1 Yesu kawakema hamwe wanafunzi wake kumi na weli, kaweng'a uwetso wa ukulapfa ipfinyamkela, na ukuhonya chila utamu na maghayo ghose. 2 Aghano ghagho ghamataghwa gha iwatumighwa kumi na weli; wa kwanza Simoni iyakemighwe Petiri, na Andereya indughu yake; Yakobu na indughu yake Yohana, iwana wa Sebedayo. 3 Filipi na Batalomayo, Tomasi, na Matei, iyakalile mtotsa uhshulu; na Yakobu imwana wa Alifayo, na Tadei, 4 Simoni Mkananayo, na Yuda Iskarioti, iyamsaliti Yesu.

5 Mitume awo kumi na weli Yesu kawatuma, kawalaghitsa, "Mleke kughenda kwa iwanu iwali si Wayahudi baye, wala kuna mji ghwoghwose ghwa Wasamariya mleke kwingila. 6 Ila mghende kwa wang'olo iwaghile wa isi ya Isiraeli. 7 Namwe hamghenda, tangatseni mlonge, ‘Ufalume wa kulanga wa habehi.’ 8 Muwahonye iwatamu, muwatsihilule iwafile, muwadeghetetse iwakoma, mlapfe ipfinyamkela. Mwemwe mbokela hela, apfo namwe mlapfe hela. 9 Mleke kusola nzahabu, wala fetsa, wala shaba mna ipfibindo pfenu; 10 Mleke kusola mkoba ghwa ghumwanza, wala magwanda meli, wala mikwabatsa, wala ing'weku ya ukwikongoja. Kwaapfila mtenda sang'ano kolihighwa iposho yake.

11 "Mna ghumji ghwoghwose au chijiji chochose chamkwingila, mbame imunu yanoghile, mkale mng'anda mwake mbaka hamtsakuka. 12 Namwe mng'engila mna ing'anda, ilamseni; 13 ana wali ghoya iwenyekaye, indamso yenu itsokala nawo, lekeni ana ng'awali ghoya baye, indamso yenu itsowoyila muwenyegho. 14 Na imunu yang'alema ukumbokelani, au ukutegheletsa ghamalangulitso ghenu, hamlawa mna ing'anda ayo, au mna ghumji aghwo, kung'useni litimbwisi lili mmaghulu mwenu. 15 Nomlongelani kweli ghendo, itsakuwa ng'apfu Imlungu kuidudumila isi ya Sodoma na Gomora mna litsuwa lya ukuhighighwa, kubita ghumji aghwo.

16 "Lolani, nene nomtumani kama ng'olo haghati ha wambwa wa kumhulo. Apfo mwobamighwa mkengele kama nzoka na muwe wahole kama njiwa. 17 Mwiyalangitse na iwanu, kwaapfila watsomghaleni mna ghamabalatsa gha imiji, na mna ghamasinagogi ghawo watsomfapulani. 18 Namwe mtsoghalighwa hambele ha maliwali na wafalume kwaajili yangu, ili muwe ukalangama kuna wawo, na kwa iwanu iwali si Wayahudi baye. 19 Lekeni hamtsoghalighwa ako, mleke kwalangula chamtsolonga choni, kwaapfila mtsakwing'ighwa cha ukulonga mna isaa yiyo; 20 mana si mwemwe baye yamlonga, ila Iloho wa Aba wenu yeye iyatsolonga mghati mwenu.

21 "Na ndughu katsomsaliti ndughu yake yakomighwe; na baba katsomsaliti imwanaghe, nawo iwana watsowasaliti baba tsawo na kuwakoma. 22 Namwe iwanu wose watsomwihilani kwaajili ya litaghwa lyangu; lekeni ayula iyatsodudumila mbaka mwisho yuyo yatsokombolighwa. 23 Hamtsodununzighwa mna ghumji aghuno, tsumileni mji ghungi; nomlongelani kweli ghendo, ng'amtsoimalitsa baye imiji ya Isiraeli ng'ana Imwana wa Adamu yatse.

24 "Mwanafunzi ng'ombita imlangulitsi wake baye; wala imtumwa ng'ombita imtwatsa wake baye. 25 Yotosha imwanafunzi kuwa kama imlangulitsi wake, na imtumwa kuwa kama imtwatsa wake. Ana wamkemile imbala wa ing'anda Belizebuli, apfi iwanu iwali mng'anda mwake ng'awatsokemighwa mataghwa ghehile ng'ani baye?

26 "Apfo mleke kuwapfuka, kwaapfila kuduhu chochose ichighubikighwe, ing'achitsoghubulighwa; wala ichipfisike ing'achitsomanyika. 27 Achila chanimlongelani mchisi, mwemwe chilongeni mna ghumwanga; na achila chamhulika mchpfiso, mwemwe chidalamkeni mchiswili. 28 Mleke kuwapfuka awala iwokoma ilukuli lekeni ng'awodaha baye kuikoma iloho; ila mumpfuke ayula iyodaha kupfihinya pfose, ilukuli hamwe na iloho mna ghumoto ghwa jehanamu. 29 Apfi sangalala weli ng'awoutsighwa kwa tobole limwe baye? Wala hata yumwe ng'olaghala hasi baye bila Aba wenu kumanya. 30 Lekeni mwemwe, hata tsimvili tsili mwitwi mwenu tsose tsipetighwa. 31 Apfo mleke kupfuka; mwemwe mwachinu chikulu ng'ani kubita wasangalala wengi!

32 "Apfo chila munu iyonitoghola nene hambele ha iwanu, na nene pfipfila nitsomtoghola hambele ha Aba wangu iyali kulanga. 33 Lekeni munu wowose iyonibela nene hambele ha iwanu, na nene nitsombela hambele ha Aba wangu iyali kulanga.

34 "Mleke kupfikitsa nene nitsa kuwatenda iwanu watseghembale muisi. Mbe! Sitsile kuwatenda iwanu watseghembale baye, ila nighala lipanga. 35 Kwaapfila nitsa kuwatenda wesonge, imunu na aba wake, ineghe na mai wake, mwalipfala na mwalipfala wake. 36 Na iwanu wehile wa imunu watsakuwa iwanu wa mkaye yake.

37 "Iyomkunda aba wake au mai wake kubita nene, ayo si wangu baye; wala iyomkunda imwanaghe au ineghe wake kubita nene, ayo si wangu baye. 38 Na imunu yang'osola ghumsalaba ghwake na kuniwinza, ayo ng'odaha kuwa wangu baye. 39 Imunu iyobama kuukindilitsa ugima wake katsowaghisa, lekeni iyouhinya ugima wake kwaajili yangu nene, ayo katsoupata.

40 "Ayula iyombokelani mwemwe, konibokela nene, na ayula iyonibokela nene, kombokela ayula iyanitumile. 41 Iyombokela inabii kwaapfila nabii, ayo katsobokela liho lya nabii; naye iyombokela imunu yana ihaki kwaapfila kana haki, ayo katsobokela liho lya imunu yana ihaki. 42 Na munu wowose iyatsomwing'a hata chikombe cha ghamatsi ighopfegha yumwe wa iwadodo awano kwaapfila ayo koniwinza nene, nomlongelani kweli ghendo, liho lyake ng'alitsakwagha baye."