1 Ghamalonga ghayalongile Nehemia imwana wa Hakalia. Ikala ghumwetsi ighukemighwa Kisileu, mna ghumwaka ghwa ishilini ghwa ukutawa kwa mfalume Atashasta, hanikalile mna ingome ya ghumji ghwa Shushani, 2 ndughu yangu yumwe iyakemighwe Hanani kanyangila, yeye na wanu wamwenga iwolawa Yuda, na nene niwaghutsa mbuli tsa Wayahudi iwakalile, na awala iwoyile kulawa kuna utumwa, pfipfila niwaghutsa mbuli tsa ghumji ghwa Yerusalemu. 3 Nawo wanyidika walonga, "Iwanu iwakalile wagima mna isi aila, na awala iwoyile kulawa kuna utumwa, sambi wamna maghayo makulu, na wamna ichinyala, na ubanda wa Yerusalemu ubomolighwa, na ghamalango ghake ghalakatsighwa na ghumoto."

4 Na nene hanihulike tsimbuli atso nikala hasi, nilila, nidomboketsa kwa matsuwa mengi, na nene ning'ali nifunga ukuja, na kumlomba Imulungu wa kulanga: 5 nilonga, "Ghwe MNDEWA, Imulungu wa kulanga, ghweghwe yauli Imulungu mkulu na iyopfukighwa ng'ani, iyotimilitsa lilaghano lyake na uluso wake ung'aumala baye kwa awala iwomkunda na iwokinda ghamalaghitso ghake, 6 uwambe lighutwi lyako, na tsinenge tsako tsifumbuke, utegheletse achila chanikulomba nene nimtumighwa wako, chilo na misi haniwalombela iwatumighwa wako, iwanu wa Isiraeli. Noungama tsinzambi tsa iwanu wa Isiraeli, tsatutendile hambele hako, nene na ing'anda ya aba wangu tutenda nzambi. 7 Tukutendela pfihile ng'ani, na tuleka kukinda imiko, na tsisheria, na ghamalamtsi ghaumlaghitse Musa, imtumighwa wako. 8 Nokulomba, ulikumbuke lilonga alila lyaumlaghitse Musa, imtumighwa wako, ahala haulongile, ‘Ka ng'amtsakuwa wanu wa kutogholeka baye, nitsowapwililisa kuna iwanu wa isi tsingi, 9 lekeni mng'ambuyila nene, na kutsikinda tsiamri tsangu, na kutsitenda, hata ka iwanu wenu wamna isi ya utumwa ili kutali ghendo kwaitsighila isi, nene nitsoweka hamwe, na kuwoyitsa hanu ahala hanisaghule wanitambikile.’ 10 Ghwe IMNDEWA, lola, awano watumighwa wako, na iwanu wako, yauwakombole kwa tsingupfu tsako nyingi, na kwa ghumoko ghwako ghuna ingupfu. 11 Nokudedetsa, de de! Ghwe MNDEWA, lighutwi lyako litegheletse achila chanilomba nimtumighwa wako, na aghala ghawolomba watumighwa wako, iwodeng'elela ukukupfuka, na unitendele uluso nene mtumighwa wako leloli, nitogholighwe hambele ha imunu ayuno." Mana tsa ning'ali nitenda isang'ano ya ukumwing'agha mfalume idipfai.