1 Hambele, imaya ya mfalume haimalile, mfalume kamkumbuka Vashiti, na achila chayatendile na achila chayalaghitse yatendelighwe. 2 Apfo iwatumighwa wake iwang'ali womsang'anila yeye imwenyegho, wamlongela, "Leka ubamilighwe iwali iwanoghile, awala ng'ana wawase na mmale baye. 3 Kodaha kusaghula wakulu mna chila mkowa ghwautawala, uwalaghitse wawaghale iwali wose iwanoghile mna ing'anda ya iwapinga ahano hana ghumji ghwa Shushani. Kuya walolesighwe na Hegai, mtumighwa yumswayule yawakalitse wapinga, kuko weng'ighwe mapfuta na pfinu pfingi wadahe kwihamba ghendo. 4 Imwali iyatsokunoghela ng'ani yawe malikia, yasole hanu ha Vashiti." Mfalume kona pfinogha, apfo katenda pfipfo.

5 Mna ghumji ghwa Shushani tsakuna munu yumwe Myahudi wa likabila lya Benjamini, taghwa lyake Modekai. Modekai tsamwana wa Yairi, Yairi tsa mwana wa Shimei, naye Shimei tsa mwana wa Kishi. 6 Modekai tsa yumwe wa iwanu iwaghalighwe kuna isi ya utumwa ako Babeli, kulawa Yerusalemu ahala mfalume Yekoniya wa Yuda hayaghoghighwe na Nebukadineza mfalume wa Babeli. 7 Modekai tsakana mwihwaghe iyakemighwe Esta, kwa Chiebulaniya imwali ayo tsakakemighwa Hadasa. Esta tsakanogha kwa ilukuli na ichihanga. Iwamweleke hawafile, Modekai kamsola, kamlela ka mwanaghe. 8 Laghitso lya mfalume halitangatsighwe, iwali wose waghalighwa kuna ghumji mkulu ghwa Shushani, wekighwa walolesighwe na Hagai. Esta naye tsakaghalighwa kuna ing'anda ya mfalume, yalolesighwe na Hagai, iyang'ali yowakalitsa wamapinga. 9 Hegai tsakanoghelwa na Esta, mbaka yang'ali yomtendela uluso Esta. Baho Hegai kamwing'a Esta ghamapfuta na ichijo chinoghile. Kuya kamwika hanu hanoghile ghendo mna ing'anda ayo ya wamapinga, kamsaghulila watumwa saba mapinga kulawa kuna ing'anda ya mfalume wamsang'anile.

10 Esta tsang'ana yalonge baye yolawila lukolo lwachi wala kabila lyachi, kwaapfila Modekai tsakamghoma yaleke ukutenda apfo. 11 Chila tsuwa Modekai tsayang'ali yobita hambele ha iluwa lwa ing'anda ayo ya wamapinga ili yamanye Esta pfayoghendelela na aghala ighang'ali ghomlawila.

12 Ichipindi cha ukwihamba iwali tsa mwaka ghumwe, miyetsi sita ya mwanduso tsawabakala ghamafuta gha manemane, na miyetsi sita ya ukumalitsila tsawabakala mapfuta ighonung'ila ghoya na ghamapfuta ghangi. Haghamalile ghamatsuwa agho, chila mwali tsakaghalighwa yaliyeka kwa mfalume Ahasuero. 13 Hawang'ali woghenda kwa mfalume, chila mwali tsakeng'ighwa chinu chayabamile kusola kulawa mna ing'anda ya wamapinga yaghende nacho kuna ing'anda ya mfalume. 14 Imwali koghenda nemihe na nemitondo kakuya kuna ing'anda ingi ya mapinga, aku kololesighwa na Shaashigazi, iyang'ali iyowakalitsa mapinga wangi wa mfalume. Imwali ng'odaha ukuya keli kwa mfalume, mbaka yamnoghele mfalume na yalaghitse yakemighwe taghwa lyake.

15 Chipindi chipfika cha Esta ukughenda mna ing'anda ya mfalume. Ayo tsa neghe Abihaili, mtumba wake Modekai, iyamlelile ka mwanaghe, yeye ng'alombile chinu chochose baye kubita achila chayalongile Hegai yapfale, imtumighwa iyowalolesa mapinga wa mfalume. Chila munu iyamwonile Esta tsakanoghelwa naye. 16 Apfo Esta kaghalighwa mna ing'anda ya mfalume haghupfikile mwaka ghwa saba ghwayatawale mfalume Ahasuero, ghumwetsi ghwa kumi ighukemighwa Tebeti. 17 Mfalume kanoghelighwa na Esta kubita pfayanoghelighwe na iwapinga wose. Tsakamkunda ng'ani kubita wali wangi. Apfo mfalume kampfatsa litaji lya malikia mwitwi, kamtenda yawe malikia yasole hanu ha Vashiti. 18 Kuya mfalume kamtendela Esta chihungo chikulu, kawakema pfilongotsi na iwatumwa wose wa ufalume wake. Kuya mfalume kawaleka iwanu wabwihile mna imikowa yose, na kawaghweka iwanu pfinu bwelele pfa chifalume.

19 Iwali hawetingane lwa keli, Modekai ttsakasaghulighwa yawe yumwe wa iwakulu. 20 Esta tsang'ana yawalongele baye iwanu ka yeye yolawa kabila lyachi na lukolo lwachi. Tsakatenda ka Modekai pfayamlaghitse kwaapfila Esta tsayang'ali yomhulikitsa Modekai ka pfipfila pfayang'ali yomhulikitsa hayang'ali yomlela. 21 Modekai hayang'ali yokalagha hana lilango lya mfalume, Bigitana na Tereshi, wakulu weli wa mfalume iwakalitse lilango lya mfalume, wamwonela maya mfalume Ahasuero mbaka wabama kumkoma. 22 Modekai tsakamanya chinu acho chihile, kamlongela malikia Esta, naye Esta kamlongela mfalume. 23 Hawaipelembe imbuli ayo, yoneka yolongesa, apfo iwanu awo weli wakondekighwa mna imibiki ya ukukomela. Na imbuli ayo yandikighwa mna ichitabu ichikwandikighwa tsimbuli tsa mfalume.