1 Tə̂ grʉvəta ə̂ngû ə̂në Tiberə sə̂ tə âgbɔ̂ əyïngerə əgɔ Rɔmə kɔ, Pasə Pilatə sə̂ tə komandâ əgɔ Jude, Erɔdə Atipasə sə̂ tə əyïngerə əgɔ Galile, â aye nə də Flipə sə̂ tə əyïngerə əgɔ Iture gâ ndə Trakɔnitə, â Lisaniasə sə̂ tə əyïngerə əgɔ Abilanə, 2 â Aanə də Kayifə sə̂ tə aâgbɔ̂ aawotokrɔ. Tə̂ tshekɨ nə səkɔ, Ndjapä yîsə̂ əpʉ nə̂ ye kə Zââ, əgblə nə̂ Zakari mâ lə ngbûndû. 3 Zââ âfɔ ə nâ na ye lə aəgɔ nɔ̂ ə̂në ə sə̂ trö də ə̂ngû Jurda kɔ. Tshə yîsə̂ əpʉ kə azü ndə kə pa əndje tshi äwä angbrɔ kə mbrə aərə nə̂ əndje tʉ ə za batamo kanika Ndjapä gba tshelə anyaka nə̂ əndje. 4 Lïndə əpʉ nə̂ awopandəma Ndjapä Ezayi ə̂në ə pâ:

«Ə̈bə̈ əzü sə kə ta râwâ lə ngbûndû ə pa:

"E gämba äwä ə̂në Âgbɔ̂ Əyïngerə ə na tə̂ nə kɔ,

e gämba äwä ye ndji.

5 Əndje sə kə vɔ ashɔ gâ lə anglɔngbɔ nɔ̂ ə̂në ə sə lə əpro akaga kɔ,

əndje sə kə de əgbro akaga də aaya akaga nɔ̂ gâ tʉ,

əndje sə kə gamba äwä ə̂në ə dîru gâ ye kɔ ndji,

ə gamba aäwä ə̂në akudû sə tə̂ nə kɔ kpla."

6 Kanika azü nɔ̂ sə kə wu äwä ə̂në Ndjapä sə kə she azü lə kuzu tə̂ nə kɔ.»*

7 Ə̂kpû azü nâ gâ tə̂ Zââ nə ndə kə pa tshə za batamo kə əndje. Tshə pâ kə əndje ə pa: «E-e, angwa alɔngɔ, əde kə yisə̂ kə kpe əkɔ nə̂ Ndjapä ə̂në ə sə kə na gu nə kɔ kə e? 8 E mbrə̈ tə̂ e tə ə̂rɔ̂nə ndə kə yisə̂ nə ə pa e tshî äwä angbrɔ kə mbrə aərə nə̂ e tʉ gâ ye. E kätə̂ kə pa mâ lə e ə pa: "Abraamo sə tə ätä ä." Mbrə ə̂në mə pa kə e, kədə Ndjapä kə yində nə, tshə lï ndə kə mbrə ndə kə pa abadja səye do tə̂ əndje tə alätä Abraamo nə. 9 Gondâ sə trö ndə kə de aəshe aayɔ gâ ye. Əndje sə kə de aayɔ nɔ̂ ə̂në ə le ə̂rɔ̂ leyɔ le ne kɔ ndə kə wli gâ ala əwo.»

10 Ə̂kpû azü nə yû Zââ nə ə pa: «Ndjapä yində nə ə pa ä mbrə yekɔ?» 11 Tshə kîrə əpʉ kə əndje ə pa: «Əzü ə̂në tshə sə də əkro ləba bishi, tshə zä ə̈bə̈ nə bale kə ətshə ə̂në tshə sə sə də nə ne kɔ. Əzü ə̂në tshə sə də rəgo, tshə tö ə̈bə̈ nə kə ətshə ə̂në tshə sə sə də nə ne kɔ.»

12 Alabə̈ aaworɔ ngendja lapɔ nâ ndje ndə kə pa Zââ nə za batamo kə əndje. Bale, əndje yû ətshə ə pa: «Awoyisə̂ ərə, Ndjapä yində nə ə pa ä mbrə yekɔ?» 13 Tshə pâ kə əndje ə pa: «E yü tshuku ngendja lapɔ yü ə rô ənə̂ sə̂ ə̂në əndje yîsə̂ nə kə e kɔ ne.»

14 Atrugu yû ndje ətshə ə pa: «Kâ ənə̂ ä, Ndjapä yində nə ə pa ä mbrə yekɔ?» Tshə pâ kə əndje ə pa: «E kö ngendja nə̂ azü kö də awlra ne, e lëa azü lëa tə ambanə ne, e zä lɔsu e kʉ gâ tə̂ ngendja kosəra nə̂ e.»

15 Azü nə nɔ̂ sə̂ kə ka mbrə Kristə. Azü nə sə̂ kə yu tə̂ əndje ə pa Zââ nə sə tə Kristə nə a! 16 Bale, Zââ nə pâ kə əndje nɔ̂ ə pa: «Əmə, mə sə kə za batamo ə̂ngû kə e. Ə̈bə̈ əzü sə kə na gu nə mandâ əmə, tshə sə tə worɔgbɔ ə rô əmə. Mə lï lï ndə kə wora ə̂wû tama nə̂ ye ne. Ətshə, tshə sə kə za batamo Âgbɔ̂ Yîrə̂ də ənə̂ əwo kə e. 17 Tshə sə də ərə kə pe də tshelə ə̂lê rəgo lə kəna ye. Tshə sə kə ngbo tshepa lakrʉ ndə kə pe tshelə ə̂lê rəgo ndə kə ko nə gâ lə agrɔ nə̂ ye, â ko krosa nə wli gâ ala əwo ə̂në ə rɨ rɨ tə̂ ərə ne kɔ.»Ərə kə pe də tshelə aə̂lê rəgo

18 Zââ nə yîsə̂ âkâ əpʉ nɔ̂ kə azü nə ndə kə mʉ Ə̂rɔ̂ Əpʉ kə əndje.

19 Zââ ngâ kə komandâ Erɔdə mbrə ə̂në tshə zâ Erɔdiadə əwɔ aye nə, ndje mbrə ə̂në tshə mâ alabə̈ aəmbrʉ aərə tə bandanə. 20 Erɔdə nə mâ kwatəndje ə̈bə̈ əmbrʉ ərə: tshə zâ ama â əndje zâ Zââ nə gâ lə anda kânga.

21 Ə̂në azü nɔ̂ sə̂ kə za batamo kɔ, Jezu zâ ndje batamo nə. Ə̂në tshə sə̂ kə yu Ndjapä kɔ, tshelafɔ krɔ̂ â 22 Âgbɔ̂ Yîrə̂ jêrə gâ pâ ye mata gbakuduba. Ə̈bə̈ tshema tô mâ lafɔ ə pâ: «Bə sə tə Ɨrɨ əmə ə̂në mə yində zə tə bandanə, tshelə əmə mɔ tə̂ zə tə bandanə.»

23 Jezu sə̂ trö də ə̂ngû zazü bale də morofo â vɔ̂tə̂ kə mbrə kosəra nə̂ ye. Azü wû ənə̂ əndje ə pa tshə sə tə ɨrɨ Jozafu. Jozafu nə sə̂ tə ɨrɨ Eli. 24 Eli nə sə̂ tə ɨrɨ Matatə, Matatə nə sə̂ tə ɨrɨ Levi, Levi nə sə̂ tə ɨrɨ Melki, Melki nə sə̂ tə ɨrɨ Janayə, Janayə nə sə̂ tə ɨrɨ Jozafu. 25 Jozafu nə sə̂ tə ɨrɨ Matatiasə, Matatiasə nə sə̂ tə ɨrɨ Amɔsə, Amɔsə nə sə̂ tə ɨrɨ Nahumə, Nahumə nə sə̂ tə ɨrɨ Esəli, Esəli nə sə̂ tə ɨrɨ Nagayə. 26 Nagayə nə sə̂ tə ɨrɨ Maatə, Maatə nə sə̂ tə ɨrɨ Matatiasə, Matatiasə nə sə̂ tə ɨrɨ Semeyinə, Semeyinə nə sə̂ tə ɨrɨ Josakə, Josakə nə sə̂ tə ɨrɨ Joda. 27 Joda nə sə̂ tə ɨrɨ Jowananə, Jowananə nə sə̂ tə ɨrɨ Reza, Reza nə sə̂ tə ɨrɨ Zorobabalə, Zorobabalə nə sə̂ tə ɨrɨ Salatialə, Salatialə nə sə̂ tə ɨrɨ Neri. 28 Neri nə sə̂ tə ɨrɨ Melki, Melki nə sə̂ tə ɨrɨ Adi, Adi nə sə̂ tə ɨrɨ Kozamə, Kozamə nə sə̂ tə ɨrɨ Aləmadamə, Aləmadamə nə sə̂ tə ɨrɨ Arə. 29 Arə nə sə̂ tə ɨrɨ Jezu, Jezu nə sə̂ tə ɨrɨ Eliezerə, Eliezerə nə sə̂ tə ɨrɨ Jɔrimə, Jɔrimə nə sə̂ tə ɨrɨ Matatə, Matatə nə sə̂ tə ɨrɨ Levi. 30 Levi nə sə̂ tə ɨrɨ Shemeyɔ, Shemeyɔ nə sə̂ tə ɨrɨ Juda, Juda nə sə̂ tə ɨrɨ Jozafu, Jozafu nə sə̂ tə ɨrɨ Jonamə, Jonamə nə sə̂ tə ɨrɨ Eliakimə. 31 Eliakimə nə sə̂ tə ɨrɨ Melea, Melea nə sə̂ tə ɨrɨ Mena, Mena nə sə̂ tə ɨrɨ Matata, Matata nə sə̂ tə ɨrɨ Nata, Nata nə sə̂ tə ɨrɨ Davidə. 32 Davidə nə sə̂ tə ɨrɨ Jese, Jese nə sə̂ tə ɨrɨ Obadə, Obadə nə sə̂ tə ɨrɨ Bwazə, Bwazə nə sə̂ tə ɨrɨ Sala, Sala nə sə̂ tə ɨrɨ Naasɔ. 33 Naasɔ nə sə̂ tə ɨrɨ Aminadabə, Aminadabə nə sə̂ tə ɨrɨ Adəminə, Adəminə nə sə̂ tə ɨrɨ Arəni, Arəni nə sə̂ tə ɨrɨ Esərɔmə, Esərɔmə nə sə̂ tə ɨrɨ Farasə, Farasə nə sə̂ tə ɨrɨ Juda. 34 Juda nə sə̂ tə ɨrɨ Jakɔbə, Jakɔbə nə sə̂ tə ɨrɨ Izakə, Izakə nə sə̂ tə ɨrɨ Abraamo, Abraamo nə sə̂ tə ɨrɨ Tera, Tera nə sə̂ tə ɨrɨ Nakɔrə. 35 Nakɔrə nə sə̂ tə ɨrɨ Seruki, Seruki nə sə̂ tə ɨrɨ Rago, Rago nə sə̂ tə ɨrɨ Falakə, Falakə nə sə̂ tə ɨrɨ Eberə, Eberə nə sə̂ tə ɨrɨ Sala. 36 Sala nə sə̂ tə ɨrɨ Kayinamə, Kayinamə nə sə̂ tə ɨrɨ Arəfakəsadə, Arəfakəsadə nə sə̂ tə ɨrɨ Samə, Samə nə sə̂ tə ɨrɨ Nɔwe, Nɔwe nə sə̂ tə ɨrɨ Lemakə. 37 Lemakə nə sə̂ tə ɨrɨ Matusala, Matusala nə sə̂ tə ɨrɨ Enɔkə, Enɔkə nə sə̂ tə ɨrɨ Jeradə, Jeradə nə sə̂ tə ɨrɨ Maleleyalə, Maleleyalə nə sə̂ tə ɨrɨ Kayinamə. 38 Kayinamə nə sə̂ tə ɨrɨ Enɔsə, Enɔsə nə sə̂ tə ɨrɨ Satə, Satə nə sə̂ tə ɨrɨ Adamə, â Adamə nə sə̂ tə ɨrɨ Ndjapä.