1 Tsuwa lya kadatu kulawa hayanzile ukufunga, Esta kapfala ghamaghwanda ghake gha chimalikia, kaghenda kwima hana ichibwalu chili mghati mwa ing'anda ya mfalume, aku kololesa ichikuta cha mfalume. Mfalume tsakakala mng'anda, mna ichighoda chake cha ufalume, kololesa ghumlango ghwa ukwingilila mna ing'anda yake ya chifalume. 2 Mfalume hayamwonile Esta kema hana iluwa, kanoghelighwa naye, kamlotsa na ing'weku yake ya nzahabu iyaikindile mmoko mwake. Esta kaghenda habehi kadonza kusa kwa ing'weku ayo. 3 Kuya mfalume kamghutsa, "Ubama choni Esta? Nongele chaubama, naghwe kutsakwing'ighwa hata ka nusu ya ufalume wangu."

4 Esta kamwidika, "Ka kwakona pfinogha, ghwe mfalume wangu, leloli utse hamwe na Hamani kuna ichijo chanikwambikile ghweghwe mfalume."

5 Mfalume kalaghitsa imunu yakamkeme Hamani yatse himahima, ka pfayalombile Esta. Apfo mfalume na Hamani waghenda kuna ichijo chayawambikile Esta. 6 Hawang'ali wakunwa idipfai, mfalume kamghutsa keli Esta, "Ubama choni? Nongele, naghwe kutsopata hata ka nusu ya ufalume wangu, kutsakwing'ighwa."

7 Esta kamwidika, "Ichinu chanibama achino, 8 Ka kwakona pfinogha, ghwe mfalume wangu, utoghole, ghweghwe na Hamani ilupfi mtse kuna ichijo chanitsowambikila. Baho nitsokulongela chanibama."

9 Hamani kalawa kuna ichijo acho aku kodeng'elela na ghumoyo ghusangalamka. Lekeni hayamwonile Modekai hana lilango lya ing'anda ya mfalume, ng'emile baye wala ng'amdedemekele baye, Hamani kona maya ng'ani. 10 Lekeni kadudumila kaghenda ukaye. Kuya kawakema ukaye yake sale tsake, na imwehe wake Zereshi. 11 Baho kanza kwighoda apfila pfayali na tsimali nyingi, iwana wamale iyali nawo, na apfila mfalume pfayamwinule yawe mkulu kubita iwakulu wose wa mfalume. 12 Hamani kaghendelela kwighoda, kalonga, "Nene niliyeka ghendo yuyo yanikemighwe na Esta nilongotse na mfalume kuna ichijo. Pfipfila katukema nene na mfalume tughende kuna ichihungo ilupfi. 13 Lekeni aghano ghose ng'aghonenda baye nene nideng'e ka noghendelela kumwona Myahudi ayula Modekai hana lilango lya ing'anda ya mfalume."

14 Zereshi, imwehe wake na sale tsake wose wamlongela apfino, "Utengenetse mbiki ghuna utali wa futi sabini na tano, na ilupfi nemitondo ulonge na mfalume, Modekai yakomelighwe amwo, baho kutsakwingila na mfalume mna ichijo kwa ndeng'elo." Imbuli ayo imnoghelesa Hamani, naye ketengenetsa ghumbiki ghwa ukukomela.