1 Awano wawo watambika na Walawi iwoyile kulawa akula kwawahamisighwe, hamwe na Zerubabeli mwana wa Shealitieli, na Yoshua,

Seraya, Yeremia, Ezra, 2 Amaria, Maluku, Hatushi, 3 Shekania, Rehumu, Meremoti, 4 Ido, Ginetoni, Abiya, 5 Miyamini, Moadia, Biliga, 6 Shemaya, Yoyaribu, Yedaya, 7 Salu, Amoki, Hilikia na Yedaya. Awano tsawakala wakulu wa iwatambika na ndughu tsawo mna ghamatsuwa gha Yoshua hayawile mtambika mkulu.

8 Na Walawi iwoyile wawo awano: Yeshua, Binui, Kadimieli, Sherebia, Yuda na Matania, iyang'ali yolongotsa tsiwila tsa ukulonga mighende aku ndughu tsake womwapfila. 9 Nawo Bakibukia na Uno, hamwe na Walawi wangi iwang'ali wakwimagha welolesa na wayawo, hawakwimba kwa ukwidikila.

10 Yoshua kamweleka Yoyakimu, Yoyakimu kamweleka Eliashibu, Eliashibu kamweleka Yoyada, 11 Yoyada kamweleka Yonasani na Yonasani kamweleka Yadua.

12 Mna ghamatsuwa gha mtambika mkulu Yoyakimu, iwatambika awano tsawakala wakulu wa tsikolo, Meraya tsamkulu wa lukolo lwa Seraya, Hanania tsamkulu wa lukolo lwa Yeremia, 13 Meshulum tsamkulu wa lukolo lwa Ezra, Yehohanani tsamkulu wa lukolo lwa Amaria, 14 Yonasani tsamkulu wa lukolo lwa Maluki, na Yosefu tsamkulu wa lukolo lwa Shebania, 15 Adina tsamkulu wa lukolo lwa Harimu, Helikai tsamkulu wa lukolo lwa Meraioti, 16 Zekaria tsamkulu wa lukolo lwa Ido, Meshulamu tsamkulu wa lukolo lwa Ginetoni, 17 Zikiri tsamkulu wa lukolo lwa Abiya, Piltai tsamkulu wa lukolo lwa Moadia, 18 Biligai, Shamua tsamkulu wa lukolo lwa Biligai, Yehonasani tsamkulu wa lukolo lwa Shemaya, 19 Matenai tsamkulu wa lukolo lwa Yoyaribu, Yedaya, Uzi tsamkulu wa lukolo lwa Yedaya, 20 Kalai tsamkulu wa lukolo lwa Salu, Eberi tsamkulu wa lukolo lwa Amoki, 21 Hashabia tsamkulu wa lukolo lwa Hilikia, na Netaneli tsamkulu wa lukolo lwa Yedaya.

22 Wakulu wa kaya tsa Walawi, mna ghamatsuwa gha Eliashibu, Yoyada, Yohana, na Yadua, pfipfila na kolo tsa Watambika tsatsandikighwa mchitabu mna ghamatsuwa gha mfalume Dario wa Uajemi. 23 Wakulu wa tsikolo tsa Walawi nawo tsawandikighwa mna chitabu cha ukukumbuka mbaka mna matsuwa gha Yohanani mtsukulu wa Eliashibu.

24 Na pfilongotsi wa Walawi tsawakala awano, Hashabia, Sherebia, Yeshua mwana wa Kadimieli na wayao, tsaweghola mna makingili meli iwang'ali wakwimba kwa ukwidikila wila tsa kumtunya na kumlongela mighede Imulungu akuno welolesa, ka pfayalagitse mfalume Daudi, imunu wa Imulungu. 25 Matania, Bakibukia, Obadia, Meshulamu, Talimoni na Akubu, wawo wang'ali wokalitsa tsikano itsikalile hana ghamalango. 26 Awano tsawasang'ana mna ghamatsuwa gha Yoyakimu, mwanaghe Yeshua mwana wa Yozadaki, na mna ghamatsuwa gha Nehemia iyawile mkulu wa isi, na mna ghamatsuwa gha Ezra, imtambika na iyamanyile ghoya ghamalaghitso.

27 Apfo hawang'ali woulapfa kwa Imulungu ubanda wa Yerusalemu, Walawi wabamighwa chila hanu kwawakalile na watsa wadeng'elele ukuulapfa ubanda kwa Imulungu, waulapfa kwa kudeng'elela, kwa kulonga mighede na kwa ukwimba na kwa ukutowa malati, pfimbeta, na pfing'weng'we. 28 Pfipfila iwanu iwakwimba wetingana hamwe kulawa ipfijiji pfose pfitsunguluke Yerusalemu na ipfijiji pfa Wanetofati, 29 pfa Beti Giligali, pfa Geba, na pfijii pfa Azimaweti, kwaapfila iwanu iwakwimba tsawatsenga pfijiji pfawo mmbalimbali kutsunguluka Yerusalemu. 30 Watambika na Walawi hawetendile wenyegho wele hambele ha Imulungu, pfipfila wawatenda iwanu wele, na ghamalango, na ubanda wele. 31 Baho niwaghala wakulu wa Yuda mchanya mwa ubanda, walongotse makingili meli gha iwanu iwang'ali wakwimba wolonga mighede kwa Imulungu, aku welongotsa hamwe, mtingano ghumwe ghughenda ubali wa kujilo, kwalili Lilango lya Tsalala. 32 Naye Hoshaya kawawinza awo iwembile akuno kelongotsa na nusu ya pfilongotsi wano wa Yuda, 33 Na iwatambika awano aku wakinda tsimalati tawo tsawawinza, Azaria, Ezra, Meshulamu, 34 na Yuda, Benjamini, Shemaya, Yeremia, 35 na kelongotsa, Zekaria, yelekighwe na Yonasani, Yonasani yelekighwe na Shemaya, Shemaya yelekighwe na Matania, Matania yelekighwe na Mikaya, Mikaya yelekighwe na Zakuri, naye Zakuri yelekighwe na Asafu. 36 Na ndughu tsake awano tsawatowa ipfinu pfaukwimbila ka apfila pfayang'ali yotowagha mfalume Daudi, imunu wa Imulungu. Nawo wawo awano, Azareli, Milalai, Gilalai, Maai, Netaneli, Yuda na Hanani, naye mmanya malaghitso Ezra kawalongolela. 37 Na hana Lilango lya Mbwibwi wadina tsingatsi waghenda kwaghuli ghumji ghwa Daudi, waibita ing'anda ya Daudi mbaka kwalili Lilango lya Ghamatsi, ubali wa mashaliki. 38 Na likingili lya keli lya iwanu iwalongile mighede tsaghughenda ubali wa kumoso mchanya mwa ubanda, na nene niwawinza akuno nilongotsa na nusu ya iwanu. Tubita mnala ghwa Tanulu mbaka kuna Ubanda Mghatsi. 39 Na kulawa aho tubita hana Lilango lya Efuraimu, na hana Lilango lya Yeshana, Lilango lya Wasomba, hana Ghumnala ghwa Hananeli na hana Ghumnala ghwa Miya Imwe mbaka kune Lilango lya Wang'olo. Na ukwilongotsa kwetu kumalila hana Lilango lya Wabetetsi. 40 Baho ghamakingili ghose meli ghe wila wa ukumlongela Imulungu mighede, tsaghema hana ing'anda ya Imulungu, hamwe na nene na inusu ya pfilongotsi. 41 Pfipfila na iwatambika awano nawo tsawatowa tsimalati tsawo, Eliakimu, Maaseya, Miniamini, Mikaya, Eliehoenai, Zekaria na Hanania, 42 Maaseya, Shemaya, Eleazari, Uzi, Yehohanani, Malikiya, Elamu na Ezeri, na awala iwakwimba tsawemba akuno wolongotsighwa na Yezirahia. 43 Tsuwa alyo walapfa nambiko nyingi, na wadeng'elela kwaapfila Imulungu tsakawatenda wawe na ndeng'elo ng'ulu. Pfiifila iwapinga na wana wose tsawadeng'elela. Ilukenze na imilutsi ya wanu kulawa Yerusalemu ihulikika kutali.

44 Tsuwa alyo iwanu wasaghulighwa walolese pfiheleto ipfikala pfinu ipfilapfighwa kwa ing'anda ya Imulungu, pfijo pfa ukulimbula, fungu lya kumi,. iwanu wano tsaweng'ighwa ingonde ya ukukunga ipfijo kulawa kuna imighunda ili habei na tsikaye tsa iwatambika na tsa Walawi ka apfila ghamalaghitso pfaghobama. Kwaapfila Wayuda tsawawadeng'elela iwatambika na Walawi kwa kuwasang'anila. 45 Wawatenda iwanu wele hambele ha Imulungu wawo, na iwanu iwakwimba na iwokalitsa ghamalango nawo watenda pfipfo, ka pfayalaghitse mfalume Daudi na Selemani imwanaghe. 46 Kulawa ghumwande mna ghamatsuwa gha Daudi na Asafu, imunu iyadahile ukwimba, tsakukala na chilongotsi iyowalongotsa iwanu iwakwimba, na tsakuna na wila tsa ukumdeng'elela na tsakumlongela mighede Imulungu. 47 Apfo mna ghamatsuwa Zerubabeli na Nehemia ghawakalile wagima, iwanu wose wa Isiraeli wang'ali wolapfa pfinu pfao chila tsuwa kuweng'a iwanu iwakwimba na iwokalitsa ghamalango. Iwanu pfipfila wang'ali wolapfa pfinu pfawo kwa Walawi, nawo Walawi wabaghula pfinu apfo kuwagholela iwana wa Haruni.