1 Mna litsuwa alyo chitabu cha Musa chisomighwa kwa litsi kulu akuno iwanu wohulikitsa, honeka hanu hasomeke ka Waamoni na Wamoabu waleke ghendo kwingila mna ghumtingano ghwa iwanu wa Imulungu. 2 Kwaapfila wawo tsawawema Waisiraeli ghamatsi na ichijo, na tsawamhonga Balaamu yawalighite Waisiraeli, lekeni Imulungu wetu kaghalalusa malighito aghala ghawa balaka. 3 Baho iwanu wa Isiraeli hawahulike ghamalaghitso agho, wawabaghula iwanu wose iwali si Waisiraeli baye, wana iwahenga iwolawa isi tsingi.

4 Aho ng'ana alino lilawile baye, mtambika Eliashibu tsakasaghulighwa yalolese pfiheleto pfa ukwikila ipfinu ipfili mna ing'anda ya Imulungu, naye tsasale yake mkulu Tobia. 5 Eliashibu tsakamleka Tobia yatumile ichiheleto chikulu, ghumwande wang'ali wakwikila tsinambiko tsa usaghe, tsa upfumba, tsa ipfinu, tsa itsaka ya ipfijo, itsaka ya idipfai, na itsaka ya ghamapfuta, pfawalaghitsighwe waweng'e Walawi, na iwanu iwakwimba, na awala iwokalitsa ghamalango, na ipfinu ipfilapfighwa kwa iwatambika. 6 Aghano haghang'ali ghotendeka, nene tsasili baho baye Yerusalaemu, kwaapfila mna ghumwaka ghwa salasini na mbili ghwa mfalume Artashasta wa Babiloni tsambuya kwa mfalume, kuya hambele nimlomba mfalume mbuye keli Yerusalemu. 7 Na hambuyile Yerusalemu mbona litotso lyayatendile Eliashibu kwa kumwing'a Tobia ichiheleto mmbalimbali mwa ing'anda ya Imulungu. 8 Tsangudubuka ghendo na nyasa kunze pfinu pfose pfa Tobia ipfikalile mna ichiheleto. 9 Kuya niwalaghitsa iwanu wapfitende ipfiheleto pfele na nipfiyitsa ipfinu pfa ing'anda ya Imulungu, hamwe na tsinambiko tsa ipfijo na upfumba.

10 Kuya mbona ghendo ka Walawi na iwanu iwakwimba, wana isang'ano ayo, ng'aweng'ighwe baye aghala ighobamighiwa weng'ighwe, apfo wose tsawoya kusang'ana mna imighunda yawo. 11 Baho niwamanila pfilongotsi, niwalonga, "Heule ing'anda ya Imulungu ilekighwe?" Apfo niwakema wose hamwe, na niweka chila munu mna ing'onde yake. 12 Kuya Wayuda wose wanza keli ukughala tsaka tsawo, tsinafaka, na idipfai, na ghamapfuta gha nzeituni kuna ipfiheleto. 13 Na niwasaghula iwanu awano waloleseghe ipfiheleto pfa ukwikila ipfinu, mtambika Shelamia, Zadoki, mlangulitsi wa malaghitso, na Pedaia Mlawi, na Hanani, mwanaghe Zakuri, na mwana wa Matania, yeye yang'ali yowapfila. Iwanu awano tsawatogholeka, na ing'onde yawo tsa ya ukuwagholela ndughu tsawo ipfinu. 14 Ghwe Imulungu wangu, ung'umbuke mna aghano ghose, wala uleke kughasemwa aghala ghose ghanendile kwa uluso wangu mna ing'anda ya Imulungu wangu na mna sang'ano tsake. 15 Matsuwa ghagho niwona iwanu wa Yuda wokamla tsinzabibu mna litsuwa lya Sabato, kuya wamwenga wang'ali wowabapitsa wapfihongwe ingano, idipfai, nzabibu, na tini na pfinu pfingi, wopfighala Yerusalemu. Baho niwakembela waleke kuutsa ipfinu mna litsuwa alyo. 16 Pfipfila iwanu wa Tiro iwang'ali wokala Yerusalemu wang'ali woghala wasomba na pfinu pfingi na wang'ali wowautsila iwanu wa Yuda mumo Yerusalemu mna litsuwa lya Sabato. 17 Kuya niwamanila pfilongotsi wa iwanu wa Yuda, niwalonga, "Angu chinu chachi achino ichihile chamtenda, ng'ambe mwoiligha Isabato? 18 Angu sekulu tsenu ng'awatendile ghaghano baye, mbaka wamtenda Imulungu kaghala ghamaghayo aghano ghose mna twetwe mna ghumji aghuno? Namwe mwoitenda imaya ya Imulungu yongetseke mna iwanu wa Isiraeli kwa kuiligha Isabato."

19 Apfo niwalaghitsa wahinde ghamalango gha Yerusalemu ahala Isabato haikwanza nemihe, na ichisi hachikwingila, na ghaleke kupfughulighwa mbaka Sabato haimala. Kuya niweka iwanu wangu hana ghamalango, ili walolese chileke kwingila chinu chochose mna litsuwa lya Sabato. 20 Apfo wachulutsi iwang'ali woutsa ipfinu tsawawasa kunze mwa Yerusalemu kwa mala mbili au ndatu. 21 Lekeni niwakanya na niwalonga, "Heule muwasa hambele ha ubanda? Mng'atenda apfo keli, nitsowaghogha." Kulawa ghamatsuwa agho ng'awatsile keli baye mna litsuwa lya Sabato. 22 Kuya niwalaghitsa Walawi wetende wenyegho wele, na watse waikalitse ghamalango, ili litsuwa lya Sabato lienzeluke. Ghwe Mlungu wangu, ung'umbuke, na umbonele libatsi, ka pfauli ukulu wa uluso wako.

23 Kuya mna ghamatsuwa agho niwona Wayahudi iwakwelile mapinga wa Ashdodi, Amoni na Moabu, 24 Na nusu ya iwana wawo tsawalonga Chiashidodi, na ng'awadahile baye kulonga Chiyahudi, lekeni tsawalonga lugha tsa iwanu wangi. 25 Nisonga nawo na niwalighita, na wamwenga wawo niwatowa na niwang'ola tsimvili tsawo, na niwananahitsa welahe kwa taghwa lya Imulungu, tsanonga, "Mleke kuwalapfa neghe tsenu wakwelighwe na iwana wao, wala neghe tsawo waleke kukwelighwa na iwana wenu." 26 Niwalongela, "Angu mfalume Selemani tsang'atendile nzambi baye kwa kukwela mapinga ka awano? Mna isi tsingi tsakuduhu mfalume ka yeye, naye Imulungu tsakamkunda sideke, na Imulungu kamtenda yawe mfalume wa Isiraeli yose. Lekeni mapinga wa isi tsingi wamtenda yatende nzambi. 27 Lelo pfihi tuwategheletse mwemwe, kwa kutenda ichinu achino chihile na kumtendela pfihile Imulungu wetu kwa kuwakwela mapinga wa isi tsingi?" 28 Mwana yumwe wa Yoyada, na iyali mtsukulu wa mtambika mkulu Eliashibu, tsakamkwela neghe Sanbalati Mhoroni, apfo nimuwinga yalawe Yerusalemu. 29 Ghwe Imulungu wangu, uwakumbuke kwaapfila wautenda utambika wihe, na lilaghano lya watambika na lya walawi.

30 Apfo niwatenda wele kulawa mna chinu chochose cha chigheni, kuya niweka iwatambika na Walawi mna tsisang'ano tsawo. 31 Kuya niwalaghitsa walapfeghe tsingodi na ipfijo pfawolimbula mna ghamatsuwa ighobamighwa. Ung'umbuke ghwe Imulungu wangu, ili unendele ghanoghile.