1 Mna ghamatsuwa agho, mfalume Herodi kahulika tsimbuli tsa Yesu; 2 naye kawalongela iwatumishi wake, "Ayo Yohana Mbatitsa, katsihiluka kulawa kuna lifwa; lelo tsingupfu atso tsosang'ana mghati mwake."

3 Kwaapfila Herodi tsakamghogha Yohana, kamwoha na kumwika mchifungo, kwaajili ya Herodiya, mwehe wa Filipi, indughu yake; 4 kwaapfila Yohana tsakamlongela Herodi, "Ng'apfinoghile baye ghweghwe kumkwela ipinga ayo!" 5 Herodi yang'ali yobama yamkome Yohana, lekeni yang'ali yopfuka iwanu, kwaapfila tsawamwona kuwa nabii.

6 Mna ichihungo cha ukwelekighwa kwake Herodi, neghe Herodiya kabigha hambele ha iwanu, kamnoghelesa Herodi, 7 mbaka kamlongela kwa kwilaha kuwa katsomwing'a chochose chayolomba!

8 Naye aku kokomangitsighwa na mai wake, imwana ayo kalonga, "Ungaye bahano mlungo litwi lya Yohana Mbatitsa." 9 Mfalume kasing'inika ng'ani, lekeni kwaapfila tsakelaha hambele ha iwagheni wake iwang'ali wakuja ichijo hamwe naye, kalaghitsa yeng'ighwe; 10 apfo kalaghitsa Yohana yaganighwe litwi ukula kuna ligeletsa. 11 Litwi lyake lighalighwa mlungo, keng'ighwa i mndele ayo, naye kamghalila mamo wake. 12 Wanafunzi wake waghenda walusola ilukuli lwake, walutsika; kuya waghenda wamlongela Yesu imbuli ayo.

13 Yesu hayahulike achila ichilawile, kalawa hanu aho koka kwa mnumbwi, yaliyeka, kaghenda hanu halihela wanu. Na ghumtingano ghwa iwanu hawahulike, wamuwinza kwa maghulu kulawa mna imiji yawo. 14 Hayahulumke mna ghumnumbwi, kona mtingano mkulu ghwa iwanu, kawonela libatsi, kawahonya iwaghonzwa wawo.

15 Nemihe haipfikile, wanafunzi wake wamghendela, wamlongela, "Hanu ahano nyika iliyeka, na litsuwa liswa, lelo uwaleke iwanu woke waghende mna ipfijiji wakeghulile ipfijo waje." 16 Lekeni Yesu kawalongela, "Ng'awobamighwa woke baye, weng'eni mwemwe ichijo waje."

17 Wamwidika, "Ahano ng'atuna chinu baye, ila pfighate pfitano pfiliyeka, na somba weli."

18 Naye kawalongela, "Ngalileni ahano ipfinu apfo." 19 Kuya kawalaghitsa iwanu wakale hasi mna imitsani. Kasola ipfighate apfila pfitano na wasomba weli, kalola kulanga, kapfibaliki; kapfibena ipfighate apfila, kaweng'a wanafunzi wake, nawo wawagholela iwanu. 20 Iwanu wose waja, weghuta. Na iwanang'ina wake wadondola ipfighate ipfisighale, wamemesa kapo tsimemile kumi na mbili. 21 Nawo iwajile tsawang'ali wopfika wamale elufu tano, bila kupeta wapinga na iwana.

22 Kuya kawananahitsa wanafunzi wake wadine mna ghumnumbwi wamlongolele kuloka kumwambu, yeye hayang'ali yowagha ghumtingano. 23 Hayamalitse ukuwagha ghumtingano, kagheluka kuchidunda yaliyeka kughenda kulomba. Nemihe haipfikile, kakala kuko yaliyeka. 24 Na ghumnumbwi mala tsaghupfika kutali na ufuo wa ibahari, ghwotowighwa na ghamawimbi, kwaapfila tsakukala na beho lyoduma.

25 Haipfikile nzamu ya kane ya ichilo, habehi na ukucha, Yesu kawaghendela, aku koghenda kwa maghulu mchanya mwa ghamatsi. 26 Wanafunzi wake hawamwonile koghenda mchanya mwa ibahari, wapfuka, walonga, "Mtsimu!" Wadamilila kwa kupfuka.

27 Lekeni bahala, Yesu kawalongela, "Mhole ghumoyo, ambe nene! Mleke kupfuka!"

28 Petiri kamwidika, "Ghwemtwatsa, ana uli ghweghwe, nilaghitse nitse kuna ghweghwe mchanya mwa ghamatsi." 29 Kamlongela, "Itsa!"

Petiri kahulumka mna ghumnumbwi, kaghenda mchanya mwa ghamatsi kumghendela Yesu. 30 Lekeni hayonile libeho pfaliduma, kona wogha, kandusa kutsama; kadalamka kalonga, "Ghwemtwatsa, nilopole!"

31 Bahala Yesu kagholosa ghumoko ghwake, kamkinda; kamlongela, "Ghweghwe munu yuna imani ndodo, hebari upfuka?"

32 Nawo hawadinile mna ghumnumbwi, libeho lileka ukuduma. 33 Na awala iwakalile mna ghumnumbwi, wamwinamila, walonga, "Kweli ghendo, ghweghwe kwa Imwana wa Imlungu."

34 Hawalokile litsimbu wapfika kuna isi ya Genesareti. 35 Na iwanu iwali mna isi aila hawamtangile Yesu, watsenetsa mbuli tsake mna isi tsose tsili habehi, apfo wamhilikila wose iwakalile watamu; 36 na wamlomba wadonze hela imindo ya ligwanda lyake. Na wose iwalidonzile wahona ghendo.