1 Yesu hayamalitse ukulonga ghamalangulitso agho, kalawa kuna isi ya Galilaya kaghenda kuna isi ya Yudeya, kumwambu kwa ghumto Yoridani. 2 Kingili kulu lya wanu limkoleletsa, naye kuko kawahonetsa.

3 Na Mafarisayo wamghendela Yesu wamghetse, wamghutsa, "Pfihi pfinogha imlume kumleka mwehe wake kwa mbuli yoyose?" 4 Naye Yesu kawedika, kalonga, "Pfihi ng'amsomile baye pfayandikighwe mna Ghamaandiko ighelile, ka yeye iyawaumbile aho mwanduso tsakawaumba munu mmale na munu pinga, 5 na kalonga, ‘apfo, immale katsomleka aba wake na mai wake, katselunga na imwehe wake, nawo weli watsakuwa lukuli lumwe?’ 6 Apfo ng'awatsakuwa weli keli baye, ila lukuli lumwe. Apfo chiyalumbile Imlungu, imunu yaleke kuchighola."

7 Wamghutsa, "Hebali lelo Musa tsayalaghitse immale yamwing'e mwehe wake hati ya talaka yamleke?"

8 Kawedika, "Musa kamwing'eni luhusa muwaleke wehe wenu kwaapfila imimoyo yenu mikomu, lekeni ng'aiwile apfo kulawa mwanduso baye. 9 Lekeni nomlongelani mwemwe, munu wowose iyomleka imwehe wake kwa ghomba ing'alili lya ughoni, na kukwela pinga yungi, ayo kotenda nzambi ya ughoni."

10 Wanafunzi wake wamlongela, "Ka apfo pfipfo pfaili kwa imlume na mwehe wake, ng'apfu kuleka kukwelela."

11 Yesu kawedika, "Si wanu wose baye iwodaha kulibokela lilonga alino, ila awala waliyeka iweng'ighwe na Imlungu. 12 Kwaapfila kuna wanu tangu pfawelekighwe si wa kukwela baye, na wamwenga wasweyulighwa na iwanu waleke ukukwela, lekeni wamwenga wesweyula iwenyegho kwaajili ya ufalume wa kulanga. Iyodaha kulibokela lilonga alino, leka yalibokele."

13 Kuya wanu wangi wamghalila Yesu iwana wadowado yawekile ghamoko yawalombele, lekeni wanafunzi wake wawakembela iwanu awo. 14 Lekeni Yesu kalonga, "Walekeni iwana wadowado watse kuna nene, mleke kuwaghoma, kwaapfila ufalume wa kulanga wa iwanu iwali kama iwana awano." 15 Kawekila ghamoko, kuya koka hanu aho.

16 Munu yumwe kamghendela Yesu kamghutsa, "Mlangulitsi, angu nene nitende chinu chachi ichinoghile ili niubokele ugima wa ghamatsuwa ghose ing'aghohupa?"

17 Yesu kamwidika, "Hebali unighutsa imbuli ya ichinu ichinoghile? Hana mnu yumwe yaliyeka iyanoghile. Lekeni ung'abama kwingila mna ugima, ghakinde ghamalaghitso."

18 Imunu ayula kamghutsa, "Ghamalaghitso ghahi?" Yesu kamwidika, "Aghano, uleke kukoma, uleke kutenda ughoni, uleke kwiba, na uleke kulapfa ukalangama wa ughutsu, 19 uwaheshimu baba wako na mamo wako, umkunde miyagho kama pfawikunda ghumwenyegho."

20 Imbwanga ayula kamlongela, "Aghano ghose nighakinda, nihungukighwe na choni lelo?" 21 Yesu kamwidika, "Ung'abama kuwa munu yatimilike, ughende ukautse ipfinu pfako pfose pfauli napfo, uweng'e tsisendi iwahingwa, naghwe kutsakuwa na hatsina kulanga, kuya utse uniwinze." 22 Imbwanga ayula hayahulike apfo, koka kwa hutsuni, kwaapfila tsakana mali nyingi.

23 Kuya Yesu kawalongela iwanafunzi wake, "Nomlongelani ukweli ghendo, itsakuwa pfikomu kwa tajiri kwingila mna ufalume wa kulanga. 24 Nomlongelani keli, yapfibewe kwa ingamiya kwingila mna lilanga lya ishindano, kubita imunu tajiri ukwingila mna ufalume wa Imlungu."

25 Wanafunzi hawahulike apfo, wakangawala ghendo, wamghutsa, "Lelo yuhi iyodaha ukukombolighwa?" 26 Yesu kawatsodolela tsinenge, kuya kawalongela, "Kwa imwanadamu ichinu achino ng'achidahika baye, lekeni kwa Imlungu ghose ghodahika."

27 Baho, Petiri kalonga, "Lola, twetwe tuleka pfinu pfose tukuwinza ghweghwe, lelo tutsopata choni?" 28 Yesu kawalongela, "Nomlongelani kweli ghendo, mna ulimwengu ukutsa, Imwana wa Adamu hayatsokala mna ichighoda cha utunitso wake, mwemwe imniwinzile nene pfipfila mtsokala mna pfighoda kumi na pfili, kughatawala makabila kumi na meli gha Isiraeli. 29 Na imunu wowose iyalekile tsing'anda, au kaka tsake, au lumbu tsake, au aba wake, au mai wake, au iwanaghe, au imighunda yake kwaajili yangu, ayo katsobokela mala kumi, na katsohala ughima wa ghamatsuwa ghose. 30 Lekeni awala wa mwanduso watsakuwa wa utsighilo, na wautsighilo watsakuwa wamwanduso.