1 "Mwalangitse, mleke kutenda ighanoghile hambele ha iwanu ili wamloleni; mana mng'atenda apfo, ng'amtsopata liho baye kulawa kwa Aba wenu iyali kulanga.

2 "Apfo ghweghwe hauweng'a iwahingwa chinu chochose, uleke kutowa malati hambele hako kwilangusa kwa iwanu; kama iwang'enye pfawotenda mna ghamasinagogi na mna tsinzila, ili watunitsighwe na iwanu. Nomlongeleni kweli ghendo, awo tiyari wabokela maliho ghawo ghose. 3 Lekeni ghweghwe haumwing'a chinu imhingwa, hata ghumoko ghwako ghwa kumoso ghuleke kumanya achila chaghutenda ghumoko ghwako ghwa kujilo; 4 ili uluso wako wautendile uwe wa chipfiso; na Aba wako iyakona ighapfisike, katsokuliha.

5 "Namwe hamlomba, mleke kwighala na iwang'enye! Kwaapfila wawo watsowela ukulomba akuno wakwima mna ghamasinagogi na mmbalimbali mwa tsinzila, ili iwanu wawone. Nomlongelani kweli ghendo, awo mala wabokela liho lyawo. 6 Lekeni ghweghwe haulomba, wingile mna ichiheleto chako cha mghati, uhinde ghumlango ghwako, ulombe hambele ha Aba wako iyali mchipfiso; naye Aba wako iyakona ighapfisike, katsokuliha.

7 "Hamlomba, mleke kulonga chaka kama wapagani pfowotenda. Kwaapfila wawo wofikitsa wohulikitsighwa kwa ukulongalonga kwawo. 8 Apfo mleke kwighala nawo; kwaapfila Aba wenu komanya achila chambama ng'ana mwemwe mumlombe. 9 Lelo mwemwe mlombe apfino:

‘Aba wetu yuli kulanga,

Litaghwa lyako litunyighwe,

10 Ufalume wako utse,

ghaubama ghatendeke mna isi kama ako kulanga.

11 Utwing'e leloli ichijo chetu cha chila tsuwa,

12 Utuleghusile ghamatotso ghetu,

kama twetwe pfatuwaleghusila ghamatotso awala iwatutotsele.

13 Na uleke kutwingitsa mna ghamaghetso,

ila utukinge na ayula Yehile.

Kwaapfila ufalume wako ghweghwe, na tsingupfu, na utunitso, kwa matsuwa ghose ing'aghohupa. Amina.’

14 "Kwa apfila, mng'awaleghusila iwanu ghamatotso ghawo, na Aba wenu iyali kulanga pfipfila katsowaleghusilani mwemwe ghamatotso ghenu. 15 Lekeni ana ng'amuwaleghusila iwanu ghamatotso ghawo, naye Aba wenu iyali kulanga ng'atsomleghusilani mwemwe baye ghamatotso ghenu.

16 "Na hamfunga ukuja, mleke kwighala na iwang'enye iwohutsunika ipfihanga pfawo ili woneke kwa iwanu kuwa wafunga ukuja. Nomlongelani kweli ghendo, awo mala wabokela liho lyawo. 17 Lekeni ghweghwe haufunga ukuja, wibake ghamapfuta mwitwi mwako, na unawe ichihanga chako, 18 ili uleke kwoneka kwa iwanu kuwa kufunga, ila yamanye Aba wako yaliyeka yang'akoneka; na Aba wako iyakona ighapfisike katsokuliha.

19 "Mleke kwika tsimali tsenu muisi, amwo ghamabumbuluwa na ing'utu pfotsihinya, na iwahitsi wobomola na kwiba. 20 Lekeni mwike tsimali tsenu kulanga, ako ghamabumbuluwa na ing'utu ng'awotsihinya baye, na iwahitsi ng'awodaha baye ukubomola wala ukwiba. 21 Kwaapfila ahala hana tsimali tsako, baho haghutsokala ghumoyo ghwako.

22 "Inenge yiyo itala ya ilukuli. Lelo inenge yako ana yelile, ilukuli lwako lwose lutsakuwa na ghumwanga. 23 Lekeni inenge ako ana yihile, ilukuli lwako lwose lutsakuwa mchisi. Apfo ghumwanga ighuli mghati mwako ghung'awa chisi, acho ambe chisi totolo!

24 "Haduhu munu iyodaha kutumikila watwatsa weli, kwaapfila katsomwihila yumwe na kumkunda yungi; au katsomuwinza yumwe na kumbetsa yungi. Ng'amdaha baye kumtumikila Imlungu na tsimali.

25 "Apfo lelo nomlongelani, mleke kwalangulila ugima wenu, mja choni au mng'wa choni; wala tsing'uli tsenu, mpfala choni. Angu pfihi, ugima ng'auna samani kubita ipfijo baye? Na ilukuli ng'aluna samani kubita ghamagwanda baye? 26 Mlole wapfideghe wa kulanga, ng'awohanda baye, wala ng'awopfuna baye, wala kwika mkano; na Aba wenu iyali kulanga kowaghutitsa! Apfi mwemwe ng'amli wa samani ngulu kubita wapfideghe baye? 27 Yuhi mna mwemwe kwa ukwalangula kodaha ukwongetsa ichimo chake kwa moko ghumwe?

28 "Na kwa ajili ya tsinguo, hebari mkwalangula? Ghaloleni ghamaluwa ighali mmighunda, pfaghokula. Ng'aghotenda sang'ano baye, wala ng'aghofuma. 29 Na nene nomlongelani kuwa hata Selemani hamwe na utajiri wake wose wa tsimali, ng'apfalile pfinoghile baye ka luwa limwe mna ghamaluwa agho. 30 Lelo ka Imlungu koipfatsa apfo imitsani ya kubagho, ili baho leloli, na ilupfi yakwasighwa mna litanuli, angu ng'atsompfatsani mwemwe baye, mwemwe yamli na noghola ndodo?

31 "Apfo mleke kwalangula, kulonga, ‘Tuja choni?’ Au ‘Tukunwa choni,’ au ‘Tupfala choni?’ 32 Kwaapfila iwanu ing'awammanyile Imlungu woghasumbukila agho ghose; lekeni Aba wenu wa kulanga komanya ka mwoghabama agho ghose. 33 Lekeni mwemwe tanu ubameni ufalume wake na ihaki yake, na agho ghose mtsakwing'ighwa. 34 Apfo lelo mleke ukwalangula gha ilupfi, kwa apfila ilupfi itsakwalangula yenyegho. Chila tsuwa lina ighehile ghake, lekani kwongetsa ghangi.