As características de um bom líder, segundo a Bíblia: exemplos e qualidades

Xa̱bo̱ tsí ma̱goo mbuya̱ ikhúún tsí nanimbu̱únꞌ juyáá Jesús

1 Ajngáa rí gakon ñajuun ríge̱ꞌ: xí mbáa nandoo ma̱nindxu̱u̱ xa̱bo̱ tsí jayá ikhúún tsí nanimbu̱únꞌ juyáá Jesús, mbá ñajun rí máján nandoo̱ gáꞌnii̱. 2 Ikhaa jngó tsí ñajuun xa̱bo̱ ede̱, jaꞌyoo rí ma̱nindxu̱u̱ mbáa xa̱bo̱ tsí nda̱a̱ rí ra̱máján mi̱ꞌthán numuu̱. Gíꞌmaa rí ma̱nindxu̱u̱ xa̱bo̱ tsí mbáwíi a̱ꞌgui̱i, xúꞌkhue̱n máꞌ nandxaꞌwá-mina̱ꞌ mújúun rí ma̱ꞌne, tsianii̱, gamakuii̱, na̱grui̱gúu̱n xa̱bo̱ ná guꞌwóo̱ jamí na̱ma̱ñuu̱ naꞌsngáa̱ mújúu̱n. 3 Ra̱jáꞌyoo ma̱nindxu̱u̱ mbá xa̱bo̱ najnga̱a̱, ni máꞌ ma̱xáꞌne mika idxu̱u̱, xúꞌkhue̱n máꞌ ma̱xáni̱gu̱u̱ꞌ madaa̱ mbúkha̱a̱ ga̱jma̱á majñu̱u̱ rí mi̱nduwa.* A̱ꞌkhue̱n gakon ga̱nindxu̱u̱ xa̱bo̱ tsí májáan a̱kui̱in jamí mba̱a̱ xo̱xto̱o̱, xúꞌkhue̱n máꞌ ma̱xáríguii̱ a̱kuii̱n ná inuu mbúkha̱a̱. 4 Ga̱nindxu̱u̱ xa̱bo̱ tsí máján naꞌthán-ñájúún xa̱bo̱ guꞌwóo, numuu rí nune̱-mbáníí i̱jii̱n rí naꞌthúu̱n jamí máján nduya̱-makuíi̱ anúu̱. 5 Tsí tsíma̱ñuu gáꞌthán-ñájúún xa̱bo̱ guꞌwóo, xáne lá gáma̱ñuu̱ rí mbayée̱ ikhúún tsí nanimbu̱únꞌ juyáá Ana̱ꞌlóꞌ xúꞌkhue̱n rá. 6 Ikhaa jngó ra̱jáꞌyoo ma̱grui̱gú ñajun ríge̱ꞌ mbáa xa̱bo̱ tsí níkhú jayu ninimbo̱o̱ꞌ jaꞌyoo Ana̱ꞌlóꞌ, ra̱ꞌkhá makúxe̱-mine̱e̱ꞌ guéño jamí ma̱xpátuáꞌáa̱n ná ma̱ꞌne-numaa̱ aꞌkhúu̱n xómá rí ma̱gíꞌnuu gixa̱a̱. 7 Mangaa máꞌ ndaꞌyóo rí xa̱bo̱ tsí tsínimbu̱únꞌ juyáá Jesús máján gúthan ga̱jma̱á numuu̱, kajngó nda̱a̱ rí ra̱máján mi̱ꞌthán ga̱jma̱á numuu̱, jamí ma̱xárákaa̱ ná katsáꞌkhán rí naꞌgí gixa̱a̱.

6 Mbámbáa xa̱bo̱ nikhi̱i̱ tsúꞌkhue̱n jaꞌyoo rí ma̱nindxu̱u̱ mbáa xa̱bo̱ tsí nda̱a̱ nitháan rí ra̱máján mi̱ꞌthán ga̱jma̱á numuu, jamí tsí mbáwíi a̱ꞌgui̱i. Xúꞌkhue̱n máꞌ i̱jii̱n, jaꞌyoo rí ma̱nindxúu̱n tsí nanimbu̱únꞌ juyáá Jesukrísto̱, jamí ndawa̱a̱ tsí naꞌne tsu̱dúu̱n rí ra̱máján ini̱i̱ o najñaguu̱n mbo̱ꞌ. 7 Numuu rí tsí ñajuun xa̱bo̱ ede̱, jayée̱ ikhoo ñajun ná guꞌwóo Ana̱ꞌlóꞌ. Ikhaa jngó, ndaꞌyóo rí ma̱nindxu̱u̱ xa̱bo̱ tsí nda̱a̱ nitháan rí ra̱máján mi̱ꞌthán ga̱jma̱á numuu: rí ma̱xánindxu̱u̱ xa̱bo̱ tsí nakúxe̱-mina̱ꞌ, rí ma̱xánindxu̱u̱ xa̱bo̱ tsí i̱ndo̱ó máꞌ najiꞌnáa, rí ma̱xánindxu̱u̱ xa̱bo̱ tsí i̱ndo̱ó máꞌ najnga̱a̱, rí ma̱xánindxu̱u̱ xa̱bo̱ tsí na̱tsa̱ñu̱u̱ꞌ gajmíí xa̱bo̱, ni máꞌ rí ma̱xánindxu̱u̱ xa̱bo̱ tsí na̱ni̱gu̱u̱ꞌ madaa mbúkha̱a̱ ga̱jma̱á majñu̱u̱ rí mi̱nduwa. 8 A̱ꞌkhue̱n gakon, ndaꞌyóo rí ma̱grui̱gúu̱n xa̱bo̱ ná guꞌwóo̱, jamí rí ma̱ꞌnii̱ rí máján. Xúꞌkhue̱n máꞌ nandxaꞌwá-mine̱e̱ꞌ mújúu̱n rí ma̱ꞌnii̱, májáan a̱kuii̱n, jaꞌwu xtáa̱, jamí na̱ꞌngo̱o̱ máꞌ naꞌthán-ñájuu̱n xuyuu̱. 9 Xúꞌkhue̱n máꞌ mangaa, ndaꞌyóo rí ma̱nindxu̱u̱ mbáa xa̱bo̱ tsí na̱gu̱xi̱i mújúun ajngáa rawuun Ana̱ꞌlóꞌ, xómá phú waꞌsngáa̱, kajngó ma̱goo maꞌthán-múꞌúu̱n i̱ꞌwíin xa̱bo̱ ga̱jma̱á gisngáá rí gakon jamí ma̱ꞌnii̱ rí ma̱nimbu̱únꞌ tsí nawajún-ꞌthi̱ín gisngáá rúꞌkhue̱n.