1 Matsuwa chidogho hambele, wamale na mapinga wangula chililo chikulu kwa aghala ghawatendighwe na Wayahudi wayao. 2 Wamwenga wawo walonga, "Twetwe na iwana wetu wamale na mapinga twa wengi, ili tuwe wagima, twobama ingano ya ukuja." 3 Kuya wamwenga walonga apfino, "Twika poni imighunda yetu, na mighunda yetu ingi ya mitsabibu na tsing'anda tsetu ili tupate ingano tuleke kufa na inzala." 4 Pfipfila kuna wanu wamwenga iwalongile, "Tukopa tsisendi tulihe ikodi ya mfalume kwa kwika poni imighunda yetu na imighunda yetu ya mitsabibu. 5 Twetwe ng'ambe twa Wayahudi ka wawo, na wana wetu ka wana wawo, lekeni twonanahitsighwa tuwalapfe wana wetu wamale na neghe tsetu wawe watumwa. Sambi neghe tsetu wamwenga wawa watumwa, na twetwe ng'atudaha baye kulighoma, kwaapfila mighunda yetu na mighunda yetu ya mitsabibu ibokighwa na wanu wangi." 6 Nani nighudubuka ghendo ahala hanihulike ichililo chao na achila chawanongele. 7 Hanighafikitse agho mmoyo mwangu, nilamla ukuwalonga iwakulu na ipfilongotsi apfino: "Angu mdahatse kubokela inyongetsa kulawa kwa ndughu tsenu muwenyegho."

Kuya nikema mtingano mkulu ghwa iwanu niwalonge. 8 Na niwalonga apfino, "Tutenda pfatudahile ukuwaghula ndughu tsetu Wayahudi iwautsighwe kwa iwanu wa isi tsingi. Lekeni sambi mwemwe mwowautsa ndughu tsenu wenyegho, ili twetwe tuwaghule keli." Nawo tsawenyamala tulu, wahela cha ukulonga. 9 Apfo niwalonga, "Achino chamtenda ng'achinoghile baye. Angu ng'ambamighwa baye mwemwe ukumpfuka Imulungu wetu ili tuleke kusekighwa na wanu iwotuhila wa isi tsingi? 10 Nene nimwenyegho na ndughu tsangu na watumwa wangu pfipfila towatsima iwanu tsisendi na ipfijo. Apfo achino chamtenda chakuwabama iwanu walihe inyongetsa chilekighwe. 11 Muyitse sambi baha imighunda yawo, na imighunda yawo ya mitsabibu, na mighunda yawo ya mitseituni, na tsing'anda tsawo, na hata inyongetsa ya miya imwe yamsola mna ifetsa, ipfijo, na idipfai na ghamafuta." 12 Nawo wamwidika, "Tutsowoyitsila, wala ng'atutsobama chinu chingi baye. Tutsotenda ka pfautulongele." Baho niwakema iwatambika, niwalongela iwakulu na pfilongotsi welahe hambele ha iwatambika awo ka watsotenda achila chatwilaghane. 13 Kuya nikung'usa libeme lya ligwanda lyanyohile mchuno mwangu, nilonga, "Imulungu naye yamkung'use pfipfino chila munu na ing'anda yake na ing'onde yake, iyoleka kutenda achino chatwilaghane. Apfo yakung'usighwe na yakale kahela chinu ghendo." Na ghumtingano ghwose ghwa iwanu ghwidika, "Amina" Wamtunya Imulungu. Iwanu watenda ka apfila pfatwilaghane.

14 Kulawa hanisaghulighwe niwe mkulu mna isi ya Yuda kwa miyaka kumi na mili, kulawa ghumwaka ghwa ishilini mbaka ghumwaka ghwa salasini na mili ghwa mfalume Aritashasta, nene wala ndughu tsangu ng'atujile baye ichijo ichibamighwa kujighwa na imtawala. 15 Lekeni wakulu wa iwanongolele nene tsawawa mtsigho kwa iwanu, wang'ali wowabama waweng'e ipfijo na idipfai, pfipfila na wang'ali wosola sendi pfihande alubaini pfa fetsa. Hata iwatumwa wawo nawo tsawawabunza iwanu. Lekeni nene sitendile apfo baye, kwaapfila ning'ali nimpfuka Imulungu. 16 Tsandapfa ghendo ngupfu tsangu tsose mna ing'onde aino ya ukuutsenga keli ubanda, na ng'atusolile mghunda baye, na watumwa wangu tsawetingana wenyegho kung'onde. 17 Kubita agho, nene ning'ali nikuja na Wayahudi na pfilongotsi miya na hamsini, hamwe na iwanu iwotutsila kulawa isi tsili habehi na twetwe. 18 Chila tsuwa yang'ali yochinjighwa ng'ombe yumwe na ng'olo sita wanoghile na wang'uku. Na haghobita matsuwa kumi ning'ali nilapfa dipfai nyingi, lekeni nene siwabamile baye iwanu walihe ichijo ichibamighwa yeng'ighwe mtawala, kwaapfila tsanimanya iwanu wang'ali wonanahitsighwa kulapfa ipfinu. 19 Ung'umbuke, Ghwe Imulungu wang, kwa uluso waniwatendele iwanu awano.