1 Aghano ghagho ighalawile mna ghamatsuwa ghayatawale mfalume Ahasuero, tsakatawala mikowa miya imwe na ishilini na saba, kulawa India mbaka Esiopia. 2 Tsakatawala imikowa ayo aku yeye mwenyegho yang'ali yokala mna ghumji ghwa Shushani. 3 Mna ghumwaka ghwa kadatu ghwa utawala wake, mfalume Ahasuero kawatendela chihungo pfilongotsi na watenda sang'ano wake. Kawakema wakulu wa maasikali kulawa kuna imiji ya Perisia na Media, iwana wa chifalume na iwakulu wa imiji. 4 Kwa miyetsi sita mfalume Ahasuero yang'ali yolangusa tsimali tsa ufalume wake unoghile, ukunogha kwa ipfinu pfake na utawala wake.

5 Ghamatsuwa agho haghamalile, mfalume kawatendela chihungo iwanu wose wa ghumji ghwa Shushani, iwabala kwa iwadodo. Ichihungo acho tsachikala kwa matsuwa saba, chitendeka kuna iluwa lwa ibostani ya ing'anda ya mfalume. 6 Hanu aho tsahahambighwa kwa mapanziya gha ihamba nzelu na buluu. Ghamapanziya agho tsaghohighwa kwa pfinanikilo pfa fetsa kwa mitsabi ya chitani chinoghile cha langi ya nzambalao, na ghakondekighwa mna tsingutso tsikighwe ghamabwe ghana ilangi. Ipfighoda pfa nzahabu na fetsa pfikighwa hasi hana ghamabwe ghana ilangi, mabwe gha bei ng'ulu gha langi ndung'u, nzelu, njano na nitu. 7 Iwanu wanwa idipfai ikighwe mna pfikombe pfa nzahabu, chila chikombe ng'achighalile na chiyaghe baye, naye mfalume kwa uluso wake kaweng'a idipfai ya chifalume. 8 Chila munu kanwa ka apfila pfayabamile, kwaapfila mfalume tsakawalaghitsa iwang'ali womsang'anila mna ing'anda yake ya chifalume, wamwing'e chila munu ka pfayobama.

9 Matsuwa ghagho, malikia, ipinga wa mfalume iyakemighwe Vashiti kawatendela chihungo mapinga wayaghe mghati mwa ing'anda ya chifalume ya mfalume Ahasuero. 10 Mna litsuwa lya saba lya ichihungo acho, mfalume Ahasuero aku kasangalamka sideke kwa idipfai iyanwele, kawakema tsina Mehumani, Bizita, Habona, Bighisa, Abasa, Setali na Karikasi, iwanu awala saba iwamsang'anile yeye imwenyegho. 11 Kawalaghitsa wamghalile Vashiti, imalikia, aku kapfala litaji lyake lya chimalikia. Mfalume tsakabama yawalanguse iwanu na pfilongotsi apfila mwehe wake pfayanoghile, kwaapfila tsakanogha ng'ani. 12 Lekeni iwanu iwamsang'anile mfalume hawamlongele chayalaghitse mfalume, Malikia Vashiti kalema ukughenda. Ichinu acho chimtenda mfalume yone maya na yaghudubuke ng'ani.

13 Kwaapfila mfalume tsakana chihendo cha ukuwaghutsa iwanu wana ihekima, apfo kawakema iwanu iwamanyile ghamalaghitso na ukuhigha wamlongele cha ukutenda. 14 Iwanu wake wa habehi iwang'ali womlongelagha cha ukutenda wawo awano, Karishena, Shetari, Adimata, Tarishishi, Maresi, Marisena na Memukani, awo tsawakala pfilongotsi saba iwolawa Perisia na Media iwakalilile wakulu ghendo mna ufalume wake. 15 Naye kawaghusa apfino, "Kwa ukuwinza ghamalaghitso malikia Vashiti tumtendetse? Kwaapfila tsaniwatuma watumighwa wangu kuna yeye, lekeni kalema ukutoghola lilaghitso lyangu nene mfalume Ahasuero!"

16 Baho Memukani kedika hambele ha mfalume na iwakulu, "Malikia Vashiti katotsa ghendo, si kwa mfalume yaliyeka baye, pfipfila katotsa hambele ha iwakulu wose, na iwanu wose iwali mna imikowa ya mfalume Ahasuero. 17 Ichinu achino chayatendile malikia Vashiti hachitsomanyika kwa wapinga wose, wawo nawo watsowabetsa iwamale wawo, kuya watsolonga, ‘Mfalume Ahasuero kalaghitsa malikia Vashiti yaghalighwe hambele hake, lekeni yeye tsakalema.’ 18 Leloli aino, wapinga wa iwakulu wa Perisia na Media iwahulike ghayatendile malikia Vashiti, watsowalongela pfipfo iwakulu wako, apfo watsowabetsa iwamale wawo, na iwamale watsowonela maya wapinga wawo. 19 Lelo ghwe mfalume, ung'ona pfinogha, ulaghitse Vashiti yaleke kutsa keli hambele hako, lilaghitso alyo lyandikighwe mna ghamalaghitso gha Perisia na Media, ili lileke kughalambuka. Kuya umalikia wake yeng'ighwe pinga yungi yana ghamahala kubita yeye. 20 Apfo lilaghitso alino lya mfalume halitsolongighwa chila hanu ha ufalume wako iuli mkulu, mapinga wose watsowategheletsa iwamale wawo, yawe mkulu au mdodo."

21 Ichinu acho chimnoghela ghendo mfalume na iwakulu wake, naye katenda ka pfayalongile Memukani. 22 Apfo mfalume kaghala baluwa chila hanu hayatawale, chila mkowa na chila kabila kwa chilugha chawo na ka pfawakwandika, kulonga, chila mmale yawe mkulu wa ikaye yake, na chayolonga chiwe chicho.