1 Lelo ubanda haumalile ukutsengighwa, na imilango yake kwikighwa hanu hake, na iwanu iwokalitsa imilango, iwanu iwakwimba na Walawi hawasaghulighwe na kwing'ighwa ng'onde tsawo, 2 nimsaghula ndughu yangu Hanani, hamwe na Hanania mkulu wa ingome wawe wakulu wa Yerusalemu, kwaapfila Hanania tsa munu iyotogholighwa na yang'ali yompfuka Imulungu kubita wose. 3 Niwalongela, "Ghamalango gha Yerusalemu ghaleke kupfughulighwa mbaka nemitondo litsuwa halitsolawa, mhinde ghamalango agho na mwike ghamakomeo ghake aku iwokalitsa ghamalango wang'ali baho. Pfipfila muwasaghule iwanu iwokala Yerusalemu nawo wakalitse, chila yumwe yakale hanu hayokalitsa, na wamwenga wakale habehi kwilolesa na tsing'anda tsawo."

4 Ghumji ghwa Yerusalemu tsaghukala mkulu na mghatsi, lekeni iwanu iwakalile amwo tsa wachidogho, tsing'anda natso tsang'ana tsitsengighwe baye.

5 Imulungu wangu kanilongotsa mmoyo mwangu niwakeme hamwe iwakulu, pfilongotsi na iwanu ili wapetighwe kwa kulola tsikolo tsawo tsawolawa. Na mbona ichitabu cha tsikolo tsa iwanu iwalongole ukuya, na achino chicho chandikighwe amwo.

6 Awano wawo iwanu iwoyile kuna ghumji ghwa Yerusalemu na isi ya Yuda kulawa akula kwawahamile, iwaghoghighwe na kughalighwa na Nebukadneza mfalume wa Babeli, chila munu koya ukaye yake. 7 Tsawoya na pfilongotsi wawo awano, Zerubabeli, Yoshua, Nehemia, Seraya, Reelaya, Nahamani, Moridekai, Bilishani, Misipari, Bigwai, Rehumu, na Baana. Na tsikolo tsa Isiraeli itsuyile kulawa Babeli atsino ahano. 8 Iwanu wa lukolo lwa Paroshi iwoyile tsa wanu elufu mbili na miya imwe na sabini na weli, 9 na iwanu wa ilukolo lwa Shafatia, tsa miya ndatu na sabini na weli, 10 Na wanu wa ilukolo lwa Ara, tsa miya sita hamsini na weli. 11 Na wanu wa ilukolo lwa Pahati Moabu, awala iwatsukulu wa Yeshua na Yoabu, tsa elufu mbili na miya nane kumi na wanane. 12 Na wanu wa Elamu iwoyile tsa elufu imwe na miya mbili na hamsini na wane. 13 Iwanu wa ilukolo lwa Zatu tsa miya nane na alubaini na tano, 14 iwanu wa ilukolo lwa Zakai miya saba na sitini. 15 Wanu wa ilukolo lwa Binui: miya sita alubaini na wanane, 16 iwanu wa ilukolo wa Bebai tsa miya sita ishilini na wanane; 17 iwanu wa ilukolo lwa Azigadi tsa elufu mbili miya ndatu ishilini na weli, 18 iwanu wa ilukolo lwa Adonikamu tsa miya sita sitini na saba, 19 iwanu wa ilukolo lwa Bigwai tsa elufu mbili na sitini na saba, 20 iwanu wa ilukolo lwa Adini iwoyile tsa miya sita hamsini na watano, 21 iwanu wa ilukolo lwa Ateri pfipfila yakemighwa Hezekia tsa tisini na wanane, 22 iwanu wa ilukolo lwa Hashumu tsa miya ndatu na ishirini na wanane, 23 iwanu wa ilukolo lwa Bezai tsa miya ndatu ishirini na wane, 24 wanu wa ilukolo lwa Halifu tsa miya imwe kumi na weli, 25 iwanu wa ilukolo lwa Gibeoni tsa tisini na watano. 26 Pfipfila wanu wa Betilehemu na Netofu iwoyile tsa miya imwe semanini na wanane. 27 Iwanu wa Anatoti tsa miya imwe na ishirini na wanane. 28 Iwanu wa Beti Azimaweti tsa alubaini na weli. 29 Iwanu wa Kiriati Yearimu, na Kefira, na Beeroti iwoyile tsa miya saba alubaini na wadatu. 30 Iwanu wa Rama na Geba tsa miya sita na ishirini na yumwe. 31 Iwanu wa Mikimashi tsa miya imwe na ishirini na weli. 32 Iwanu wa Beteli na Ai tsa miya imwe ishirini na wadatu. 33 Iwanu wa ghumji ghungi ghwa Nebo tsa hamsini na weli. 34 Iwanu wa ghumji ghungi ghwa Elamu tsa elufu imwe na miya mbili hamsini na wane. 35 Na iwanu wa Harimu tsa miya ndatu na ishirini. 36 Iwanu wa lukoo lwa Yeriko tsa miya ndatu alubaini na watano. 37 Iwanu wa lukoo lwa Lodi na Hadidi, na Ono tsa miya saba ishilini na yumwe. 38 Iwanu wa ilukoo lwa Senaa tsa elufu ndatu miya tisa na selasini. 39 Iwatambika iwoyile wawo awano, watambika wa lukolo lwa Yedaya, watambika wa ikaya ya Yeshua tsa miya tisa sabini na wadatu. 40 Iwatambika wa ilukolo lwa Imeri tsa elufu imwe na hamsini na weli. 41 Iwatambika wa ilukoo lwa Pashuri tsa elufu imwe, miya mbili na alubaini na saba. 42 Iwatambika wa lukolo lwa Harimu tsa elufu imwe na kumi na saba. 43 Iwalawi iwoyile kulawa Babeli tsa awano: Walawi wa lukolo lwa Yeshua, kubitila kwa iwanaghe Kadimieli, na Hodavia tsa sabini na wane. 44 Na iwanu iwang'ali wakwimba, wa lukolo lwa Asafu tsa miya imwe na alubaini na wanane. 45 Na iwokalitsa imilango tsa iwana wa Shalumu na wa Ateli na wa Talimoni na wa Kubu na wa Hatia na wana Shobai tsa miya imwe na salasini na wanane. 46 Kolo tsisang'ane mna ing'anda ya Imulungu tsuyile tsitso atsino: ilukolo lwa Ziha, lwa Hasufa, lwa Tabaoti, 47 lwa Kerosi, lwa Siaha, lwa Padoni, 48 lwa Lebana, lwa Hagaba, lwa Shalimai, 49 lwa Hanani, lwa Gideli, lwa Gahari, 50 lwa Reaya, lwa Resini, lwa Nekoda, 51 lwa Gazamu, lwa Uza, lwa Pasea, 52 lwa Besai, lwa Meunimu, na lwa Nefushesimu. 53 Pfipfila lukolo lwa Bakibuki, lwa Hakufa, lwa Harihuri, 54 lwa Basiliti, lwa Mehida, lwa Harisha, 55 lwa Barikosi, lwa Sisera, lwa Tema, 56 lwa Nezia na ilukolo lwa Hatifa. 57 Kolo tsa watumwa wa Selemani tsuyile kulawa mna isi tsa utumwa atsino ahano: Lukolo lwa Sotai, lwa Sofereti, lwa Perida, 58 lwa Yaala, lwa Darikoni, na lwa Gideli, 59 na lukolo lwa Shefatia, lwa Hatili, lwa Pokereti Hasebaimu, na lukolo lwa Amoni. 60 Iwatumwa wose iwasang'ane mna ing'anda ya Imulungu, na kolo tsa watumwa wa Selemani tsa miya ndatu na tisini na weli. 61 Wanu wa imiji aino nawo tsawoya, iwanu wa ghu mji ghwa Teli Mela, ghwa Teli Harisha, ghwa Kerubu, ghwa Adoni na wa ghumji ghwa Imeri, lekeni ng'awadahile baye ukwonesa ka nawawo wolawa mna tsikolo tsa Isiraeli. 62 Iwanu awo wolawa mna ilukolo lwa Delaya, lwa Tobia na lwa Nekoda, wose tsa wanu miya sita na alubaini na weli.

63 Na iwatambika iwoyile tsa awano, iwana wa Hobaya, wa Hakosi na wa Barizilai iyakwelile neghe wa Barizilai iyolawa Gileadi, apfo kakemighwa kwa litaghwa lilyo. 64 Nawo wabama ghamataghwa ghawo mna tsikumbukumbu tsa tsikolo lekeni ng'awaghonile baye, apfo woneka weha, na ng'awatangike baye ka watambika. 65 Apfo imkulu wa isi kawalongela waleke kuja ichijo ichilapfighwa kwa Imulungu, mbaka yapfike imtambika iyolamla kwa ghamabwe gha Urimu na Thumimu yalamle. 66 Iwanu wose iwoyile kulawa isi ya utumwa tsa wanu elfu alubani na mbili, miya ndatu na sitini. 67 Watumwa wamale na mapinga tsawapetighwa elufu saba na miya ndatu na salasini na saba, Na iwang'ali wakwimba wamale na mapinga tsa miya mbili na alubaini na tano. 68 Woya na falasi miya saba na salasini na sita, na pundafalasi miya mbili na alubaini na tano, 69 Na ngamiya miya nne salasini na watano, na pfihongwe elufu sita miya saba na ishilini.

70 Na wakulu wamwenga wa tsikolo walapfa pfinu pfao pfisang'ane mna ing'onde aino. Imkulu wa isi yose kalapfa kilo nane tsa nzahabu, mabeseni hamsini, na maghwanda miya tano na salasini gha iwatambika. 71 Wakulu wamwenga wa tsikolo walapfa kilo miya imwe na sitini na nane tsa nzahabu na kilo elufu imwe na miya mbili na hamsini tsa fetsa. 72 Na iwanu iwakalile walapfa kilo miya imwe sitini na nane tsa nzahabu na maghwanda sitini na saba gha watambika. 73 Manabii, Walawi na iwokalitsa ing'anda ya Imulungu, na awala iwang'ali wakwimba, na wanu wamwenga na watumwa wa ing'anda ya Imulungu na wanu wose wa Isiraeli wakala mmakaye mwao.