19 Lelo mtsileke nzambi tsenu mmuyile Imulungu, ili yawaleghusile nzambi tsenu. Mng’atenda apfo,

38 Petiri kawedika, "Chila imunu yatsileke nzambi tsake, mbatitsighwe kwa taghwa lya Yesu Kiristu, na Imulungu katsomleghusilani nzambi tsenu. Namwe mtsobokela laghano lye Imulungu, iyo Ghumuhe Mwenzeluka.

30 Ghumwande Imulungu tsakatenda ka ng’akona bae ghamatsuwa ghala iwanu hawakalile wabotsi, lekeni lelo kowalaghitsa iwanu wose chila hanu watsileke nzambi tsawo.

17 Kulawa ichipindi acho Yesu kanza kuwatangatsila iwanu, kulonga, "Mtubu, kwaapfila ufalume wa mbinguni wahabehi."

8 Lelo mtende aghala igholangusa ako ukusama kwenu;

15 Kalonga, "Ichipindi chitsa, Undewa we Imulungu wa habehi. Mtsileke nzambi tsenu muitoghole Imbuli Inoghile."

7 Pfipfila nowalongela kutsakuwa na ndeng’elo ng’ulu kulanga kwe imunu yumwe yane nzambi kutsileka nzambi tsake kubita iwanu wala tisini na tisa iwebona wanogha aku ng’awobama bae kutsileka nzambi tsawo."

10 Pfipfila nowalongela, malaika we Imulungu watsodeng’elela kwe imunu yumwe yane nzambi kutsileka nzambi tsake."

32 Sitsile bae kuwakema iwanu iwanoghile, ila wane nzambi wadahe kutsileka."

9 Imtwatsa ng’okawa bae kutenda achila chalongile ka iwanu pfawakona kokawa. Yeye komdudumilani, ng’obama bae imunu wowose yangamile, ila chobama yeye chila munu aleke nzambi tsake.

12 Nene Imtwatsa Imulungu nolonga apfino, "Lekeni hata sambi,

mmbwihile kwa ghumoyo ghose,

kwo ukufunga, kwa ukulila na kwa ukudomboketsa.

13 Mleke ukudegha ghamabwende ghenu kulangusa ka mwona usungu,

ila mwone usungu mna imimoyo yenu."

Mmwihile IMNDEWA wenu.

Yeye kamluso na kana libatsi,

ng’asumkagha bae kwona maya, yeye ng’epfagha bae kutunoghela,

matsuwa ghose yeye koleka kutuhigha.

14 lekeni ka iwanu wangu watsehulumsa iwenyegho, wang’alomba na wang’anibama na kutsileka tsinzila tsawo, nene nitsowahulikitsa kulawa kulanga, nitsotsilekelela tsinzambi tsawo, na nitsoihonetsa isi yawo.

1 Mfalume Hezekia tsakatuma wanu waghende Isiraeli yose na Yuda, kuya kawandikila baluwa wanu wa Manase na wa Efuremu, kawakema watse kuna ing’anda ya IMNDEWA ako Yerusalemu kudeng’elela ichihungo cha Pasaka kwa IMNDEWA, Imulungu wa Isiraeli. 2 Mfalume na iwakulu na iwanu wose wa ghumji ghwa Yerusalemu tsawalamla kudeng’elela chihungo cha Pasaka mna ghumwetsi wa kabili. 3 Ng’awadahile baye kudeng’elela mna ghumwetsi ghwake ka pfawang’ali wotendagha kwaapfila iwatambika iwetendile wela tsawachidogho na iwanu tsang’ana wetingane baye ako Yerusalemu. 4 Apfo chinu achino tsachimnoghelesa mfalume na mtingano ghwose ghwa iwanu. 5 Apfo walamla kutowa lukemo mna isi yose ya Isiraeli, kulawa Beeri Sheba mbaka Dani, iwanu wobamighwa watse Yerusalemu kudeng’elela ichihungo cha Pasaka ya IMNDEWA, Imulungu wa Isiraeli. Ipasaka ikalile na wanu wengi ka awo tsang’ana ideng’elelighwe baye, ka apfila pfayandikighwe. 6 Kwa kulaghitsighwa na mfalume na iwakulu, iwanu iwatumighwe waghenda mna Isiraeli na Yuda yose aku waghala baluwa iyandikighwe apfino;

"Mwemwe wanu wa Isiraeli, imhonile kulawa mna ghamoko gha mfalume wa Ashuru, muye kwa IMNDEWA, Imulungu wa Abrahamu na Isaka na Isiraeli, naye katsakuya kuna mwemwe. 7 Mleke kuwa ka iwahenga wenu na ndughu tsenu, awala iwawile si wakutogholeka baye kwa IMNDEWA, Imulungu wa iwahenga wawo iyawahighile sideke ka pfamkona. 8 Lelo sambi mleke kuwa wasughu ka iwahenga wenu. Lekeni mwilapfe ghendo kwa IMNDEWA. Mtse kuna ing’anda yake iyaitendile ienzeluke matsuwa ghose, mumtumikile IMNDEWA, Imulungu wenu, nayo imaya yake ng’ulu itsakuka imlekeni. 9 Mng’amuyila IMNDEWA, iwanu awala iwawaghoghile ndughu tsenu na iwana wenu watsowonela libatsi na watsowalekelela woye mna isi aino. Kwaapfila IMNDEWA, Imulungu wenu kamluso na kana libatsi. Apfo mng’amuyila, yeye katsowabokela." 10 Apfo iwanu awo wanga kulawa mji ghumwe mbaka mji ghungi mna isi yose ya Efuraimu na Manase, kuya wapfika mbaka Zabuloni. Lekeni wanu wengi wawaseka na kuwabetsa. 11 Hata apfo wanu chidogho kulawa ghamakabila gha Asheri, Manase na Zabuloni watoghola kughenda Yerusalemu. 12 Ngupfu ya Imulungu ing’ali isang’ana mna isi ya Yuda ya kuweng’a ghumoyo ghumwe ghwa kutenda aghala mfalume na iwakulu wake ghawawalaghiste, ka apfila pfayalaghitse Imulungu.

13 Wanu wengi ng’ani wetingana ako Yerusalemu mna ghumwetsi ghwa kabili kudeng’elela chihungo cha ipfighate ipfilihela hamila. 14 Wabomola tsimatsabau ako Yerusalemu, tsimatsabahu tsa ukudusulila upfumba, kuya watsasa hana ulwanda lwa Kidironi. 15 Tsuwa lya kumi na nne lya ghumwetsi agho wachinja iwana wa ng’olo wa Pasaka. Watambika, na Walawi tsawona chinyala, kwa apfila tsang’awetendile wele baye, kuya wetenda wela na waghala nambiko tsa ukulakatsighwa mna ing’anda ya IMNDEWA. 16 Kuya watenda sang’ano tsawo mna ing’anda ya Imulungu ka pfawobamighwa na ghamalaghitso gha Musa munu wa Imulungu. Walawi tsawaweng’a iwatambika idamu ya nambiko, nawo iwatambika waimitsa mna imatsabahu. 17 Iwanu wengi iwetingane aho tsang’awelile baye, apfo Walawi wawachinjila wang’olo wa Pasaka iwanu awo, kuya wawalapfa wang’olo awo kwa IMNDEWA. 18 Iwanu wengi iwatsile kulawa Efraimu, Manase, Isakari na Zabuloni tsang’awelile baye, lekeni waja pfipfo ichihungo cha Pasaka, ing’apfibamighwa baye. Apfo Hezekia kawalombela, kalonga, "Imulungu yunoghile, mleghusile inzambi chila munu, 19 iyoghulapfa ghumoyo ghwake ghwose kukubama ghweghwe IMNDEWA, Imulungu wa iwahenga wake, hata ka ng’elile baye ka pfaghobama ghamalaghitso gha hanu haenzeluke." 20 IMNDEWA Imulungu katoghola chayalombile Hezekia, kawahonetsa iwanu. 21 Waisiraeli wose iwetingane Yerusalemu tsawadeng’elela ichihungo cha pfighate ipfilihela hamila kwa matsuwa saba, aku wodeng’elela sideke. Walawi na iwatambika wang’ali womwimbila Imulungu chila tsuwa kwa ngupfu tsawo tsose. 22 Mfalume Hezekia kawatoghola na kuwaghuma ghumoyo watambika kwaapfila tsawatenda kwa ukumanya ghoya sang’ano ya ukumtambikila IMNDEWA. Waja kwa matsuwa saba mna ichihungo acho, walapfa nambiko tsa ukukala tseghamba, na ukumtunya IMNDEWA, Imulungu wa iwahenga wawo.

23 Iwanu wose walamla kudeng’elela ichihungo acho kwa matsuwa saba ghangi, apfo waghendela kudeng’elela ichihungo acho kwa ghamatsuwa ghangi saba kwa ndeng’elo ng’ulu. 24 Mfalume Hezekia wa Yuda kaweng’a ghumtingano ghwa iwanu ng’ombe wamale elufu imwe, na mene na wang’olo elufu saba. Pipfipfila iwakulu walapfa ng’ombe wamale elufu imwe na ng’olo elufu kumi. Iwatambika wengi tsawetenda wenyegho wele. 25 Ghumtingano ghose ghwa iwanu wa Yuda ghudeng’elela ghendo, tsawadengelela hamwe na Watambika na Walawi, iwenyekaye wa Yerusalemu hamwe na iwagheni iwalawile kunze, iwang’ali wokala Yerusalemu, na iwanu wose iwakalile Yuda. 26 Kukala na ndeng’elelo ng’ulu ako Yerusalem, kwaapfila kulawa hayatawale Selemani mwana wa Daudi, mfalume wa Isiraeli chinu ka acho tsang’ana chilawile baye. 27 Kuya iwatambika na Walawi wawalombela iwanu tsibalaka kwa Imulungu, naye Imulungu kahulika, kwaapfila ghawalombile ghampfikila ako kulanga, hanu hake haenzeluke hayokala yeye.

19 Imunu wowose iyoninoghela, nomlonga na nomkanya. Apfo uleke ghehile kwa ghumoyo ghwako ghose.

5 Apfo mchikome chila chinu chihile ichili mghati mwenu, ughoni na kutenda ghehile, dong’o na ghamawatso ghehile, na batsu ilighala ne ukutamanila ichinyagho.

13 Mleke kulapfa pfilungo pfe ng’uli tsenu pfitende ghehile, ila mwilapfe iwenyegho kwe Imulungu, ka iwanu imtsihulighwe kulawa mne lifwa, pfilapfeni pfilungo pfenu kwe Imulungu pfisang’ane aghala ighanoghile ka pfayobama Imulungu.

1 Ndughu tsangu miyenu ang’atotsa, mwemwe imlongotsighwa na Ghumuhe Mwenzeluka, mkanyeni imunu ayo kwa uhole, lekeni mwalangitse mwemwe muwenyegho mleke kughetsighwa.

21 Apfo mghaleke ghose ghehile na nzila tsenu tsose itsihile ghendo. Muibokele kwa uhole imbuli iihandighwe mghati mwenu iidaha kuwakombolani.