1 Modekai hayamanyile ghose ighalawile, kadegha ghamagwanda ghake, kapfala maghunila na kebakatsa lipfu. Kuya kabita mghati mwa ghumji aku kolila na kodamilila kwa usungu. 2 Kaghenda mbaka hana lilango lya ing'anda ya mfalume, lekeni ng'adahile ukwingila baye kwaapfila tsakuduhu munu iyodaha kwingila mna ing'anda ya mfalume aku kapfala maghunila. 3 Chila mkowa laghitso lya mfalume halitangatsighwe kukala na chililo chikulu mghati mwa Wayahudi. Wafunga ukuja, walila na ukudomboketsa, na wanu wengi mna wawo wawasa mlipfu aku wapfala maghunila. 4 Malikiya Esta hayalongelighwe na iwatumwa wake mapinga, na iwatumwa wake iwamale iwaswayulighwe tsimbuli tsa Modekai, kona usungu sideke. Kamghalila magwanda yapfale, yaleke kupfala ghamaghunila, lekeni Modekai kaghalema. 5 Apfo Esta kamkema Hataki, yumwe wa iwanu wa mfalume iyawaswayule na iyamsaghule mfalume yamsang'anile malikiya, kamtuma kwa Modekai yamghutse hebali yotenda apfo. 6 Kuya Hataki kamghendela Modekai hachibwalu, hambele ha lilango lya ing'anda ya mfalume. 7 Naye Modekai kampetela Hataki ghose ighalawile, na isendi yose Hamani iyelaghane ukuliha mna ihatsina ya mfalume kwa ukuwakoma Wayahudi wose. 8 Kuya kamwing'a ibaluwa ya litangatso ililapfighwe mna ghumji ghwa Shushani kwa imbuli ya ukukomighwa kwa Wayahudi, kamlomba yamghalile Esta na yamlongele agho ghose, na kumlongela yaghende yakamdedetse mfalume na yamlombe yawonele libatsi Wayahudi, iwanu wake Esta. 9 Apfo Hataki kaghenda kamlongela Esta ghose ghayalongile Modekai, 10 naye Esta kamlongela Hataki yoye yamlongele Modekai, 11 "Iwakulu wose wa mfalume na iwanu wose wa imikowa womanya ghendo ka imunu wowose, yawe mmale au pinga yang'engila mna iluwa lwa mghati na kumwona mfalume bila ukukemighwa, imunu ayo yakomighwe. Imunu iyodaha kuhona ayula mfalume iyatsomlotsela ing'weku yake ya chifalume ya nzahabu ili yamuhonetse. Na nene kwa mwetsi mgima sina nikemighwe baye na mfalume."

12 Modekai hayahulike chayalongile Esta, 13 kamwidika, kalonga, kamlongele apfino Esta, "Uleke kughamba kwaapfila ghweghwe kwa mna ing'anda ya mfalume kutsokala mgima kubita Wayahudi wose. 14 Ung'enyamala tulu mna ichipindi ka achino, Wayahudi watsakwapfilighwa kulawa hanu hangi, nawo watsokombolighwa, lekeni ghweghwe kutsakufa, na iwanu wa aba wako watsokomighwa. Angu nani iyomanya songaha kutendighwa malikia mna ichipindi ka achino?"

15 Kuya Esta katuma wanu wakamlongele Modekai apfino, 16 "Ughende uketingane hamwe na Wayahudi iwokala Shushani. Mfunge ukuja na ukunwa kwa matsuwa madatu, chilo na misi kwaajili yangu. Na nene na iwatumwa wangu mapinga tutsotenda pfipfo. Kuya nitsomghendela mfalume, hata ka malaghitso ghoghoma ukutenda apfo. Ka ukufa, leka nife."

17 Apfo Modekai koka, katenda ka Esta pfayamlongele.