1 Na mna litsuwa lya ishilini na nne lya ghumwetsi aghwo ghwa saba, wanu wa Isiraeli wetingana hamwe, wafunga ukuja, akuno wapfala maghunila na webakatsa litimbwisi mwitwi mwao. 2 Waisiraeli awo webaghula na iwanu wa isi tsingi, wema na ukuungama tsinzambi tsawo, na ka wahenga wawo nawo tsawatenda gheghile. 3 Wema aku wosoma kwa matsuwa madatu mna ichitabu cha ghamalaghitso gha IMNDEWA Imulungu wawo, na masaa ghangi madatu hambele wang'ali woungama tsnzambi, na wamtamanila IMNDEWA, Imulungu wawo. 4 Kuya Walawi awano, Yeshua, Bani, Kadmieli, Shebania, Buni, Sherebia, Bani na Kenani wema mna tsingatsi na kumlomba IMNDEWA, Imulungu wawo kwa litsi kulu. 5 Na Walawi awano: Yeshua, Kadimieli, Bani, Hashabunea, Sherebia, Hodia, Shebania, Petahia wawalongela iwanu,

"Mwime na mumtunye IMNDEWA, Imulungu wenu,

mtunyeni yeye matsuwa ghose!

Na iwanu walitunye litaghwa lyake kulu, ilinulighwe kubita tsibalaka tsose na ukwirunya kose."

6 Ezira kalonga

"Ghweghwe uliyeka yuyo IMNDEWA,

Ghweghwe yuumbile kulanga na pfinu pfake,

yuumbile isi na pfose pfili mumo,

ibahali na pfinu pfose,

Na ghweghwe yuyo yupfing'ile ugima,

na ipfinu pfose pfili kulanga pfokwinamila.

7 Ghweghwe kwa IMNDEWA Imulungu,

Yumsaghule Abramu,

Yumlapfile kulawa Uri ya Wakaldayo

na yumwing'ile taghwa lingi Abrahamu.

8 Ghweghwe kumwona kotogholighwa hambele hako.

Naghwe kwilaghana naye kuweng'a watsukulu wake isi ya Wakanani,

ya Wahiti, na ya Waamori, na ya Waperizi, na Wayebusi, na ya Wagirigashi,

Na malaghano ghako kughatenda,

kwaapfila ghweghwe kotogholighwa.

9 Kughona maghayo gha iwahenga wetu

hawang'ali wa Misiri,

naghwe kuhulika ichililo chao kuna ibahali ya Shamu.

10 Kumtendela pfihulo na pfinu pfa

ukukangawatsa mfalume Farao, na watumwa

wake wose na wanu wake wose wa isi yake,

kwaapfila tsakumanya pfawawatendele

kwa ichidandali sekulu tsetu, na kwitenda

ghumwenyegho umanyike mbaka leloli aino.

11 Na kuighola ibahali hambele hawo,

nawo wabita hanu hanyalile haghati ha ibahali,

na awala iwawawinzile kuwadidimitsa mna ghamatsi ighaghendese,

ka libwe pfalitsama mna ghamatsi mengi.

12 Nemisi ghweghwe kuwalongotsa kwa

ngutso ya libingu, na nechilo kuwalongotsa kwa ngutso

ya ghumoto, kuwamwemwesela inzila yawobita.

13 Pfipfila kuhulumka akula kuchidunda Sinai,

na kulonga nawo kulawa kulanga,

kuweng'a imiko inoghile, ghamalumutsi ighanoghile na

malaghitso igholongesa, na tsiamli tsinoghile.

14 Na kuitenda Sabato yako ienzeluke imanyike kuna wawo na waikinde,

na kuweng'a ghamalaghitso na malamtsi na imiko

kubitila imtumwa wako Musa.

15 Hawakalile na nzala,

kuweng'a ichijo ichikemighwe mana kulawa kulanga,

na hawakalile na ng'ilu

kuweng'a ghamatsi kulawa mna libambalawe

Na kuwalongela waghende kuisola isi yawilaghane nawo ukuweng'a.

16 Lekeni wawo wahenga tsetu wakala na chidandali

na wawa wasughu,

ng'awakindile baye ghamalaghitso ghako,

17 Walemesa ukuhulika,

wesemwa ghendo ipfinu pfa ukukangawatsa pfauwatendele.

Lekeni wawo wawa wasughu,

kwa chidandali chao wamsaghula chilongotsi wawo woye kuna isi ya utumwa.

Lekeni ghweghwe kwa Imulungu yuleghusa tsinzambi tsa iwanu,

kumema uluso na libatsi, ng'usumka baye kughudubuka,

kuna wende wingi, naghwe ng'uwalekile baye.

18 Na ahala hawetengenetsele chinyagho cha mwana wa ing'ombe na kulonga,

‘Ayuno yuyo Imulungu wetu,

iyatulapfile mna isi ya Misiri,’

ng'ambe tsawakuligha ghweghwe.

19 Kwaapfila ghweghwe kuna libatsi sideke,

ng'uwalekile waliyeka baye kunyika,

Ingutso ya libingu ing'ali iwalongotsa nemisi ng'aiwalekile baye,

wala ingutso ya ghumoto ing'ali iwamwemwesela nechilo ng'aiwalekile baye mna inzila yawang'ali woluta.

20 Kuweng'a iloho yako inoghile iwalongele cha ukutenda,

na ichijo cha mana ng'uwemile baye, na kuweng'a ghamatsi wahotse ing'ilu yawo.

21 Kwa miyaka alubaini ghweghwe kuwatunza mna lijangwa, kuweng'a chila chinu.

Ghamagwanda ghawo ng'aghalalile baye,

wala ghamaghulu ghawo ng'aghapfimbile baye.

22 Pfipfila kuweng'a tsifalume na tsiisi tsa wanu wangi,

na kuwagholela mbaka tsiisi tsili kutali ghendo,

waibola isi ya Heshiboni ya mfalume Sihoni

na isi ya Bashani ya mfalume Ogi.

23 Na kuwongetsa iwatsukulu wawo wawa wengi ka nondo tsili kulanga,

na kuwalongotsa mna isi yuwalongele wahenga wawo waghende na kuiboka iwe yawo.

24 Apfo iwana wawo waghenda na waiboka isi ya Kanani nayo iwa yawo,

na wawatowa Wakanani iwakalile muisi,

kuweka mna ghamoko ghawo,

wafalume wawo,

na iwanu wa isi tsawo, wawatende ka pfawobama.

25 Waboka imiji ina ubanda

na isi tsina lidongo linoghile,

na tsing'anda tsimemile chila chinu chinoghile,

na pfisima ipfihimbighwe,

na mighunda ya minzabibu na minzeituni,

na mibiki ina ghamatunda mengi.

Apfo waja na weghuta na waneneha,

na wadeng'elela uluso wako.

26 Lekeni ng'awakuhulikitse baye na wakulema,

walema kukinda ghamalaghitso ghako,

na wawakoma manabii wako,

iwawakanyile wakuyile ghweghwe,

na wakuligha ghweghwe maligho makulu.

27 Apfo kuwaleka waghoghighwe na maaduwi tsawo iwawadununze,

Na hawang'ali wodununzika, wakulilila ghweghwe,

naghwe kuhulika ichililo chawo kulawa kulanga,

na kuwonela libatsi sideke,

kuweng'a iwanu iwawakombole kulawa mna ghamoko gha maaduwi tsawo.

28 Lekeni hawakalile tseghamba,

watenda keli ghehile hambele hako,

naghwe kuwaleka waghoghighwe na maduwi tsawo ili wawatawale.

Nawo hawakulilile keli,

ghweghwe kuwahulika kulawa kulanga,

na kwa libatsi lyako kuwakombola chila mala.

29 Kuwakanya ili waghoyile ghamalaghitso ghako,

lekeni kwa chidandali chawo,

waleka kukinda tsiamli tsako,

atsila imunu yang'atsikinda katsokala pfinoghile,

wakala na chidandali,

wawa wasughu na

walema ukukuhulikitsa.

30 Kwa miyaka mingi kuwadudumila,

na kuwakanya kwa Iloho wako kubitila manabii wako,

lekeni ng'awakuhulikitse baye,

apfo kuwaleka waghoghighwe na wanu wa isi tsingi tsa habehi.

31 Lekeni kwa libatsi lyako ng'uwalekile baye wahupe wala wakomighwe,

kwaapfila ghwehwe kwa Imulungu wa libatsi na uluso.

32 Apfo lelo, Ghweghwe Imulungu wetu,

Yauli mkulu,

Imulungu yana ingupfu na iyopfukighwa,

ghweghwe yuikindagha laghano lyako,

ghamaghayo ghatupatile twetwe

na wafalume wetu, na iwakulu wetu,

na watambika wetu, na manabii wetu,

na wahenga wetu, na iwanu wako wose,

kulawa matsuwa gha wafalume wa Ashuru mbaka leloli aino,

uleke kughona madodo.

33 Lekeni mna ghose agho ighatupatile,

ghweghwe tsakulamla ghoya,

kutenda apfila pfaibamighwa,

hata ka twetwe tung'ali tutenda ghehile.

34 Wafalume wetu, na iwakulu wetu,

na watambika wetu na wahenga wetu.

ng'awahulikitse baye tsiamli tsako,

ng'awakindile baye ghamalaghitso ghako,

wala imiko yako yauweng'ile.

35 Hata ka tsawapata ufalume wawo,

na wodeng'elela ighanoghile ghako ghauweng'ile

mna isi ng'ulu na inoghile yauweng'ile,

lekeni tsawalema ukukusang'anila na ukuleka ghehile.

36 Lelo lola, leloli twawatumwa,

twawatumwa ghendo mna isi aino yuweng'ile

wahenga wetu waje ghamatunda ghake,

na pfinu pfingi ipfinoghile ipfimela mumo.

37 Kwa tsinzambi tsatutendile,

ipfinu ipfimela muno pfowaghendela

wafalume yuwaghalile watutawale,

pfipfila wotawala ng'uli tsetu,

na wanyama wetu ka pfawobama.

Twamna maghayo makulu."

38 Kwa aghala ghose ighatulawile twetwe,

twakwika laghano kwa kwandika,

na twakwandika ghamataghwa gha iwakulu wetu,

na Walawi wetu, na iwatambika wetu wakwika imihuli.