1 Litsuwa lilila Yesu kalawa mna ing'anda aila kaghenda mmbalimbali mwa litsimbu, ako kakala hasi. 2 Mtingano mkulu ghwa iwanu ghumtsunguluka, mbaka kadina mna ghumnumbwi na kukala amwo, na iwanu wose wema mmbalimbali mwa litsimbu. 3 Kawalongela pfinu pfingi kwa mifano, kalonga,

"Hulikitseni! Kukala na munu yumwe iyaghendile kuhanda tsimbeghu tsake. 4 Hayang'ali yopwililisa tsimbeghu, tsingi tsilaghalila habehi na inzila, wapfideghe watsa watsija. 5 Tsingi tsilaghalila hana ghamabwe na lidongo chidogho, tsota himahima. Kwaapfila lidongo ng'alighendese hasi baye, 6 litsua halilawile, imimeya iholola; na kwaapfila yahela mitsitsi, isakala. 7 Na mbeghu tsingi tsilaghalila mna imisonga; imisonga ikula, ipfingilila imimeya. 8 Na tsingi tsilaghalila mna lidongo linoghile, tseleka, imwe mia imwe, imwe sitini, na ingi selathini. 9 Yana ghamaghutwi yahulike!"

10 Wanafunzi wake watsa wamghutsa, "Heule ulonga nawo kwa mifano?" 11 Kawedika, "Mwemwe mwing'ighwa uwetso wa kutsimanya siri tsa ufalume wa kulanga, lekeni wawo ng'aweng'ighwe baye. 12 Kwaapfila munu wowose yana ichinu, katsakongetsighwa ghendo; na ayula iyalihela chinu, hata achila chayalinacho katsobokighwa. 13 Achino chicho ichinitenda nilonge nawo kwa mifano; kwaapfila wang'alola ng'awakona baye, wang'ategheletsa ng'awohulika wala ng'awomanya baye. 14 Na utabiri wa nabii Isaya wotimila kuna wawo,

‘Ukuhulika mtsohulika, lekeni ng'amtsoelewa baye.

Ukwona mtsakona, lekeni ng'amtsotanga baye.

15 Mana imimoyo ya iwanu awano ifubala,

kwa ghamaghutwi ghawo ng'awohulika ghoya baye,

na tsinenge tsawo wafinyilitsa;

hela watsakona kwa tsinenge tsawo,

na kuhulika kwa ghamaghutwi ghawo,

na kuelewa mna imimoyo yawo,

na kunihundukila nene niwahonye.’

16 "Lekeni mwemwe mbweda! Kwaapfila tsinenge tsenu tsakona na ghamaghutwi ghenu ghohulika. 17 Mana nomlongelani kweli ghendo, manabii wengi na iwanu wana ihaki tsawabama ng'ani wone achila chamkwona mwemwe, lekeni ng'awonile baye, na ukuhulika achila chamhulika mwemwe, lekeni ng'awahulike baye.

18 "Lelo mtegheletse mana ya ghumfano ghwa imunu iyohanda. 19 Chila munu iyohulika imbuli ya ufalume lekeni ng'oielewa baye, Yehile kakutsa koboka achila ichihandighwe mghati mwake. Ayo keghala na tsimbeghu itsilaghalile habehi na inzila. 20 Na ayula iyahandighwe mna lidongo lina ghamabwemabwe yuyo imunu iyohulika imbuli na bahala koibokela kwa ndeng'elelo; 21 lekeni kwaapfila kahela mitsitsi, kodudumila kwa chipindi chidodo, maghayo na kudununzika pfing'atsa kwaajili ya imbuli aila, baho komleka Imlungu. 22 Naye iyahandighwe haghati ha imisonga yuyo imunu ayula iyohulika imbuli, lekeni ukusumbukila ugima auno, na ukubugha kwa utajili kwoihinya imbuli ayo, mbaka ng'odaha kweleka matunda baye. 23 Lekeni iyahandighwe mna lidongo linoghile yuyo imunu ayula iyohulika imbuli ayo na kuielewa; kuya kakweleka ghamatunda, ayuno mia imwe, na ayuno sitini, na yungi selathini."

24 Kawalongela keli mfano ghungi, kalonga, "Ufalume wa kulanga weghala na imunu yahandile mbeghu inoghile mna ghumghunda ghwake. 25 Lekeni iwanu hawawasile, aduwi yake katsa, kahanda imisinde mghati mwa ingano, kuya koka. 26 Ingano hayotile na kwandusa ukweleka, imisinde nayo yoneka mna ingano. 27 Iwatumwa wake imwenyekaye wamghendela wamlongela, ‘Ghwe mtwatsa, apfi ng'uhandile mbeghu inoghile baye mna ghumghunda ghwako? Lelo imisinde liipatile kulawa kwani?’ 28 Kawedika, ‘Aduwi yuyo iyatendile apfo.’ Iwatumwa wake wamghutsa, ‘Pfihi kwobama tughende tukaing'ole?’ 29 Kalonga, ‘Baye,’ kwaapfila hamng'ola imisinde, mtsoing'ola hamwe na ingano. 30 Pfilekeni pfose pfikule hamwe mbaka ghumsimu ghwa ukupfuna, aho nitsowalongela awala iwopfuna, ‘Tanu mkunge imisinde, muyohe makinzamakinza mkaghasome, lekeni ingano muikunge mkayike mkano mwangu.’"

31 Kawalapfila mfano ghungi, kalonga, "Ufalume wa kulanga weghala na imbeghu ya haradali, iyasolile imunu na kuihanda mumghunda mwake; 32 nayo ndodo kubita mbeghu tsose; lekeni ing'amela, yakuwa ng'ulu kubita imimeya yose ya kumghunda, yakuwa mbiki; mbaka wapfideghe iwali mlanga wakutsa, wotsenga pfibali mna ghamaputila ghake."

33 Yesu kawalongela keli mfano ghungi, "Ufalume wa kulanga weghala na hamila iyasolile ipinga na kuihanganya mna pishi ndatu tsa usaghe, mbaka wose usasa."

34 Agho ghose Yesu kaghulongela ghumtingano kwa mifano, wala bila mfano ng'alongile nawo chinu chochose baye; 35 ili litimile alila liyalongile nabii, kulonga,

"Nitsofumbula ghumlomo ghwangu kwa mifano;

Nitsoghalonga aghala ighapfisike kulawa isi hayanduse kuwa baho."

36 Kuya Yesu kaghuwagha ghumtingano ghwa iwanu, kengila mng'anda; wanafunzi wake wamghendela, wamlongela, "Tulongele ghumfano ghwa imisinde kuna ghumghunda ghulangulitsa choni."

37 Kawedika, "Iyohanda tsimbeghu tsinoghile Mwana wa Adamu; 38 Ghumghunda yiyo isi; tsimbeghu tsinoghile, iwana wa ufalume; na imisinde, iwana wa ayula Yehile; 39 iaduwi iyaihandile, Setani; ghamapfuno, utsighilo wa iduniya; na awala iwopfuna, wamalaika. 40 Apfo kama apfila imisinde pfaikungighwa na kulakatsighwa mmoto, pfipfo pfaitsakuwa mna utsighilo wa iduniya. 41 Imwana wa Adamu katsowatuma malaika wake, wawakunge kulawa mna ufalume wake awala wose iwohonza wayawo watende nzambi, na awala iwotenda ghehile. 42 Nawo watsowatupa mna ghumoto; na ako kutsakuwa na chililo na kughegheda ghamatsino. 43 Ichipindi acho iwanu wanoghile watsong'ala kulonga litsuwa mna ufalume wa Aba wawo. Yana ghamaghutwi, yahulike.

44 "Ufalume wa kulanga weghala na hatsina ipfisike mna ghumghunda, na imunu hayonile, kaipfisa; na kwa ndeng'elelo ng'ulu iyali nayo kaghenda kautsa pfinu pfose pfayali napfo, kaghughula ghumghunda aghula.

45 "Pfipfila ufalume wa kulanga weghala na mchulutsi iyobama lulu inoghile; 46 naye hayonile lulu imwe ya bei ng'ulu, kaghenda kautsa pfinu pfose pfayali napfo, kaighula.

47 "Pfipfila ufalume wa kulanga weghala na nyapfu yasighwe mna ibahari, ikunga somba wa chila namna. 48 Haimemile, waikwegha mbaka kuna ufukwe wa ibahari, wakala hasi na kusaghula wasomba, iwanoghile waweka mpfiseghe, awala iwehile wawatupa kutali. 49 Apfo pfipfo pfaitsakuwa mna utsighilo wa iduniya; malaika watsakutsa na kuwabaghula awala iwehile na kuweka kutali kulawa awala wana ihaki; 50 na kuwasa mna litanulu lya ghumoto; na ako kutsakuwa na chililo na kughegheda ghamatsino."

51 Yesu kawaghutsa, "Apfi mwoghamanya aghano ghose?"

Wamwidika, "Ona."

52 Naye kawalongela, "Apfo chila mwandishi iyalangulitsighwe ghamahala gha ufalume wa kulanga keghala na imunu yana ing'anda, iyolapfa kulawa mna ihatsina yake ipfinu pfa sambi na pfa ghumwande."

53 Yesu hayamalitse ukuwalongela imifano aino, kalawa koka hanu aho, 54 koya ukaye yake, kawalangulitsa mna lisinagogi lyawo; na hawamhulike wakangawala, weghutsa, "Apfi yaipatile kwani ihekima aino na imiujitsa aino? 55 Ayuno si imwana wa iselemala baye? Mamo wake si Mariya baye? Na ndughu tsake si tsina Jakobu, Yosefu, Simoni na Yuda baye? 56 Na lumbu tsake wose ng'awalibaha na twetwe baye? Lelo yaghapatile kwani aghano ghose?" 57 Apfo wambetsa. Lekeni Yesu kawalongela, "Nabii ng'oleka kupata heshima baye, ila mna isi yake, na mkaye yake imwenyegho." 58 Apfo ng'atendile miujitsa mingi baye ako, kwaapfila ng'awamtoghole baye.