1 Haghupfikile ghumwetsi ghwa saba iwanu wose tsawakala mna imiji yawo. mna tsuwa lya mwanduso lya ghumwetsi agho iwanu wose wetingana hamwe hana ichibwalu ichili habehi na Lilango lya Ghamatsi wawa chinu chimwe, wamlongela Ezra iyaghamanyile ghamalaghitso yalete ichitabu cha ghamalaghitso gha Musa, IMNDEWA chayawalaghitse Waisraeli. 2 Naye mtambika Ezra kachighala ichitabu acho hana ghumtingano ghwa iwanu, ighumemile iwamale na mapinga na wanu wose iwodaha kumanya. 3 Kawasomela ichitabu acho kwa litsi kulu hambele ha ichibwalu iching'ali chilolesa na Lilango lya Ghamatsi kulawa nemitondo mbaka nemisi, aku wamale na mapinga na wose iwamanyile nawo tsawabaho, na iwanu wawamba ghamaghutwi kutegheletsa ighali mna ichitabu cha Ghamalaghitso.

4 Ezra, imunu yomanya malaghitso, kema hana lijukwaa ilitsengighwe na tsimbao kwa isang'ano ayo ya ukusomela. Na habehi hake, kuna ghumoko ghwake ghwa kujilo wema Matitia, Shema, Anaya, Uria, Hilikia na Maasea, na kuna ghumoko ghwake ghwa kumoso wema wima Pedaya, Mishaeli, Malikiya, Hashumu, Hashibadana, Zekaria na Meshulamu. 5 Ezra kachipfughula ichitabu akuno iwanu wose wolola, kwaapfila yeye tsakema hanu henuke, na hayachipfughule iwanu wose tsawema. 6 Naye Ezra kamtunya MNDEWA, Imulungu iyali mkulu na iwanu wose wenula ghamoko ghawo na wedika, "Amina! Amina!" Kuya wamwinamila IMNDEWA mbaka pfihanga pfawo pfidonza hasi 7 Kuya iwanu wenuka wema wima. Baho Walawi awano, Yeshua, Bani, Sherebia, Yamini, Akubu, Shabetai, na Hodai, na Maaseya, na Kelita, na Azaria, na Yozabadi, na Hanani, na Pelaya, wawapfila iwanu kughamanya ghamalaghitso. 8 Wawasomela pfinoghile kulawa mna ichitabu cha Imulungu na wawalongela iwanu achila chawawasomele chilongatse. 9 Iwanu wose wang'ali wolila hawahulike ghamalaghitso gha Musa, naye Nehemia iyakalile mkulu wa isi, na Ezra mtambika na Walawi, iwawafundile iwanu, tsawawalongela iwanu wose apfino, "Alino tsuwa lienzeluke kwa IMNDEWA, iyali Imulungu wenu, apfo mleke kudomboketsa wala kulila." 10 Kuya kawalongela, "Mke na mkaje achila ichinonile na mnwe chilimta na mumgholele ayula iyalihela chinu, kwaapfila leloli tsuwa lienzeluke kwa IMNDEWA, na mleke kuwa na usungu, kwaapfila ukudeng'elela kwayoweng'ani IMNDEWA, koweng'ani mwemwe ingupfu." 11 Apfo Walawi wang'ali wobita wowalongela iwanu wenyamale, wawalongela, "Nyamaleni, kwaapfila leloli tsuwa lienzeluke, mleke kusing'inika." 12 Baho iwanu wose woka, waghenda kuja na kunwa na kuwagholela wayao achila chawali nacho na kudeng'elela kwa ukutenda chihungo chikulu, kwaapfila tsawamanya aghala ghose ghawalongelighwe.

13 Ilupfi yake, wakulu wose wa tsikolo na watambika na Walawi wetingana kwa Ezra, iyaghamanyile ghamalaghitso, ili yawafunde ghamalaghitso. 14 Na wona lilaghitso alila IMNDEWA lyayamlaghitse Musa lyandikighwa ka iwanu wose wa Isiraeli wobamighwa wakale mna ipfibumbulika mna ichihungo cha ghumwetsi ghwa saba. 15 Apfo wawalongela iwanu lilaghitso na walyenetsa muisi mwose na Yerusalemu, wawalongela, "Ghendani kupfidunda na muye na ghamaputila gha minzeituni, minzeituni ya kubagho, mihadasi, mitende na mibiki ya chimbeho ya ukutsengela pfibumbulika ka pfayandikighwe mna ghamalaghitso."

16 Apfo iwanu waghenda kusola maputila wetsengele pfibumbulika, chila munu mna ichiswilii chake, na hana ichibwalu cha ing'anda yake na ichibwalu cha ing'anda ya Imulungu, na hana ichibwalu cha Lilango lya Ghamatsi, na ichibwalu cha Lilango lya Efuraimu. 17 Iwanu wose woyile kulawa mna isi ya utumwa watsenga ipfibumbulika pfawo na wakala mumo, kwaapfila kulawa matsuwa gha Yoshua mwana wa Nuni mbaka litsuwa alyo Waisiraeli tsang'ana wadeng'elele ka apfo baye, apfo wadeng'elela sideke. 18 Kulawa litsuwa lya mwanduso mbaka lya utsighilo, Ezra kawasomela iwanu ichitabu cha ghamalaghitso, na watenda chihungo kwa matsuwa saba, mna litsuwa lya nane tsakuna mtingano mkulu ghwa iwanu, ka pfawalaghitsighwe.