1 Haghamalile agho, mfalume Ahasuero kamwongetsa ukulu Hamani, mwana wa Hamedata, iyolawa mna ilukolo lwa Agagi. Kamtenda yawe mkulu kubita wakulu wamwenga wose. 2 Iwakulu wose wa mfalume iwakalile hana lilango lya mfalume tsawamtowela magoti na kumwinamila, kwaapfila mfalume kalaghitsa Hamani yatendelighwe pfipfo. Lekeni yeye ng'amtowele Modekai magoti baye wala ng'amwinamile baye. 3 Iwakulu wangi iwakalile hana lilango lya mfalume wamghutsa Modekai, "Hebali ghweghwe koghabetsa malaghitso gha mfalume?" 4 Chila tsuwa wang'ali womlongela yaleke ukutenda apfo, lekeni Modekai ng'awahulikitse baye. Apfo wamlongela Hamani imbuli ayo ili yone ka kodaha kududumila ghayotenda Modekai, kwaapfila tsakawalongela ka yeye tsamyahudi. 5 Hamani hayonile Modekai ng'omtowela magoti baye wala ng'amwinamile baye, kona maya ghendo. 6 Kuya hayamanyile ka Modekai kamyahudi, kona ng'apfinoghile baye yamkome yaliyeka. Apfo katenda tsengwe yawakome Wayahudi wose, iwali mna ufalume wa Ahasuero.

7 Mna ghumwaka ghwa kumi na mbili ghwayatawale mfalume Ahasuero, mna ghumwetsi ghwa mwanduso ighukemighwa Nisani, Hamani kalaghitsa iwanu wase tsisimbi walamle wapate litsuwa na ghumwetsi ghwayatsotenda litsengwe lyake. Apfo isimbi ighwila mna litsuwa lya kumi na nne lya ghumwetsi ghwa kumi na mbili ighukemighwa Adari.

8 Kuya Hamani kamlongela mfalume, "Hana wanu wa isi imwe mna imikowa yose ya utawala wako, iwanu awo wana malaghitso ghangi, nagho ing'agheghala baye na malaghitso gha iwanu wangi. Pfipfila wawo ng'awoghakinda baye ghamalaghitso ghako, apfo nakona mfalume uleke kuwadudumila. 9 Ka kwakona pfinogha, ulaghitse iwanu awano wakomighwe. Na nene nitsakwika fetsa kilo elufu salasini na saba na miya tano mna ihatsina ya mfalume, iwalihe iwanu iwatsotenda ing'onde aino."

10 Apfo mfalume kaitsula ipete yake ya ukwikila ghumuhuli, kamwing'a aduwi wa Wayahudi Hamani mwana Hamedata iyolawa mna ilukolo lwa Agagi. 11 Baho mfalume kamlongela Hamani, "Kwing'ighwa iwanu wose na tsifetsa atso, utumile ka pfaubama."

12 Apfo litsuwa lya kumi na tatu lya ghumwetsi ghwa mwanduso, Hamani kawakema pfilongotsi wose wa mfalume, kaweng'a usenga ubamighwa wandikighwe kwa chila lugha na chila pfawakwandika iwanu mna ufalume awo, kuya ughalighwe kwa watawala wose wa mfalume, wakulu wa mikowa yose, wakulu wa makabila ghose na chila mkowa kwa chilugha chawo. Tsibaluwa atso tsandikighwa kwa taghwa lya mfalume Ahasuero na kughelighwa muhuli ghwa ipete yake. 13 Iwasenga waghala tsibaluwa atso kuna chila mkowa, ghwa ufalume awo. Tsibaluwa atso tsilonga, Wayahudi wose, iwasongolo, na iwabala na wamapinga na iwana, wose wobamighwa wakomighwe na wahupe ghendo, na ipfinu pfawo pfose pfisolighwe mna litsuwa limwe liliyeka, litsuwa lya kumi na tatu lya ghumwetsi ghwa kumi na mbili ighukemighwa Adari. 14 Ibaluwa ayo tsaibamighwa isomighwe mwatsi ghendo mna chila mkowa ili iwanu wose wesafulule kwa litsuwa alyo. 15 Lilaghitso alino lilapfighwa mna ghumji ghwa Shushani ka mfalume pfayalaghitse. Iwasenga nawo tsawatangatsa chila hanu. Mfalume na Hamani tsawakala hasi wakunwa, lekeni iwanu wa ghumji ghwa Shushani wang'ali woghanzika.