1 Tə̂ ə̈bə̈ əlo saaba, Jezu rô tɔ lə akəndɨ ble. Atrawaya nə̂ ye krâ alabə̈ kumu ble nə ə nɔ̂nɔ tshelə nə lə kəna əndje ə zɨ̂ aə̂lê nə*. 2 Alabə̈ Afariza pâ kə əndje ə pa: «Mbrə yekɔ də̂ e sə kə mbrə ərə ə̂në âgbɔ̂ əpʉ zâ äwä zâ ndə kə pa əzü ma tə̂ əlo saaba ne kɔ?» 3 Jezu kîrə əpʉ kə əndje ə pa: «E dɨ̂ ənə̂ e əpʉ ərə ə̂në Davidə də agbɔbəngâ nə mâ alɔ ə̂në əgo mî əndje kɔ dɨ̂ ne a? 4 Tshə lî gâ lə gbafa Ndjapä ə kô amapa ə̂në əndje tô də əkrɔ kə Ndjapä kɔ ə zɨ̂ ə kô kə agbɔbəngâ nə, mapa ə̂në âgbɔ̂ əpʉ zâ ama ndə kə pa kʉtə̂ aawotokrɔ kə lï ndə kə zɨ nə kɔ.»* 5 Jezu kwâtə̂ye ə pâ kə əndje ə pa: «Əgblə nə̂ Əzü sə tə əyïnga saaba nə.»

6 Tə̂ ə̈bə̈ ata əlo saaba nə, Jezu lî gâ lə ə̈bə̈ anda aangbɔ ə sə̂ kə yisə̂ Əpʉ Ndjapä kə azü. Tə̂ alɔ nə səkɔ, ə̈bə̈ koshe sə̂ je ə̂në kəna ye ndə ndəkɔ tshû gâ ye kɔ. 7 Aawoyisə̂ âgbɔ̂ əpʉ nə̂ Mayïzə də Afariza sə̂ kə shekɔ Jezu nə ndə kə wu ərə ə̂në tshə sə kə mbrə nə ndə kə grɔ rəka tə̂ ə̈bə̈ əzü tə̂ əlo saaba nə kɔ, kanika alane sɔtə̂ ə̈bə̈ əpʉ kə lea ətshə tə̂ nə. 8 Bale, Jezu wûsə̂ əpʉ ə̂në ə sə̂ mâ tə̂ lɔsu əndje kɔ, ə pâ kə koshe nə ə̂në kəna ye nə tshû gâ ye kɔ ə pa: «Äfɔ ə kä kpə lə ə̂grû tə̂ əndje koye.» Koshe nə âfɔ ə kâ gâ lafɔ. 9 Mandânə, Jezu pâ kə əndje ə pa: «Mə sə kə yu e də ə̈bə̈ əpʉ: Âgbɔ̂ əpʉ zâ äwä ndə kə mbrə ə̂rɔ̂ nə wala əmbrʉ nə tə̂ əlo saaba a? Kə tshɔ əzü lə kuzu wala kə katə̂ ye ndə kə pa tshə tshu a?» 10 Jezu shêkɔ əndje ʉrrr nɔ̂ ə kwâtə̂ye ə pâ kə koshe nə ə pa: «Yërɔ tshelə kəna zə.» Koshe nə yêrɔ tshelə kəna ye nə, kəna ye nə gâmba tə̂ ye gâ mandânə. 11 Tshelə aawoyisə̂ âgbɔ̂ əpʉ nə də Afariza nə kô əndje tə bandanə. Əndje vɔ̂tə̂ kə shera ashera lə takpa tə̂ əndje gâ pâ ərə ə̂në əndje lï ndə kə mbrə tə̂ Jezu nə kɔ.

12 Tə̂ alɔ nə səkɔ, Jezu ô gâ pâ ə̈bə̈ kaga ndə kə yu Ndjapä. Tshə yû Ndjapä ora. 13 Tshe nə krâ, tshə ê atrawaya nə̂ ye nə ə kê alabə̈ əndje morofo amanə bishi lə takpa tə̂ əndje ə̂në tshə djî əɨrɨ əndje ə pa azü-awla kɔ: 14 Shemɔ, ə̂në tshə djî əɨrɨ ye Piarə kɔ, gâ ndə aye nə də Andre, Zake də Zââ, Flipə də Bartalami, 15 Matiɔ də Toma, Zake ɨrɨ Alfe də Shemɔ, ətshə ə̂në tshə sə̂ kə mbrə awlra ndə kə pa əgɔ nə̂ ye wutu lə kanga kɔ, 16 Zudə ɨrɨ Zake gâ ndə Judasə Isəkariɔtə ə̂në tshə ka Jezu je kɔ.

17 Jezu jêrə də azü-awla nə̂ ye nə pâ kaga nə ʉrrr ə kâ gâ tə̂ ə̈nü kaga nə ə̂në ə̂kpû atrawaya sə̂ tə̂ nə kɔ. Ə̈bə̈ ə̂kpû azü ə̂në əndje ngbâ tə bandanə kɔ sə̂ ndje mâ je. Azü nə tô lə ashɔ Jude, də Jeruzalamə gâ ndə agala aəgɔ Tirə də Sidɔ ə̂në ə sə̂ tə̂ ama ə̂ngû əngbrʉ kɔ. 18 Azü nə nâ ndə kə dji əpʉ nə̂ ye, ndje ndə kə pa tshə grɔ arəka tə̂ əndje. Əndje ə̂në əndje sə̂ də aafrɔ ayirə̂ lə əndje kɔ, aafrɔ ayirə̂ nə wûtu. 19 Azü nə nɔ̂ prâ äwä ndə kə goro ətshə mbrə ə̂në ə̈bə̈ awlra wûtu tə̂ ye â grɔ̂ arəka tə̂ əndje nə nɔ̂.

20 Bale, Jezu shêkɔ atrawaya nə̂ ye ʉrrr ə pâ kə əndje ə pa:

«Ənə̂ e tə ə̂rɔ̂nə, e-e alayïəyo

mbrə ə̂në Əgɔngerə nə̂ Ndjapä sə tə ənə̂ e!

21 Ənə̂ e tə ə̂rɔ̂nə, e-e ə̂në əgo sə kə mi e kpəsəye kɔ,

mbrə ə̂në tshelə e ə su je!

Ənə̂ e tə ə̂rɔ̂nə, e-e ə̂në e sə kə kɨ nə kpəsəye kɔ,

mbrə ə̂në e mɔ tə̂ e je!

22 Ənə̂ e tə ə̂rɔ̂nə

alɔ ə̂në tshelə azü yində e yi ne,

alɔ ə̂në tshelə əndje wəra tə̂ əndje tə̂ e,

alɔ ə̂në azü gu e ə neke e, mbrə ə̂në e za äwä Əgblə nə̂ Əzü!

23 E sə̈ də amɔ tshelə e, e vï tə̂ e də âgbɔ̂ ə̂rû,

mbrə ə̂në âkrâ nə̂ e sə kə sə gerətshe mâ lafɔ-e.

Alätä əndje mbrə̂ leme-e rə tə̂ aawopandəma Ndjapä.

24 Əyo gâ pâ e, aawosə də aərə ngbatshe,

mbrə ə̂në e sɔ̂tə̂ aərə ə̂në ə za ə̂rû gâ tə̂ lɔsu e kɔ gâ ye!

25 Əyo gâ pâ e, e-e ə̂në tshelə e sû kpəsəye gâ ye kɔ,

mbrə ə̂në əgo ə mi e je!

Əyo gâ pâ e, e-e ə̂në e sə kə mɔ tə̂ e kpəsəye kɔ,

mbrə ə̂në e sə lə mbadja ə kɨ je!

26 Əyo gâ pâ e

alɔ ə̂në azü nɔ̂ pa ə̂rɔ̂ əpʉ də əɨrɨ e,

mbrə ə̂në alätä əndje mbrə̂ leme-e rə tə̂ aafrɔ aawopandəma Ndjapä!»

27 «Mə pa kə e, e-e ə̂në e sə kə dji əpʉ nə̂ əmə kɔ: E yïndə alayïkowɔ nə̂ e! E mbrə̈ ə̂rɔ̂nə kə azü ə̂në tshelə əndje yində e yi ne kɔ! 28 E tö ngwarə gâ pâ azü ə̂në əndje dra e kɔ ə yü Ndjapä mbrə azü ə̂në əndje sə kə ma kanga tə̂ e kɔ! 29 Kədə əzü kə da ngâlâ zə, dö bale nə kə ətshə tshə da. Kədə əzü kə kakra əgerə ləba nə̂ zə, kätə̂ ye ndje, tshə za əkro ləba nə. 30 Zä ərə kə əzü ə̂në tshə yu tshuku nə kə əbə kɔ, yü yü tshuku ərə nə̂ zə ə̂në əzü zâ gâ ye kɔ ne. 31 Ərə ə̂në e yində nə ə pa azü mbrə kə e, e mbrə̈ kʉtə̂ nə kə əndje. 32 Kədə e yində kʉtə̂ azü ə̂në əndje yində e kɔ, ərə ə̂në azü ə tra e tə̂ nə kɔ sə kotâ a? Alayïnyaka ndje yində azü ə̂në əndje yində əndje kɔ. 33 Kədə e ma ə̂rɔ̂ nə kʉ kə azü ə̂në əndje ma ə̂rɔ̂ nə kə e kɔ, ərə ə̂në azü ə tra e tə̂ nə kɔ sə kotâ a? Alayïnyaka mbrə ndje rə! 34 Kədə e ko aərə kʉ kə azü ə̂në e wusə̂ nə ngâ ə pa əndje kirə də nə kə e je kɔ, ərə ə̂në azü ə tra e tə̂ nə kɔ sə kotâ a? Alayïnyaka ko ndje aərə kə angâ əndje ndə kə pa alane sɔtə̂ kʉtə̂ aərə nə səkɔ lə kəna əndje. 35 E yïndə alayïkowɔ nə̂ e, e mbrə̈ ə̂rɔ̂nə kə əndje. E kö aərə kö kə azü ndə kə pa əndje kirə də nə kə e ne. Kədə e mbrə rə, âkrâ nə̂ e sə kə sə gerətshe. E sə kə sə tə aləvu Ndjapä ə̂në tshə sə mâ ngâ lafɔ kɔ. Mbrə ə̂në Ndjapä sə kə ma ə̂rɔ̂ nə kə azü ə̂në əndje wusə̂ kə za mərshe wu ne kɔ, ndje kə aəmbrʉ azü.»

36 «E sə̈ də ə̂rɔ̂ lɔsu mata ə̂në Abä e sə də ə̂rɔ̂ lɔsu kɔ. 37 E wä ngbanga wä gâ lə kumu azü ne, ka Ndjapä wa ngbanga wa gâ lə kumu e ne. E zä əpʉ zä gâ lə kumu azü ne, ka Ndjapä za əpʉ za gâ lə kumu e ne. E gbä tshelə ködä nyaka lə kumu angâ e, ka Ndjapä gba tshelə anyaka nə̂ e. 38 E tö ərə kə azü ka Ndjapä to ndje ərə kə e. Əndje sə kə to ərə kə e ə sə kə su ngbede nə̂ e trɔ̂, əndje meme ə tu gâ tʉ. Mbrə ə̂në ərə ə̂në e sə kə za ndə kə to də ərə kə angâ e kɔ də̂ Ndjapä sə kə za ndə kə to də ərə kə e.»

39 Jezu kwâtə̂ye ə pâ ə̈bə̈ əpʉ kəwû kə əndje ə pa: «Ə̈bə̈ əyïbula lï ndə kə yisə̂ äwä kə ə̈bə̈ ngâ nə də əyïbula a? Əndje bishi nɔ̂ sə sə kə yɔ gâ lə kudû ne a? 40 Ə̈bə̈ awomanda ərə ro pâ awoyisə̂ ərə kə ətshə ro ne. Awomanda ərə ə̂në tshə manda ərə də äwänə, tshə sə kə sə mata awoyisə̂ ərə kə ətshə nə.

41 «Mbrə yekɔ də̂ bə wu aya ebe ə̂në ə sə lə ala aye zə kɔ â wu ayɔ ə̂në ə sə lə ala zə kɔ wu ne kɔ? 42 Mbrə yekɔ də̂ bə lï ndə kə pa kə aye zə ə pa: "Aye əmə, kä ə kä mə mbrə aya ebe ə̂në ə sə lə ala zə kɔ", əbə ə̂në bə wu ayɔ ə̂në ə sə ndje lə ala zə kɔ wu ne kɔ? Əbə, əyïama bishi, mbrə̈ angbʉlînə ayɔ ə̂në ə sə lə ala zə kɔ gâ ye kanika ə lishi tə ə̂rɔ̂nə ndə kə mbrə ebe ə̂në ə sə lə ala aye zə nə kɔ.»

43 «Ə̂rɔ̂ ayɔ le əmbrʉ leyɔ le ne, əmbrʉ ayɔ le ndje ə̂rɔ̂ leyɔ le ne. 44 Əndje wusə̂ ayɔ bale bale mbrə leyɔ nə. Əndje kɔ figə kɔ lə ndukû əshi ne, əndje kɔ ə̂lê vinyə kɔ lə ayɔ əshi ne. 45 Ə̂rɔ̂ əzü wutu də aə̂rɔ̂ aərə lə agrɔ ə̂në ə sə tə̂ lɔsu ye kɔ. Əmbrʉ əzü wutu də aəmbrʉ aərə lə əmbrʉ agrɔ nə̂ ye. Mbrə ə̂në əpʉ ə̂në ə sə tə̂ lɔsu əzü kɔ kə wutu lə ama ye gashu.»

46 «Mbrə yekɔ də̂ e sə kə e əmə ə pa: "Âgbɔ̂ Əyïngerə, Âgbɔ̂ Əyïngerə" â mbrə ərə ə̂në mə pa ndə nə kə e kɔ mbrə ne? 47 Əzü nɔ̂ ə̂në tshə na gâ ndə əmə ə dji əpʉ nə̂ əmə ə mbrə tə̂ ye Lïndə̂ nə, tshə sə mata əde? 48 Tshə sə mata əzü ə̂në tshə sə kə mbrə anda. Tshə djî kudû anda nə ə lî ə mô ə̈nü anda nə gâ pâ əkpʉ. Alɔ ə̂në ə̂ngû sû ə zâ ətshe nɔ̂, ə̂ngû nə gû də awlra gbo anda nə ə meme anda nə meme ne mbrə ə̂në əzü nə mô anda nə də äwänə. 49 Bale, əzü nɔ̂ ə̂në tshə dji əpʉ nə̂ əmə ə mbrə tə̂ ye mbrə Lïndə̂ nə ne, tshə sə mata əzü ə̂në tshə mô anda gâ pâ ashɔ tə ambanə ə mô ə̈nü anda nə mô gâ pâ əkpʉ ne kɔ. Alɔ ə̂në ə̂ngû gû də awlra gbo anda nə, trale anda nə ngɔ̂ gâ tʉ ə ndɨ nɔ̂.»