1 Mafarisayo na Masadukayo wamghendela Yesu, wamghetsa kwa kumlomba yawonese chitango kulawa kulanga. 2 Yesu kawedika, kalonga, "Litsuwa halikuswa, mwolonga, ‘Kutsonogha, kwaapfila kulanga kudung'u.’ 3 Na nemitondo mwolonga, ‘Leloli kutsakuwa na nyahemu, kwaapfila lilanga dung'u na libingu litegha.’ Mwodaha ukutanga kulanga pfakuli, lekeni ng'amdaha baye ukumanya ipfitango pfa ghamatsuwa aghano gha utsighilo. 4 Lweleko lwihile na ing'aluamini, lwobama chitango! Lekeni ng'alutsakwing'ighwa chitango baye, ila achila ichitango cha Yona." Kuya kawaleka, koka.

5 Wanafunzi wake waloka kumwambu mwa litsimbu, nawo tsawesemwa ukusola pfighate. 6 Yesu kawalongela, "Mwalangitse, mwilolese na ihamila ya Mafarisayo na Masadukayo."

7 Wandusa ukwighutsa iwenyegho kwa iwenyegho, kulonga, "Kolonga apfino kwaapfila ng'atughalile pfighate baye."

8 Naye Yesu katanga achila chawang'ali wolonga, apfo kawaghutsa, "Hebari mwilongalonga muwenyegho, mwemwe yamna imani ndodo, kwaapfila mwahela pfighate? 9 Angu ng'ana mmanye baye? Pfihi ng'amkumbuka baye ipfighate apfila pfitano kwa iwanu elufu tano, na pfikapo pfingapi pfa ipfihande ipfisighale? 10 Na ipfighate apfila saba kwa iwanu elufu nne, na pfikapo pfingapi ipfisighale? 11 Hebali ng'ammanya ka sing'ali nilonga mbuli tsa ipfighate baye, hanilongile, Mwilolese na ihamila ya Mafarisayo na Masadukayo."

12 Baho hawamanyile ka tsang'awalongele welolese na ihamila ya ipfighate baye, ila na ghamalangulitso gha Mafarisayo na Masadukayo.

13 Yesu kaghenda kuna isi ya Kaisariya Filipi, ako kawaghutsa iwanafunzi wake, kalonga, "Apfi iwanu wolonga Imwana wa Adamu yali nani?" 14 Wamwidika, "Wanu wangi wolonga Yohana Mbatitsa, wangi Eliya, wangi Yeremiya au yumwe wa manabii."

15 Kawaghutsa, "Na mwemwe, mwolonga nene nili nani?"

16 Simoni Petiri kamwidika, kalonga, "Ghweghwe kwa Kiristu, Imwana wa Imlungu iyali na ugima!"

17 Yesu kamwidika, kalonga, "Kubweda ghweghwe Simoni, mwana wa Yona, kwaapfila ilukuli na idamu ng'apfikughubulile alino baye, ila Aba wangu iyali kulanga. 18 Na nene nokulongela, ghweghwe kwa Libwe, na mchanya mwa libambalawe alino nitsolitsenga likanisa lyangu, na ghamalango gha kutsimu ng'aghatsodaha kulihinya baye. 19 Nani nitsokwing'a tsipfughulo tsa ufalume wa kulanga; chochose chautsofunga muisi chitsofungighwa kulanga, na chochose chautsodohola muisi, chitsodoholighwa kulanga."

20 Kuya kawaghoma wanafunzi wake waleke kumlongela munu wowose ka yeye yuyo Kiristu.

21 Kulawa matsuwa agho Yesu kandusa kuwalongela iwanang'ina wake mwatsimwatsi, "Nobamighwa nighende Yerusalemu na kudununzika ng'ani mna ghamoko gha iwabala na iwakulu wa iwatambika, na iwakwandika Ghamalaghitso. Kuya nitsokomighwa, lekeni mna litsuwa lya kadatu nitsotsihiluka."

22 Petiri kamsola Yesu hambalimbali kandusa kumkembela, "Baye, ghwe Mtwatsa! Agho ng'aghatsokupata baye!"

23 Yesu kahunduka, kamlongela Petiri, "Uka kuchughu kwangu, Setani! Ghweghwe kwa kwatso kuna nene, kwaapfila ghamawatso ghako si gha Imlungu baye, ila gha iwanu."

24 Kuya Yesu kawalongela iwanafunzi wake, "Munu wowose iyobama kuniwinza, yebele imwenyegho, yetwike ghumsalaba ghwake yaniwinze. 25 Kwa apfila imunu iyobama kuukombola ugima wake, katsowaghitsa, lekeni imunu iyatsowaghitsa ugima wake kwaajili yangu katsowona. 26 Apfi imunu yatsobweda choni yang'apata isi yose, lekeni kawaghitsa ugima wake? Au imunu yatsolapfa choni yaupate keli ugima wake? 27 Kwaapfila Imwana wa Imunu katsakutsa mna utunitso wa Aba wake hamwe na wamalaika wake, kuya katsomliha chila munu kwa achila chayatendile. 28 Nomlongelani kweli ghendo, 'Hana wanu wangi iwemile ahano, ng'awatsakufa baye mbaka wamwone Imwana wa Adamu kakutsa mna ufalume wake.'"