1 Yesu kadina mna ghumnumbwi, kaloka kumwambu koya kuna ghumji ghwake imwenyegho. 2 Baho, wamghalila imunu iyaholole kawasa mchilagho. Yesu hayonile ukutoghola kwawo, kamlongela imunu ayula iyaholole, "Ughumighwe ghumoyo mwanangu, nzambi tsako tsileghusighwa."

3 Bahala waandishi wangi wa Ghamalaghitso welongela. "Imunu ayuno komligha Imlungu."

4 Naye Yesu kamanya achila chawang'ali wofikitsa, apfo kawaghutsa, "Hebali mfikitsa ighehile mna imimoyo yenu? 5 Chihi ichibewe, ukulonga, ‘Nzambi tsako tsileghusighwa,’ au ukulonga, ‘Inuka uke’? 6 Lelo mwobamighwa mmanye kuwa Imwana wa Adamu kana uwetso muisi wa kuwaleghusila nzambi iwanu." Kuya kamlongela imunu iyaholole, "Inuka, usole ichilagho chako, uke ukaye yako!"

7 Baho imunu ayula kenuka, koka ukaye yake. 8 Iwanu hawonile apfino wapfuka, wamtunya Imlungu iyaweng'ile iwanu uwetso awo.

9 Yesu kalawa hanu aho koka, na hayang'ali yoluta, kamwona munu kakala hasi kototsa ikodi, iyakemighwe Matei. Yesu kamlongela, "Niwinze,"

Naye kenuka kamuwinza.

10 Yesu hayakalile hasi yaje ichijo cha nemihe mng'anda, watotsa kodi wengi na iwana tsinzambi watsa na ukuja naye, hamwe na iwanafunzi wake. 11 Mafarisayo hawonile apfo, wawaghutsa wanafunzi wake, "Hebari mlangulitsi wenu yakuja na iwatotsa kodi na wana tsinzambi?"

12 Yesu hayahulike apfo, kawalongela, "Si iwanu iwali wagima baye iwobama imghanga, ila iwatamu wawo iwobama imghanga. 13 Lekeni mghende mkelangulitse mana yake imbuli aino, ‘Nobama libatsi, wala si inambiko baye.’ Kwaapfila sitsile kuwakema iwanu wana ihaki baye, ila wana tsinzambi."

14 Kuya wanafunzi wa Yohana wamghendela Yesu, wamghutsa, "Heule twetwe na Mafarisayo twofunga, lekeni wanafunzi wako ng'awofunga baye?"

15 Yesu kawedika, "Apfi yodahika iwahenza iwalalikighwe kuna ichihungo cha ukukwela walomboletse aku immale iyokwela yang'ali nawo? Mbe! Ng'aidahika baye. Lekeni litsuwa litsakutsa immale iyokwela hayatsosolighwa kulawa kuna wawo, baho watsofunga.

16 "Kuduhu munu iyakwika chilaka cha nguo ya sambi mna lighwanda lya ghumwande; kwaapfila ichilaka acho chitsokwegha tsinyutsi tsa ligwanda lya ghumwande, na ahala ihadegheke hatsakongetseka. 17 Wala iwanu ng'awoghuma dipfai ya sambi mna ipfibuyu pfa ngotsi pfa ghumwande baye; wang'atenda apfo, ipfibuyu pfitsotulika na idipfai itsakwitika; na ipfibuyu pfitsohinyika. Ila woghuma dipfai ya sambi mna ipfibuyu pfa ngotsi pfa sambi; kuya pfose, idipfai na ipfibuyu pfitsakuwa pfigima."

18 Hayang'ali yowalongela agho, mkulu wa sinagogi yumwe kamghendela, kamwinamila, kalonga, "Mwanangu mndele kafa sambi ghendo; lekeni utse wike ghumoko ghwako mlukuli lwake, naye katsakuwa mgima keli."

19 Yesu kenuka, koka kelongotsa naye, hamwe na iwanafunzi wake.

20 Baho, pinga yumwe iyang'ali yoghula utamu wa kulawa idamu kwa miyaka kumi na mili kamtsila Yesu kuchughu, kakinda lipindo lya ligwanda lyake. 21 Mana tsakelongela imwenyegho mmoyo mwake, "Ning'akinda ligwanda lyake tu, baho nitsohona."

22 Yesu kahunduka kamwona ipinga ayo, kamlongela, "Mwanangu, ughumighwe moyo mkulu! Ukutoghola kwako kukuhonya." Bahala ipinga ayo kahona.

23 Kuya Yesu kapfika kuna ing'anda ya imkulu ayula wa lisinagogi, naye kona awala iwotowa tsifilimbi, na mtingano ghwa iwanu iwaghanzike; 24 kawalongela, "Mke ahano, imndele ng'afile baye, ila kawasa!" Lekeni wawo wamseka ng'ani. 25 Ghumtingano ghwa iwanu haghulapfighwe kunze, Yesu kengila mng'anda, kamkinda ghumoko, na kamwinula imndele ayula. 26 Na imbuli aino yenela mna isi aila yose.

27 Yesu koka kulawa hanu ahala; na hayang'ali kamzila pfipofu weli wamuwinza, akuno wokemelela, "Utwonele libatsi, ghwemwana wa Daudi!"

28 Yesu hayapfikile kung'anda, wapfipofu awala wamghendela; Yesu kawaghutsa, "Apfi mwoamini kuwa nene nodaha kuwahonya?" Wedika,

"Ona, ghwe Mtwatsa!"

29 Kuya kakinda tsinenge tsawo, kalonga, "Iwalawile kama pfamuamini!" 30 Bahala tsinenge tsawo tsidaha ukwona. Yesu kawaghoma ghendo, kalonga, "Mwalangitse, munu wowose yaleke kumanya aghano." 31 Lekeni wawo woka, wenetsa tsimbuli tsake mna isi aila yose.

32 Hawang'ali wakuka, wanu wamghalila Yesu imunu chibubu yana ichinyamkela; 33 na ichinyamkela hayalapfighwe, ichibubu ayula kandusa ukulonga. Iwanu wose wakangawala, walonga, "Ng'ana chilawile baye chinu kama achino mna isi ya Isiraeli!" 34 Lekeni Mafarisayo walonga, "Kolapfa pfinyamkela kwa uwetso uyakwing'ighwa na imkulu wa ipfinyamkela."

35 Naye Yesu yang'ali yotsunguluka mna imiji yose na ipfijiji pfose, kolangulitsa mna ghamasinagogi ghawo, na kuwapetela Imbuli Inoghile ya Ufalume; na kuwahonya iwanu chila utamu na maghayo ghose. 36 Yesu hayaghwonile ghumtingano ghwa iwanu, kawonela libatsi, kwaapfila tsawepfa na kupwililika kama ng'olo iwalihela mdimi. 37 Kuya kawalongela iwanafunzi wake, "Ghamapfuno mengi, lekeni iwatenda sang'ano wachidogho. 38 Apfo mumlombe Imtwatsa wa ghamapfuno, yaghale iwatenda sang'ano kuna ghamapfuno ghake."