1 Sanibalati hayahulike ka twetwe tung'ali tuutsenga keli ubanda, kaghudubuka, kawa na usungu mkulu ng'ani, baho kanza kuwaseka Wayahudi. 2 Kalonga hambele ha ndughu tsake, na hambele ha lijeshi lya Samaria, "Angu Wayahudi awano nyondenyonde wotenda choni? Pfihi iwenyegho wodaha kuutsenga keli ubanda auno? Pfihi wetsagha watsolapfa nambiko na ukumalitsa ukutsenga kwa tsuwa limwe? Pfihi watsoghafukula ghamabwe aghano kulawa mna ghamalundo gha ipfifusi, ighalakale na ghumoto?" 3 Naye Tobia, Munu wa Amoni tsakakala kahabehi, naye kalonga, "Pfipfila, achila chawotsenga, hata mbweha yang'adina mchanya mwake, koubomola ghendo ubanda wawo wa ghamabwe." 4 Baho nimlomba Imulungu, nilonga, "Hulika Ghwe Imulungu wetu, apfila pfatubetsighwa, na uwoyitsile ghamabetso ghawo mchanya mwa ghamatwi ghawo iwenyegho, na uwaleke waghoghighwe, na waghalighwe kuna isi ya utumwa. 5 Uleke kupfisa ighehile ghawo, wala inzambi yawo ileke kubaghusighwa hambele hako, kwaapfila waghalapfa ghamaligho ghawo hambele ha iwanu iwotsenga ubanda." 6 Apfo tuutsenga keli ubanda, na ubanda wose upfika nusu ya ichimo chake, kwapfila iwanu tsawana ghumoyo ghwa ukusang'ana.

7 Lekeni Sanibalati, na Tobia, na Waarabu, na Waamoni, na Waashidodi, hawahulike ka ing'onde ya ukuutsenga keli ubanda wa Yerusalemu yoghendelela pfinoghile, na amla mwaubomoke ubanda mwanza kudiwighwa, waghudubuka ng'ani. 8 Awo wose walamla hamwe watse waitowe Yerusalemu na kuwapfulugha iwanu. 9 Lekeni tumlomba Imulungu wetu yatukinge nawo aku twika iwanu wa ukukalitsa chilo na misi. 10 Baho iwanu wa Yuda wemba wila walonga,

"Tsingupfu tsa iwoduta imitsigho tsihunguka,

na kuna pfifusi pfingi pfa ukuduta,

lelo tudahatse ukuutsenga ubanda.?"

11 Na maaduwi tsetu walonga, "Ng'awatsomanya, wala ng'awatsakona baye, mbaka ahala twetwe hatutsowapfikila kwawali, na kuwakoma, na kuitenda isang'ano ayo itsighe." 12 Kuya Wayahudi iwang'ali wokala habehi nawo, watutsila na watulongela mala kumi, "Kokose kwamhundukila, watsotutsila." 13 Apfo nika wanu haisi, hachisogho ha ubanda, hanu ihakalile ng'ana hamalitsike baye ukutsengighwa, niweka iwanu wakalitse, chila wanu na lukolo lwao, akuno wakinda mapanga ghawo, na migoha yawo na minde tsawo. 14 Na nene ndola, nyinuka, niwalongela iwakulu, na wapfilongotsi, na iwanu wangi iwasighale, "Mleke kuwapfuka. Mkumbukeni IMNDEWA, iyali mkulu, na iyopfukighwa, mkawatowele ing'ondo ndughu tsenu, na iwanenu wamale na mapinga, na wehe wenu, na tsing'anda tsenu." 15 Na maaduwi tsetu hawahulike ka tumanya achila chawobama kututendela, na ka Imulungu kachipfulugha, wose tuya kuna ubanda, chila munu hana isang'ano yake. 16 Kulawa litsuwa alyo na kughendelela, nusu ya iwanu wangu waghendelela kuutsenga ubanda, na inusu ingi wakinda imigoha, na tsingao, na tsiminde, na wapfala pfisibao pfa ukwikinga. Wapfilingotsi wapanga hachisogho ha iwanu wose wa Yuda, 17 Iwanu awala iwotsenga ubanda na awala iwang'ali woduta imitsigho wasang'ana ng'onde yawo akuno moko ghumwe ghuna mtsigho, na ghumoko ghungi ghukinda isilaha yake. 18 Na chila munu iyang'ali yotsenga tsakeyoha lipanga lyake mchighudi mwake. Na imunu iyang'ali yotowa imalati tsakakala habehi na nene. 19 Nani niwalongela iwakulu, na wapfillongotsi, na iwanu wose, "Isang'ano aino ng'ulu, na ighenda kutali ghendo na twetwe tupwililika ghendo, chila munu kakutali na miyaghe mna ubanda, 20 kokose kwamtsohulika imalati yolila, tsumileni kwatuli twetwe. Imulungu wetu katsotutowela ing'ondo." 21 Apfo tughendelela ukusang'ana ing'onde ayo aku inusu ya iwanu wakinda imigoha, kulawa lupfilipfili hamitondo, mbaka hamihe, hatsilawa tsinondo kulanga. 22 Pfipfila, ghamatsuwa ghagho niwalongela iwanu apfino, "Chila munu na mtumighwa wake wakale mghati mwa Yerusalemu, ili nechilo wawe wabetetsi wetu, na nemisi watusang'anile." 23 Apfo nene, na ndughu tsangu, na watumighwa wangu, na iwabetetsi iwanikoleletse, ng'atung'ali tutsula baye ghamagwanda ghetu, chila munu kakinda silaha yake mmoko mwake, hata hatughendile kudegha ghamatsi.