfɔ lə agala bale bale ə ngbô tə̂ əndje gâ tə̂ Jezu. Tshə pâ əpʉ kəwû səye kə əndje ə pa: 5 «Ə̈bə̈ awolu ərə nâ gâ lə kəndɨ ndə kə lu angwa rəgo. Ə̂në tshə sə̂ kə gʉ angwa rəgo nə gâ lə kəndɨ nə kɔ, alabə̈ nə yɔ̂ gâ ndʉ äwä. Azü dɔ̂ tshelə nə, ayanu dê nɔ̂. 6 Alabə̈ nə yɔ̂ gâ pâ badja. Ə̂në ə kô gâ ye kɔ ə ôrɔ mbrə ə̂në ashɔ nə sə tə ə̈kü nə. 7 Alabə̈ nə yɔ̂ gâ lə gonge. Ə kô də gonge nə äwä bale, gonge nə wô nɔ̂. 8 Alabə̈ nə yɔ̂ gâ lə ə̂rɔ̂ ashɔ. Ə kô ə lê: ə̂lê nə bale bale lê ngbangbo bale (100).» Mandânə, Jezu pâ tə âgbɔ̂ kə əndje ə pa: «Əzü ə̂në tshə sə də ətu kə dji də əpʉ, tshə djï!»

9 Atrawaya nə̂ Jezu yû ətshə tə̂ tshelə âdâ əpʉ kəwû səkɔ. 10 Tshə kîrə əpʉ kə əndje ə pa: «Ənə̂ e, Ndjapä zâ äwä kə e ndə kə pa e wusə̂ tshelə âdâ əpʉ Əgɔngerə nə̂ ye. Ənə̂ alabə̈ azü, əndje pâ əpʉ kə əndje lə aəpʉ kəwû ndə kə pa:

"Əndje lishi ə wu ərə wu bale ne.

Əndje dji əpʉ ə dji tshelə nə dji bale ne."»*

11 «Tshelə âdâ əpʉ kəwû səye sə rəke: Angwa rəgo nə kə də̂ Əpʉ nə̂ Ndjapä. 12 Alabə̈ azü sə mata tshe ndʉ äwä ə̂në angwa rəgo nə yɔ̂ gâ tə̂ nə kɔ; əndje djî Əpʉ nə̂ Ndjapä, djablo nâ ə zâ əpʉ nə tə̂ lɔsu əndje gâ ye kanika əndje yində əpʉ nə yi ndə kə pa Ndjapä she əndje lə kuzu ne. 13 Alabə̈ azü sə mata tshe pâ badja. Əndje dji əpʉ nə ə yində nə də ə̂rû tə̂ lɔsu əndje tə ə̂rɔ̂nə, əpʉ nə za lɔsu əndje za ne. Əndje yində əpʉ nə kʉ ndə ə̈bə̈ alɔ. Alɔ ə̂në ə̈bə̈ ərə kə tra lɔsu əndje kə wutu, əndje tshi äwä əpʉ nə tʉ. 14 Angwa rəgo nə ə̂në ə yɔ̂ gâ lə gonge nə kɔ kə də̂ azü ə̂në əndje dji əpʉ nə, bale, kə li tshelə əndje də əgo aərə də aərə tshepashɔ səye ə̂në ə fʉ ə fʉ tə̂ əndje kɔ gbɔ̂ tə̂ äwä tə̂ əndje ndə kə pa əndje le. 15 Angwa rəgo nə ə̂në ə tê gâ lə ə̂rɔ̂ ashɔ nə kɔ kə də̂ azü ə̂në əndje dji əpʉ nə ə yində nə də lɔsu əndje bale ə bata ə sə kə mbrə tə̂ əndje Lïndə̂ nə ə le tə ə̂rɔ̂nə kɔ.»

16 «Ə̈bə̈ əzü za əwo za gâ lə lamba ndə kə za ləsû tshu gâ pâ nə wala ndə kə za gâ tshekudu klʉngbʉ ne. Tshə sə kə za tɔ gâ pâ ərə gâ lafɔ kanika azü nɔ̂ ə̂në əndje li gâ lə anda nə kɔ, əndje lishi ndə ə̂yîəwo nə. 17 Ərə bale bale nɔ̂ ə̂në ə zâ tə̂ ye wû kɔ, azü sə kə wusə̂ nə ə dji ndə əpʉ nə. 18 Bale, e drä ətu e tə̂ äwä kə dji əpʉ nə̂ e! Mbrə ə̂në əzü ə̂në tshə sə də ə̈bə̈ ərə ndə ye, əndje sə kə za ə̈bə̈ nə gâ pâ nə kə ətshə. Bale, əzü ə̂në tshə sə sə də ə̈bə̈ ərə ndə ye ne, əndje sə kə za aya ərə ə̂në tshə pa ənə̂ ye ə pa ə sə tə ənə̂ əne kɔ tə̂ ye.»

19 Əyï Jezu də alaye nə nâ ndə kə wu ətshə. Äwä kə na trö də ətshə gûta gû ne mbrə ə̂në azü rô pâ nə gâ ye. 20 Əndje pâ kə Jezu nə ə pa: «Əyï zə də alaye zə ka mashu, əndje yində kə wu əbə.» 21 Jezu kîrə əpʉ kə əndje ə pa: «Əyï əmə də alaye əmə kə də̂ azü ə̂në əndje dji Əpʉ nə̂ Ndjapä ə mbrə tə̂ əndje Lïndə̂ nə kɔ.»

22 Tə̂ ə̈bə̈ əlo, Jezu də atrawaya nə̂ ye ô gâ lə ə̈bə̈ əgerə âgbâ. Tshə pâ kə əndje ə pa: «A gbö ə̂ngû nə djoko ətshî je.» Əndje gbô ə̂ngû nə. 23 Alɔ ə̂në əndje sə̂ kə gbo ə̂ngû nə kɔ, Jezu lô na ye gâ ye. Ə̈bə̈ âgbɔ̂ əyi vɔ̂tə̂ kə yi la ə̂ngû nə, ə̂ngû nə sə̂ kə tu gâ lə əgerə âgbâ nə â əgerə âgbâ nə yîndə kə li ə̂ngû də əndje. 24 Əndje nâ trö də Jezu, ə jô ətshə lə əlo nə ə pâ kə ətshə ə pa: «Âgbɔ̂ Əzü, Âgbɔ̂ Əzü, a tshû gâ ye â səye!» Jezu jô lə əlo nə ə ngâ kə əyi nə də kplaka ə̂ngû nə, â əyi nə də kplaka ə̂ngû nə tê gwa. Ətshe nə î tâ. 25 Mandânə, Jezu pâ kə atrawaya nə ə pa: «Lɔsu e sə kotâ a?» Awa zâ əndje, kumu əndje kpê pâ əndu əndje ndje â əndje pâ lə takpa tə̂ əndje ə pa: «Koshe səye sə tə əde â zâ ama kə əyi də ə̂ngû â ə djî əpʉ ama ye kɔ?»

26 Jezu də atrawaya nə̂ ye nə gbô ə̂ngû nə ə yî kumu əndje mâ lə əgɔ Jeraza ə̂në ə sə̂ ətshi əgɔ Galile kɔ. 27 Pa nə ə̂në Jezu sə̂ kə jerə lə əgerə âgbâ nə kɔ, ə̈bə̈ koshe lə əgɔ nə ə̂në tshə sə̂ də aafrɔ ayirə̂ lə ye kɔ nâ gâ ətshi ye. Kerə, tshə yî ləba yî gâ tə̂ ye ne ə shô shô gâ lə anda ne ə shô kʉ gâ pâ aə̂dû. 28 Ə̂në tshə wû Jezu kɔ, tshə tâ râwâ ə tê gâ tshekudu Jezu nə ə pâ tə âgbɔ̂ ə pa: «Jezu, Ɨrɨ Ndjapä ə̂në tshə sə mâ ngâ lafɔ kɔ, ərə yekɔ nə̂ zə tə̂ əmə! Mə kɨ kə ə̈bə̈, gï gï əyo tə̂ əmə ne.» 29 Koshe nə pâ rə mbrə ə̂në Jezu zâ ama kə afrɔ yîrə̂ nə ndə kə pa tshə wutu lə ye. Afrɔ yîrə̂ nə mâ tə̂ ye ngbatshe. Əndje î kəna ye də ə̈nü ye də ə̂wû kowɔ ndə kə pa tshə sə kpirə̂. Bale, tshə ngɔ̂ tshelə aərə sə̂ nɔ̂, afrɔ yîrə̂ nə gî ətshə ə rô də ətshə gâ lə güsü. 30 Jezu yû ətshə ə pa: «Əɨrɨ zə kə də̂ əde?» Tshə kîrə əpʉ ə pa: «Əɨrɨ əmə kə də̂ "Ə̂kpû"*», mbrə ə̂në aafrɔ ayirə̂ ə̂në əndje lî gâ lə ye kɔ ngbâ tə bandanə. 31 Aafrɔ ayirə̂ nə kɨ̂ ə̂sə̂ əyo tə̂ əndje kə Jezu nə ə pâ, tshə wla alane wla gâ lə âgbɔ̂ kudû ə̂në ə lî tə bandanə kɔ ne.

32 Ə̈bə̈ ə̂kpû akɔsɔ sə̂ mâ je, əndje sə̂ kə zɨ ərə pâ kaga nə. Aafrɔ ayirə̂ nə kɨ̂ ə̂sə̂ əyo tə̂ əndje kə Jezu nə ə pâ tshə katə̂ alane, alane li gâ lə akɔsɔ nə. Jezu yîndə nə kə əndje. 33 Əndje wûtu lə koshe nə ə lî gâ lə akɔsɔ nə. Kpûtû akɔsɔ nə nɔ̂ âfɔ də ärɔ̈ tə̂ matshi kaga nə ə yɔ̂ gâ lə ə̂ngû nə ə tshû nɔ̂.

34 Ə̂në aawobata akɔsɔ nə wû ərə nə rəkɔ, əndje kpê ə gû ə pâ ndə əpʉ nə kə azü lə gala nə də aaya aəgɔ nɔ̂. 35 Azü nâ ndə kə wu ərə nə ə̂në ə wûtu kɔ. Əndje wûtu gâ tə̂ Jezu nə ə wû koshe nə ə̂në aafrɔ ayirə̂ nə wûtu lə ye gâ ye kɔ. Tshə sə̂ gâ tʉ gâ ngotə̂ Jezu nə ə yî ləba gâ tə̂ ye ə sə̂ də ə̂rɔ̂ akwa ye. Awa zâ əndje. 36 Azü nə ə̂në əndje wû ərə nə də ala əndje kɔ, əndje pâ ndə äwä ə̂në aafrɔ ayirə̂ nə wûtu lə koshe səkɔ kə angâ əndje. 37 Azü əgɔ Jeraza nə nɔ̂ pâ kə Jezu ə pa tshə wutu lə əgɔ nə̂ alane, mbrə ə̂në awa mbrə̂ əndje tə bandanə.

Jezu ô gâ lə əgerə âgbâ nə ndə kə do tə̂ ye. 38 Koshe nə ə̂në aafrɔ ayirə̂ nə wûtu lə ye gâ ye kɔ yû Jezu nə ə pa tshə katə̂ əne, əne sə pə gâ ngotə̂ ye. Jezu wə̂ra tə̂ ye ə pâ kə ətshə ə pa: 39 «Gü na ye gâ lə manda nə̂ zə ə yïsə̂ əpʉ aərə nɔ̂ ə̂në Ndjapä mâ kə əbə kɔ kə azü!» Koshe nə gû na ye ə mʉ̂ əpʉ aərə ə̂në Jezu mbrə̂ kə ətshə kɔ kə azü lə gala nə nɔ̂.

40 Alɔ ə̂në Jezu tô mâ ətshî ə̂ngû nə mâ je ə gû kɔ, ə̂kpû azü nə wə̂ra ətshə tə ə̂rɔ̂nə, mbrə ə̂në əndje nɔ̂ sə kə ka mbrə ətshə. 41 Ə̈bə̈ koshe ə̂në əɨrɨ ye kə də̂ Jaruwusə kɔ nâ, tshə sə̂ tə makɔndji anda aangbɔ nə. Tshə tê gâ tshekudu Jezu nə ə kɨ̂ ə̂sə̂ əyo tə̂ ye kə ətshə ə pa tshə na mâ ndə əne, 42 mbrə ə̂në əgblə yashe nə̂ əne bale ə̂në tshə sə̂ də ə̂ngû mata morofo amanə bishi kɔ sə̂ trö də kuzu.

Ə̂në Jezu zâ äwä ndə kə na na ye kɔ, ə̂kpû azü sə̂ kə gbugbru tə̂ əndje ə zâ tə̂ əndje trɔ ətshə. 43 Ə̈bə̈ yashe sə̂ je ə̂në rəka ə̈ndjï sə̂ tə̂ ye ə mâ ə̂ngû morofo amanə bishi gâ ye. Tshə ndɨ̂ aərə nə̂ ye nɔ̂ kə aawombrə ayɔ rəka.* Ə̈bə̈ əzü bale ndə kə mbrə ndə kə pa rəka nə katə̂ ye gûta gû ne. 44 Tshə nâ trö mandâ Jezu nə ə gôro ama ləba nə̂ ye. Trale rəka ə̈ndjï nə kâtə̂ ye kʉ kôto səkɔ. 45 Jezu yû ətshe ə pa: «Əde kə gôro əmə kɔ?» Azü nə nɔ̂ shêra ə pa ə də̂ alane də̂ ne, â Piarə pâ kə ətshə ə pa: «Âgbɔ̂ Əzü, ə̂kpû azü nə ə̂në əndje sə dji əbə kɔ kə sə̂ â ko tə̂ əndje trɔ ə̈bə̈ kɔ.» 46 Jezu kîrə əpʉ kə əndje ə pa: «Ə̈bə̈ əzü gôro əmə! Mbrə ə̂në mə wusə̂ nə ə pa ə̈bə̈ awlra wûtu tə̂ əmə gashu.»

47 Ə̂në yashe nə wûsə̂ nə ə pa Jezu nə wûsə̂ ərə nə ə̂në əne mâ gâ ye kɔ, tshə vɔ̂tə̂ kə gugu nə ə nâ ə tê gâ tshekudu Jezu nə. Tshə pâ ndə âdâ kə goro ləba nə̂ Jezu nə də äwä ə̂në rəka ə̈ndjï nə kâtə̂ ye trale kɔ gashu lə ala azü nə nɔ̂. 48 Jezu pâ kə ətshə ə pa: «Əgblə yashe nə̂ əmə, lɔsu zə tshɔ̂ əbə gâ ye. Gü na ye lə blatshe.»

49 Alɔ ə̂në Jezu sə̂ pə kə pa əpʉ kɔ, ə̈bə̈ əzü tô mâ lə anda nə̂ Jaruwusə nə ə nâ â pâ kə ətshə ə pa: «Əgblə yashe nə̂ zə nə tshû gâ ye, wü əyo tə̂ zə wü ndə kə e awoyisə̂ ərə nə tə ambanə ne.» 50 Ə̂në Jezu djî əpʉ nə rəkɔ, tshə pâ kə Jaruwusə nə ə pa: «Kätə̂ awa ə zä kʉtə̂ lɔsu zə kə Ndjapä, əgblə yashe nə̂ zə sə kə she lə kuzu.» 51 Ə̂në Jezu yî kumu ye mâ lə anda nə mâ je kɔ, tshə kâtə̂ ə̈bə̈ əzü kâ ndə kə pa tshə li gâ lə anda nə ne, kʉtə̂ ətshə də Piarə də Zââ gâ ndə Zake gâ ndə abä əgblə nə də əyï nə. 52 Azü nə nɔ̂ sə̂ kə kɨ nə ə sə̂ kə dɨ tshelə ama əndje mbrə əgblə nə. Jezu pâ kə əndje ə pa: «E kätə̂ əkɨ nə! Tshə tshû tshû ne, tshə lo na ye ə lo.» 53 Azü nə mɔ̂ ətshə də amɔ, mbrə ə̂në əndje wusə̂ nə ə pa əgblə nə tshû gâ ye. 54 Bale Jezu têgbɔ kəna əgblə nə ə pâ tə âgbɔ̂ ə pa: «Əgblə, äfɔ!» 55 Yîrə̂ əgblə nə gû gâ tə̂ ye, trale tshə âfɔ. Jezu zâ ama ndə kə pa əndje ko rəgo kə ətshə. 56 Kumu abä əgblə yashe nə də əyï nə kpê pâ əndu əndje. Jezu zâ ama kə əndje ndə kə pa əndje pa ndə əpʉ ərə nə ə̂në ə wûtu kɔ pa kə ə̈bə̈ əzü bale ne.Jezu shê əgblə yashe nə̂ Jaruwusə