1 Apfo mfalume na Hamani waghenda kwa malikiya Esta ukuja ichijo. 2 Mna litsuwa lya kabili, hawang'ali wakunwa dipfai, mfalume kamghutsa keli Esta, "Angu ubama choni malikiya Esta? Nongele, naghwe kutsopata. Chaubama choni? Hata inusu ya ufalume wangu, kutsakwing'ighwa." 3 Malikia Esta kamwidika, "Ghwe mfalume, ka kwakona pfinogha, unendele chanilomba, nolomba nene nighenddele kukala mgima, na iwanu wangu nawo waghendelele kukala wagima. 4 Kwaapfila nene na iwanu wangu tuutsighwa kwa iwanu wangi, nawo watsotuhinya, watsotukoma na kututenda tuhupe ghendo. Ka tung'autsighwe tuwe watumwa wamale na mapinga, nene ning'enyamale tulu, ning'alekile kutsa kukutsupfa mfalume kwa ukughanzika ako!"

5 Baho mfalume Ahasuero kamghutsa malikiya Esta, "Angu nani ayo iyoghetsa ukutenda chinu ka acho? Yalikwani imunu ayo?" 6 Malikiya Esta kamwidika, "Aduwi wetu mkulu na iyotudununza, yuyo Hamani!" Baho Hamani kandusa ukupfuka hambele ha mfalume na malikiya. 7 Mfalume kenuka aku kana maya, kaileka idipfai yake, kaghenda kunze hana ibostani ya ing'anda yake ya chifalume. Hamani hayonile ka mfalume kobama kumhigha kasighala kuchughu yamlombe malikiya Esta yaukombole ugima wake. 8 Kuya mfalume koya kulawa kuna ibostani, baho hayengile mna ichikuta hawang'ali wakunwa idipfai, kampfika Hamani keyasa habehi na ichighoda chayakalile Esta. Hayonile apfo, mfalume kalonga kwa litsi kulu, "Apfi imunu ayuno kobama yamghoghe kwa ngupfu malikiya hambele hangu? Kuya kotenda agho mng'anda mwa mfalume!" Baho mfalume ng'ana yamalitse ukulonga, iwatumighwa wamghubika Hamani uhanga. 9 Haribona, yumwe wa iwatumighwa iwamsang'anile mfalume, kalonga, "Ghwe mfalume, Hamani katengenetsa mbiki ghwa kumkomela Modekai, munu iyaukombole ugima wako. Ghumbiki aghwo ghuna utali wa futi sabini na tano, ghwabaho hakaye yake."

Baho mfalume kalaghitsa, "Mkondekeni mumo Hamani." 10 Naye Hamani kakondekighwa mumo mna ghumbiki ghwa ukukomela ghwayatengenetse yamkome Modekai. Na baho imaya ya mfalume itsigha.