1 Yesu hayamalitse ukuwatuma wanafunzi wake kumi na weli, kalawa hanu aho kaghenda kulangulitsa na kuwapetela iwanu mna imiji yawo.

2 Lelo, Yohana iyakalile mchifungo hayahulike aghala ghayotenda Kiristu, kawatuma wanafunzi wake, 3 wamghutse, "Apfi ghweghwe kwa ayula iyakutsa, au tumlolele yungi?"

4 Yesu kawedika, kawalongela, "Ghendeni mkamlongele Yohana aghano ghamhulika na ghamkona; 5 ipfipofu wakona, ipfimbete woghenda, na wana ukoma wodeghetetsighwa, ipfitsiwi wohulika, iwafile wotsihiluka, na iwahingwa wopetelighwa Imbuli Inoghile. 6 Kabweda imunu ayula yang'ombonela nene mashaka!"

7 Iwanu iwalawile kwa Yohana hawang'ali wakuka, Yesu kandusa kuwalongela iwanu mbuli tsa Yohana, "Hamghendile kunyika, mghendile kulola choni? Lulanzi iluhighisighwa na libeho? 8 Ana si pfipfo baye, mghendile kulola choni? Imunu iyapfalile magwanda gha bei ng'ulu? Mlole, iwopfala ghamagwanda gha bei ng'ulu wokala mna tsing'anda tsa wafalume. 9 Lekeni tsahebari mlawile mkamwone nabii? Ona, nomlongelani ghendo, yeye mkulu kubita nabii. 10 Ayuno yuyo iyandikighwe aghano. ‘Lola, nomtuma msenga wangu yakulongolele; iyatsokutandila inzila yako hambele hako.’ 11 Nomlongelani ghendo, mna iwanu wose iwelekighwe na wamapinga, ng'ana yoneke munu wowose iyali mkulu kubita Yohana Mbatitsa; lekeni iyali mdodo ghendo mna ufalume wa kulanga kamkulu kubita yeye. 12 Kulawa ghamatsuwa gha Yohana Mbatitsa mbaka sambi ufalume wa kulanga wopatikana kwa ngupfu, na iwanu wana ingupfu wouboka. 13 Kwaapfila manabii wose, na Ghamalaghitso gha Musa watabiri mbaka ichipindi cha Yohana. 14 Na ana mbama ukutoghola, yeye yuyo Eliya iyalongighwe katsakutsa. 15 Yeye yana ghamaghutwi yahulike!

16 "Apfi iwanu wa ilweleko aluno niwalinga na choni? Weghala na iwana wadodo iwokala kuna lisoko, iwowakema wayawo, 17 wolonga, ‘Tuwatowela ipfimbeta, lekeni ng'ambighile baye! Tuwembila wila tsa lifwa, lekeni ng'amlomboletse baye!’ 18 Kwaapfila Yohana katsa, ng'akuja wala ng'akung'wa baye, wamlonga, ‘Kana chinyamkela!’ 19 Lelo Imwana wa Adamu katsa, yeye kakuja na kakung'wa, nawo walonga, ‘Mumlole imunu ayuno, kana basu, na mlepfi, sale yawo iwototsa ushulu na wana tsinzambi.’ Lekeni hekima yakoneka yotenda ghoya kwa tsisang'ano tsake."

20 Baho Yesu kandusa kuikembela imiji aila myatendile miujitsa yake mingi, kwaapfila ng'ailekile tsinzambi baye. 21 "Kutsochona ghweghwe Korazini! Kutsochona ghweghwe Betisaida! Kwaapfila imiujitsa itendeke kuna mwemwe ing'atendeke Tiro na Sidoni, tangu mwande ghendo wang'alekile tsinzambi tsawo kwa kupfala maghunila na kwibaka lipfu. 22 Lekeni nomlongelani ghendo, itsakuwa ng'apfu mna litsuwa lya ukuhigha kwa Imlungu kuidudumila imiji ya Tiro na Sidoni kubita mwemwe! 23 Naghwe Kaperinaumu! Apfi kwitsakwinulighwe mbaka kulanga? Baye, kutsohulumsighwa hasi mbaka kutsimu. Kwaapfila kama imiujitsa itendeke kuna ghweghwe tsaitendeka Sodoma, ghumji aghwo ghung'akalile baho mbaka leloli! 24 Lekeni nokulongela, mna litsuwa lya ukuhigha, Imlungu katsoghududumila ghumji ghwa Sodoma kubita ghweghwe!"

25 Mida yiyo Yesu kalonga, "Nokutunya ghwe Aba, Imtwatsa wa kulanga na isi, kwaapfila kuwapfisa ipfinu apfino iwanu wana ihekima na iwakengele, kuwaghubulila iwana iwadodo. 26 Ona, Baba, mana apfino pfipfo pfaikunoghele.

27 "Nying'ighwa pfinu pfose na Aba wangu. Wala haduhu iyommanya Imwana, ila Baba, na haduhu iyommanya Baba, ila Imwana; na wowose ayula Imwana iyobama kumghubulila.

28 "Mtse kuna nene, mwemwe mwose imghanzika na imdununzighwa na mitsigho mitsito, na nene nitsowatula mbwihile. 29 Mwiyohe inila yangu, mwilangulitse kuna nene, kwaapfila nene namhole, kuya na mwenyepfale wa ghumoyo, namwe mtsobwihila mna imimoyo yenu. 30 Kwaapfila inila yangu ileghela, na ghumtsigho ghwangu mbewe."Wang'ombe weli iwohighwe inila ya ukulimila msingo