1 "Mleke kuwahigha iwanu wangi, hela namwe mtsohighighwa, 2 mana apfila pfamuwahigha iwanu wangi, pfipfo namwe pfamtsohighighwa; na ichipimo champimila, chicho iwanu chawatsompimilani mna ukuwahigha mwemwe. 3 "Heule ulola ilupfulu luli mnenge mwa ndughu yako, lekeni ng'ulyona baye libiki lili mnenge mwako ghumwenyegho? 4 Au udahatse kumlongela ndughu yako, ‘Uleke nikulapfe ilupfulu luli mnenge mwako,’ aku mnenge mwako ghumwenyegho mna biki? 5 Kwa mng'enye ghweghwe! Tanu yandusa kulapfa libiki lili mnenge mwako, kuya kutsodaha kulola na kwona ghoya ulapfe ilupfulu luli mnenge mwa ndughu yako.

6 "Mleke kuweng'a wambwa achila ichelile; wala mleke kwasa tsilulu tsenu hambele ha wangubi; hela watsotsibajugha kwa ghamaghulu ghawo, kuya wamhundukileni na kumdatsulani.

7 "Mlombe, namwe mtsakwing'ighwa, mbame namwe mtsopata, mtowe hodi, namwe mtsopfughulighwa. 8 Kwaapfila chila munu iyolomba kobokela, naye iyobama kopata, na ayula iyotowa hodi katsopfughulighwa. 9 Au munu wachi mna mwemwe, imwanaghe yang'amlomba chighate, komwing'a libwe? 10 Au yang'amlomba somba, komwing'a inzoka? 11 Lelo kama mwemwe yamwihile mwomanya ukuweng'a iwanenu nzawadi tsinoghile, angu Aba wenu iyali kulanga ng'atsolumbilitsa baye kuweng'a nzawadi tsinoghile awala iwomlomba? 12 Apfo chochose chambama iwanu wamtendeleni, na mwemwe watendeleni pfipfo; kwaapfila acho chicho Itorati ya Musa na ipfitabu pfa manabii pfachilonga.

13 "Mwingile kwa kubitila lilango sisili; kwaapfila lilango lya ukwingilila kutsimu ghatsi, na inzila ighenda ako pfipfila ghatsi; na iwanu wengi ng'ani iwakwingila kwa kubitila inzila ayo. 14 Lekeni lilango lyasisili, na inzila ilongotsa kuna ugima pfipfila yasisili; na iwanu iwoyona inzila ayo wachidogho ghendo.

15 "Mwalangitse na manabii wa ughutsu; iwomtsilani akuno wapfala magwanda gha ng'olo, lekeni mghati mwawo weghala na wambwa wakali wa kumhulo. 16 Mtsowatanga kwa ghamatunda ghawo. Angu tsa iwanu wabawagha nzabibu mna imiba, au wabawagha tini mna imichongoma? 17 Pfipfo, chila mbiki ghunoghile ghwakweleka matunda ghanoghile, lekeni mbiki ghwihile ghwakweleka matunda ghehile. 18 Mbiki ghunoghile ng'aghudaha kweleka matunda ghehile baye; wala mbiki ghwihile ng'aghudaha kweleka matunda ghanoghile baye. 19 Chila mbiki ing'aghukweleka matunda ghanoghile ghwoganighwa na kwasighwa kuna ghumoto. 20 Apfo, kwa ghamatunda ghawo, mtsowatanga manabii wa ughutsu.

21 "Si chila imunu iyonikema ‘Mndewa, Mndewa,’ yatsakwingila mna ufalume wa kulanga; ila ayula iyotenda aghala ghayobama Aba wangu yali kulanga. 22 Mna litsuwa alila lya ukuhighighwa iwanu, wengi watsonilongela, ‘Mndewa, Mndewa! Pfihi kwa taghwa lyako ng'atutabiri baye, na ng'atulapfile iwanu ipfinyamkela baye kwa taghwa lyako, na kutenda miujitsa mingi kwa taghwa lyako?’ 23 Baho nene nitsowalongela mwatsi mwatsi ghendo, ‘Mbe! Mwemwe tsasimmanyileni ghendo baye. Mlawe kuna nene mke, mwemwe imtenda ighehile!’

24 "Apfo munu wowose iyotegheletsa ghamalonga ghangu aghano na kughatenda, ayo keghala na imunu iyakengele, yatsengile ing'anda yake mchanya mwa libambalawe. 25 Imvula itowa, ghamatsi ghamema; libeho liduma, liitowa ing'anda aila; lekeni ng'aighwile baye, kwaapfila ilukwalambatsa lwake tsalutsengighwa mna libambalawe.

26 "Lekeni chila munu iyotegheletsa ghamalangulitso ghangu aghano na kuleka kughatenda, ayo keghala na imunu mbotsi, iyatsengile ing'anda yake mna ghumsanga. 27 Imvula itowa, ghamatsi ghamema, libeho liduma liitowa ing'anda aila, nayo ighwa hasi, puuu!"

28 Yesu hayamalitse ukulonga agho ghose, ghumtingano ghwose ghwa iwanu ghukangawala kwa ghamalangulitso ghake; 29 kwaapfila yang'ali yowalangulitsa kama munu yana ukulu, na si kama iwalangulitsi wawo wa Ghamalaghitso baye.