1 Kuya Yesu kaghelusighwa na Iloho Yelile mbaka kunyika yakaghetsighwe na Iyehile. 2 Naye kafunga ukuja kwa matsuwa alubaini chilo na misi, kuya hambele tsakona nzala. 3 Baho Imghetsa kamghendela, kamlongela, "Kwaapfila ghweghwe kwa Imwana wa Imlungu, ghalongele ghamabwe aghano ghawe pfighate."

4 Naye kedika, kalonga, "Yandikighwa apfino, ‘Imunu ng'atsokala mgima kwa chighate chiliyeka baye, ila kwa chila longa ililawa mumlomo mwa Imlungu.’ "

5 Kuya Iyehile kamsola mbaka kuna ghumji ghwelile, Yerusalemu, kamwika kusa kwa ghumnala ghwa lihekalu. 6 Kuya kamlongela, "Kwaapfila ghweghwe kwa Imwana wa Imlungu, wiyase hasi, mana yandikighwa,

‘Katsokulaghitsila wamalaika wake,

nawo watsokusola mna ghamoko ghawo,

uleke kwikwala ghumghulu ghwako mna libwe.’ "

7 Yesu kamwidika, "Pfipfila yandikighwa, ‘Uleke kumghetsa Imtwatsa Imlungu wako.’ "

8 Kuya Setani kamsola keli mbaka kuna ichidunda chitali ng'ani, kamlangusa falume tsose tsa isi na ifahali yake, 9 na kamlongela, "Ung'enama hambele hangu na kuniabudu, nitsokwing'a ghweghwe aghano ghose."

10 Yesu kamlongela, "Uka Setani! Kwaapfila yandikighwa, ‘Umuabudu Imtwatsa Imlungu wako, na umtumikile yeye yaliyeka!’ " 11 Kuya Setani kamleka Yesu, na wamalaika watsa wamtumikila.

12 Yesu hayahulike Yohane wamwika mchifungo, koka kaghenda Galilaya; 13 kalawa Nazareti, kaghenda kukala Kaperinaumu, mji ghuli mwani mwa litsimbu lya Galilaya, na ghwibakane na isi ya Zabuloni na isi ya Naftali. 14 Alino litendeka ili chitimile achila chayalongile nabii Isaya,

15 "Isi ya Zabuloni na isi ya Naftali,

inzila ya ibahari,

kumwambu kwa Yoridani,

Galilaya ya iwanu iwali si Wayahudi!

16 "Iwanu iwokala mchisi

wona mwanga mkulu;

Nawo awala iwakalile mna isi ya ichimbeho cha lifwa

mwanga ghuwamwemwesela."

17 Kulawa ichipindi acho Yesu kanza kuwatangatsila iwanu, kulonga, "Mtubu, kwaapfila ufalume wa mbinguni wahabehi."

18 Yesu hayang'ali yakwanga mmbalimbali mwa litsimbu lya Galilaya, kawona ndughu weli, Simoni iyakemighwe Petiri na ndughu yake Andereya, wakwasa ilwapfu mghati mwa litsimbu, mana wawo tsawalowa somba. 19 Kawalongela, "Mniwinze, nani nitsowatenda muwe walowa wanu." 20 Bahala watsileka tsinyapfu tsawo, wamuwinza.

21 Hayaghendile hambele chidogho, kawona ndughu wangi weli, Jakobu imwana wa Zebedayo, na Yohane ndughu yake. Tsawakala mna ghumnumbwi hamwe na Sebedayo baba yawo, wotengenetsa tsinyapfu tsawo, naye kawakema. 22 Bahala waghuleka ghumnumbwi na aba wawo, wamuwinza.

23 Naye yang'ali yakwanga Galilaya yose, akuno kolangulitsa mna ghamasinagogi ghawo, na kutangatsa Imbuli Inoghile ya Ufalume wa Imlungu, na kuwahonya iwanu maghonzwa ghose na matamu ghose. 24 Mbuli tsake tsenela mna isi yose ya Siriya, apfo iwanu wamghalila iwatamu wose, iwoghula utamu wowose, awala iwodununzika, wana ipfinyamkela, iwakufa chisala, na awala iwaholole, naye kawahonya. 25 Na iwanu makingiri kwa makingiri wamuwinza kulawa Galilaya, isi ya Dekapoli, Yerusalemu, Yudeya, na isi ili kumwambu mwa ghumto ghwa Yoridani.