1 Mna isaa aila wanafunzi wamghendela Yesu, wamghutsa, "Munu yuhi iyali mkulu mna ufalume wa kulanga?" 2 Yesu kamkema mwana yumwe mdodo, kamwika haghati hawo, 3 kalonga, "Nomlongelani ghendo, ka ng'amghaluka baye mghati mwenu na kwighala na iwana iwadodo, ng'amtsakwingila ghendo baye mna ufalume wa kulanga. 4 Apfo munu wowose iyehulumsa imwenyegho yawe ka imwana ayuno, ayo yuyo iyali mkulu mna ufalume wa kulanga. 5 Na munu wowose iyombokela imwana mdodo kama ayuno kwa taghwa lyangu, ayo konibokela nene.

6 "Lekeni munu wowose iyomhonza yumwe wa iwana wadodo awano iwonitoghola nene yatende nzambi, ng'apfu yohighwe libwe likulu lya ukusaghila msingo na yasighwe mwibahali kuna ghamatsi ighaghendese.1. Iwanu weli wosaghila libwe lyo ukusaghila 7 Isi yose itsoghaya kwaajili ya aghala ighowahonza iwanu waghise ukutoghola kwao! Mana agho ighohonza iwanu ghatsolawila ghendo, lekeni katsoghaya imunu ayula iyoghatenda ghalawile!

8 "Ka ghumoko ghwako au ghumghulu ghwako ghwokuhonza utende ighehile, ughugane ughwase kutali naghwe. Ng'apfu wingile mna ugima wa ghamatsuwa ghose ing'aghohupa akuno kuhungukighwa na ghumoko au ghumghulu, kubita kuwa na ghamoko meli na maghulu meli na kwasighwa mna ghumoto ghwa ghamatsuwa ghose ing'aghohupa. 9 Inenge yako ing'akuhonza utende ighehile, uing'ole uyase kutali naghwe! Ng'apfu wingile mna ugima wa ghamatsuwa ghose ing'aghohupa aku kuna nenge imwe kubita kuwa na nenge mbili na kwasighwa mna ghumoto.

10 "Mwalangitse mleke kumbetsa yumwe wa iwana wadodo awano, kwaapfila, nomlongelani wamalaika wawo ako kulanga matsuwa ghose wa hambele ha Aba wangu iyali kulanga. 11 Kwaapfila Imwana wa Adamu katsa kuwakombola awala iwaghile.

12 "Mkonatse? Ka munu kana ng'olo mia imwe, kuya yumwe kagha, apfi ng'atsowaleka baye awala tisini na tisa mpfidunda na kughenda yakambame ayula iyaghile? 13 Na yang'amwona, nomlongelani kweli ghendo, katsomdeng'elela ng'ani ayo kubita awala tisini na tisa ing'awaghile. 14 Pfipfo, ng'apfinogha baye hambele ha Aba wenu iyali kulanga yumwe wa iwadodo awano yaghe.

15 "Ndughu yako yang'akutendela totso, ughende ukamkanye totso lyake, ghweghwe na yeye mliyeka. Yang'akutegheletsa, kumpata ndughu yako. 16 Lekeni yang'alema kukutegheletsa, msole munu yumwe au weli hamwe naghwe, ili ‘kwa wakalangama weli au wadatu chila ghomba lilamlighwe,’ kama apfila Ghamaandiko ighelile pfagholonga. 17 Na yang'alema kuwategheletsa awo ulilongele likanisa, na kama pfipfila kalema kulitegheletsa likanisa, mleke kuna ghweghwe yawe ka imunu ing'ammanyile Imlungu na imtotsa kodi.

18 "Nomlongelani kweli ghendo, ghoghose ghamtsofunga muisi ghatsakuwa ghafungiighwa kulanga, na ghoghose ghamtsodohola muisi, ghatsakuwa ghadoholighwa kulanga.

19 "Nomlongelani keli, kweli ghendo, wabili wenu wang'epatana muisi mna chinu chochose chawatsolomba, Aba wangu iyali kulanga katsowatendela ichinu acho. 20 Kwaapfila hawali wanu weli au wadatu wetingana kwa litaghwa lyangu, nene nabaho hamwe nao."

21 Kuya Petiri kamghendela, kamghutsa, "Ghwemtwatsa, apfi ndughu yangu yanitendele matotso mala ngapi, na nene nimleghusile? Hata mala saba?"

22 Yesu kamwidika, "Sikulongela hata mala saba baye, ila hata saba mala sabini, 23 kwa ajili ayo, ufalume wa kulanga weghala na mfalume yumwe iyabamile kukaghula tsisendi tsake kuna iwatumwa wake. 24 Hayanduse ukupeta, wamghalila imunu yumwe iyang'ali yomdai talanta elufu kumi. 25 Naye hayakalile kahela chinu cha ukuliha, imtwatsa kalaghitsa yautsighwe, yeye, imwehe wake, na iwanaghe, na pfose pfayalinapfo, ili yalihe lideni alila. 26 Baho imtumwa ayula kamwinamila hasi hambele hake, kalonga, ‘Unidudumile, na nene nitsokuliha chila chinu.’ 27 Imtwatsa kamwonela libatsi imtumwa ayula, kamlekelela, kamleghusila lideni alila.

28 "Lekeni imtumwa ayula koka, kuya kamwona mtumwa miyaghe iyang'ali yomdai dinari miya imwe, kamghogha kamkwida ilumelo, kamlongela, ‘Unilihe sendi tsangu!’ 29 Imtumwa miyaghe keghwisa hasi hambele hake, kamlomba, kalonga, ‘Unidudumile, nitsokuliha tsose.’ 30 Lekeni yeye kalema, kaghenda kumwasa mchifungo, mbaka hayatsoliha lideni alila. 31 Iwatumwa wangi hawonile achila ichilawile, wasing'inika ng'ani, waghenda kumlongela imndewa wao chila chinu ichilawile. 32 Baho imndewa wake kamkema, kamlongela, ‘Ghweghwe mtumwa wihile, nikuleghusila lideni alila lyose, haunidedetse, 33 hebai ghweghwe ng'umwonele baye libatsi imtumwa miyagho kama nene pfanikwonele libatsi ghweghwe?’ 34 Apfo imndewa wake kona maya ng'ani, kamghela mchifungo, yadununzighwe mbaka hayatsoliha lideni lyose liyodaighwa."

35 "Apfi pfifo Aba wangu iyali kulanga pfayatsomtendelani mwemwe, ana ng'amuwaleghusila wandughu tsenu ghamatotso ghawo kulawa mna imimoyo yenu."