1 Apfo awano ahano wawo iwekile ghumuhuli: Nehemia yuyo imkulu wa isi, mwana wa Hakalia, na Sedekia, 2 Iwatambika iwekile ghumhuli wawo wano, Seraya, Azaria, Yeremia, 3 Pashuri, Amaria, Malikiya, 4 Hatushi, Shebania, Maluki, 5 Harimu, Meremoti, Obadia, 6 Danieli, Ginetoni, Baruki, 7 Meshulamu, Abiya, Miyamini, 8 Maazia, Biligai na Shemaya. 9 Pfipfila Walawi nawo tsawabaho. Nawo wawo awano: Yeshua, mwana wa Azania, Binui, yumwe wa iwana wamale wa Henadadi, na Kadimieli. 10 Na ndugu tsawo iwekile ghumuhuli wawo awano: Shebania, Hodia, Kelita, Pelaya, Hanani, 11 Mika, Rehobu, Hashabia, 12 Zakuri, Sherebia, Shebania, 13 Hodia, Bani na Beninu.

14 Awao wawo pfilongotsi wawo: Paroshi, Pahath moabu, Elamu, Zatu, Bani, 15 Buni, Azigadi, Bebai, 16 Adoniya, Bigwai, Adini, 17 Ateri, Hezekia, Azuri, 18 Hodia, Hashumu, Bezai, 19 Harifu, Anatoti, Nebai, 20 Magipiashi, Meshulamu, Heziri, 21 Meshezabeli, Sadoki, Yadua, 22 Pelatia, Hanani, Anaya, 23 Hoshea, Hanania, Hashubu, 24 Haloheshi, Piliha, Shobeki, 25 Rehumu, Hashabina, Maaseya, 26 Ahia, Hanani, Anani, 27 Maluki, Harimu, na Baana.

28 Hamwe na iwasighale, watambika na Walawi na iwokalitsa ghamalango na awala iwakwimba na iwosang'ana mna ing'anda ya Imulungu na wanu wose iwebaghule na iwanu wa tsiisi tsahabehi, wawinze malaghitso gha Imulungu hamwe na wehe tsawo, wana wawo wose wamale na mapinga iwomanya na kutanga, 29 Wose ghendo tuwa chinu chimwe hamwe na ndughu tsetu, na wakulu wetu mna ukwilaha ka tutsokala kwa kuwinza ghamalaghitso gha Imulungu, ghayamwing'ile Musa, imtumighwa wake. Na tutsoghakinda ghamalaghitso ghose, na malamutsi na imiko yose ya IMNDEWA, Imulungu wetu. 30 Na ng'atutsowalapfa baye neghe tsetu wakwelighwe na iwanu wa isi tsingi, wala wanetu wamale wawakwele wana wawo. 31 Na wanu wa isi tsingi tsa habehi wang'aghala pfinu pfawo wautse au pfijo pfawo mna litsuwa lya sabato, twetwe ng'atutsoghula baye mna litsuwa lya Sabato wala tsuwa lingi lienzeluke. Chila mna ghumwaka ghwa saba ng'atuilima baye mighunda yetu na tutsoleka kuwadai iwanu ghamadeni. 32 Twetwe twikila tuwenyegho lilaghitso lya ukulapfa glamu nne tsa fetsa chila mwaka iwe ya kughulila ipfinu pfa ing'anda ya Imulungu wetu. 33 Itsoghula pfighate pfienzeluke, na nambiko tsa ipfijo na nambiko tsa wanyama wa ukulakatsighwa, na kughulila nambiko ya Sabato, nambiko tsa chihungo cha ukulawa kwa ghumwetsi, na itsoghula nambiko tsa pfihungo pfingi pfawatulaghitse, na nambiko tsa ukuleghusa tsinzambi, tsa kuwalamlitsa Waisiraeli na Imulungu wao, na itsoghula chila chinu ichibamighwa mna ing'anda ya Imulungu wetu. 34 Twetwe wose, watambika na Walawi tutsakwasa simbi chila mwaka tulamle ka lukolo lwachi lutsoghala tsingodi tsa ukulakatsila tsinambiko hana imatsabahu ya IMNDEWA Imulungu wetu ka apfila pfayandikighwe mna ghamalaghitso. 35 Na chila mwaka tutsoghala kuna ing'anda ya IMNDEWA ipfijo pfatukwanza ukupfuna na litunda ilikwanza ukwipfa lya chila mbiki. 36 Ka apfila pfayandikighwe mna ghamalaghitso, tutsoghala kwa iwatambika iwosang'ana amwo chila mwana mmale chaudele iyoneka mna tsing'anda tsetu, ili wekighwe hambele ha Imulungu, pfipfila tutsoghala chila mwana iyolongola koneka wa ing'ombe, wa imene, na wa ing'olo. 37 Pfipfila tutsoghala kwa iwatambika, utimbo wa ipfijo pfatukwanza kupfuna pfa imighunda yetu, nambiko tsetu tsa ipfijo, ghamatunda gha imibiki yetu yose, dipfai yetu ya sambi, na ghamapfuta gha mitseituni. Na tutsoghala itsaka yetu kwa Walawi iwobokela itsaka kulawa kuna tsikaye tsatukala. 38 Imtambika iyolawa mna lweleko lwa Aruni kobamighwa yakale baho hamwe na Walawi ahala Walawi hawobokela itsaka, na Walawi awo wobamighwa walapfe lifungu lya kumi lya itsaka ayo kuna ing'anda ya Imulungu wetu, wakaike mna tsikano tsili mna ing'anda ya Imulungu. 39 Wanu wa Isiraeli na Walawi watsoghala tsinambiko tsa ipfijo, idipfai ghamapfuta gha nzeituni kuna ipfiheleto ipfikala ipfinu pfenzeluke, na pfawokala iwatambika, na iwokalitsa ghamalango na iwanu iwakwimba. Ng'atutsoisemwa baye ing'anda ya Imulungu wetu.