1 Ikala Ghumwetsi ighukemighwa Nisani, mna ghumwaka ghwa ishilini ghwa ukutawala kwake mfalume Aritashasta, ahala idipfai haikighwe hambele hake, niisola idipfai aila nimwing'a mfalume, aku nakoneka nina hutsuni ng'ulu, na tsasina mboneke apfo baye hambele hake. 2 Apfo mfalume kanilongela, "Hebali ichihanga chako chakoneka chising'inika, naghwe ng'uli mtamu baye? Nakona ghweghwe kuna hutsuni ng'ulu mmoyo mwako."

Baho nipfuka ng'ani. 3 Na nene nimlongela mfalume, "Ghwe mfalume, Imulungu yakwike! Hebali ichihanga changu tsachileke koneka china hutsuni, akuno ghumji ghuna ghamakabuli ghawatsikighwe sekulu tsangu ghwa mna uchuwa, na ghamalango ghake ghalakatsighwa na ghumoto?" 4 Naye mfalume kanilongela, "Lelo choni chubama nikutendele?" Baho nimlomba Imulungu wa kulanga mmoyo mwangu, 5 kuya nimlongela mfalume apfino, "Ka pfikunoghela, ghwe mfalume, na ka ghweghwe konitogholela nene mtumighwa inili hambele hako, nokulomba unitume nighende Yuda, kuna ghumji ghwa ghamakubuli gha sekulu tsangu, nikaghutsenge ghoya keli." 6 Naye mfalume kanilongela, akuno malikia kakala kahabehi naye, "Ghumwanza ghwako ghutsosola matsuwa mangapi, naghwe utsakuya tsuwachi?" Apfo mfalume kona pfinogha ukunileka mbuke, na nene nimlongela nitsakuya tsuwachi. 7 Pfipfila nimlongela mfalume, "Ka kwakona pfinogha, ghwe mfalume, ungaye tsibaluwa nikaweng'e iwakulu wa isi tsili kumwambu mwa ghumto Eufurati, wakanilekelele nibite mbaka nipfike kuna isi ya Yuda. 8 Pfipfila nokulomba umwandikile ibaluwa Asafu, ayula iyokalitsa ghumhulo ghwa mfalume, umlongele yangaye imibiki ya ukutengenetsa ghamalango gha ubanda ya ing'anda ya Imulungu, na ghamalango gha ubanda wa ghumji, na gha ghamalango ing'anda yanitsakwingila nikale." Naye mfalume kangaya chila chinu chanibamile, kwaapfila IMNDEWA Imulungu wangu tsakahamwe na nene. 9 Mfalume kangaya iwakulu wa maasikali na wadinafalasi nighende nawo. Nighenda nipfika kwa iwakulu wa isi tsili kumwambu mwa ghumto Eufurati, na niweng'a tsibaluwa tsilawile kwa mfalume. 10 Lekeni Sanibalati iyolawa mna ghumji ghwa Horoni, na Tobia, ichilongotsi wa Waamoni, hawahulike katsa munu kuwatendela ighanoghile iwanu wa Isiraeli, imbuli ayo iwadesa sideke.

11 Apfo nipfika Yerusalemu na nikala ako kwa matsuwa madatu, 12 kuya nilawa nechilo, nene na wanu chidogho, tsasimlongele munu wowose baye achila Imulungu chayekile mna ghumoyo ghwangu, cha ukughutendela ghumji ghwa Yerusalemu. Wala sighendile na mnyama yungi baye, ila ichihongwe ayula yanimdinile nene. 13 Baho hachilo, nibitila Lilango lya kulwanda, niwinza inzila ighenda kuna Ichisima cha Litsoka, na kuna Lilango lya Tsalala, niikaghula imibanda ya Yerusalemu, ibomolighwe, na ghamalango ghake, ighalakatsighwe na ghumoto. 14 Kuya nighenda akula kuna Lilango lya Imbwibwi, na kuna Tsimbu lya Mfalume, lekeni ng'ahakalile na hanu baye ha ukubita ichihongwe ayula yanimdinile. 15 Apfo nigheluka chilo chicho mmbalimbali mwa ilukolongo, niukaghula ubanda. Kuya nihunduka kuchughu, nyingila keli mna ghumji kubitila Lilango lya Kulwanda. 16 Nawo iwakulu ng'awamanyile baye kwani kwanighendile, na choni chaning'ali nitenda, kwaapfila tsasina niwalongele baye Wayahudi, wala iwatambika, wala wapfilongotsi, wala iwakulu, wala iwanu iwobamighwa kusang'ana ing'onde ayo. 17 Kuya niwalongela, "Mwakona pfatughaya! Mwoyona Yerusalaemu pfaili uchuwa, na ghamalango ghake pfaghalakatsighwe na ghumoto. Lelo mtse, tuutsenge keli ubanda wa Yerusalemu, ili tuleke kughendelela kuwa mna ichinyala achino." 18 Niwalongela apfila Imulungu wangu pfayanitendele uluso, na achila mfalume chayanilongele. Nawo walonga, "Haya! Tukeni tukatsenge keli." Apfo nawo wandusa isang'ano ayo inoghile. 19 Lekeni Sanibalati, iyolawa mna ghumji ghwa Horoni, na Tobia, chiongots Muamoni, na Geshemu, Mwarabu, hawahulike, wang'ong'a na kutuseka, na watubetsa ghendo, walonga, "Angu mwemwe, chinu chachi achino chamtenda? Pfihi mwombiduka mfalume?" 20 Baho niwedika nilonga, "Imulungu wa kulanga, yeye katsotwapfila tuisang'ane ghoya ing'onde aino, na twetwe iwatumighwa wake tutsakwinuka na tutsoutsenga, lekeni mwemwe ng'amna chenu baye ahano Yerusalemu, wala ng'ahana haki yenu baye, wala chinu cha kukumbukighwa."