1 Lelo pfilongotsi wa iwanu wakala Yerusalemu na iwanu wose wasa simbi wasaghule kaya imwe kulawa mna chila kaya kumi itse ikale Yerusalemu ghumji ghwenzeluke, na atsila tsingi tisa tsikale mna imiji yawo. 2 Na iwanu wawatunya awala wose iwabamile wenyegho kukala Yerusamu. 3 Hata apfo kuna pfilongotsi wa iwanu iwatsile kukala Yerusalemu, na imiji ya Yuda, Waisiraeli, iwatambika na Walawi, iwokalitsa ghamalango, na iwatumighwa wa Selemani tsawakala mna tsikaya tsawo wenyegho, mna imiji yawo. 4 Wanu wamwenga wa likabila lya Yuda, na wa likabila lya Benjamini tsawakala kuna ghumji ghwa Yerusalemu. Iwanu wa likabila lya Yuda iwakalile kuna ghumji ghwa Yerusalemu awano hano. Ataya, yelekighwe na Uzia, Uzia naye yelekighwe na Zekaria, Zekaria yelekighwe na Amaria, Amaria naye yelekighwe na Shefatia, naye Shefatia yelekighwe na Mahalaleli, wose awo walawa mna lukolo lwa Peresi. 5 Pfipfila Maaseya yelekighwe na Baruku, Baruku yelekighwe na Kolihoze, Kolihoze yelekighwe na Hazaya, Hazaya yelekighwe na Adaya, Adaya yelekighwe na Yoyaribu, naye Yoyaribu yelekighwe na Zekaria, iyolawa mna lweleko lwa Shilo. 6 Iwanu wa lukolo lwa Peresi iwakalile Yerusalemu tsa wanu miya nne na sitini na nane iwana ngupfu. 7 Wanu wa lukolo lwa Benjamini iwakalile Yerusalemu awano ahano: Salu kelekighwa na Meshulamu, Meshulamu kelekighwa na Yoedi, Yoedi kelekighwa na Pedaya, Pedaya kelekighwa na Kolaya, naye Kolaya kelekighwa na Maaseya, Maaseya kelekighwa na Itieli iyolawa mna lweleko lwa Yeshaya. 8 Pfipfila ndughu tsake Gabai na Salai tsawapfika miya tisa na ishilini na wanane. 9 Yoeli, mwana wa Zikiri, tsa chilongotsi wawo, na Yuda mwana Hasenua tsa chilongotsi wawo wa keli.

10 Na iwatambika Yedaya, Yoyaribu, Yakini, na 11 Seraya, mwana wa Hilikia, mwana wa Meshulamu, mwana wa Sadoki, mwana wa Merayothi, mwana wa Ahitubu, mkulu wa ing'anda ya Imulungu. 12 Wose wose tsawapfika miya nane ishilini na weli, na hamwe na ndughu tsawo iwasang'ane ing'onde mna ing'anda ya Imulungu, na Adaya, mwana wa Yerohamu, mwana wa Pelalia, mwana wa Amzi, mwana wa Zekaria, mwana wa Pashuri, mwana wa Malikiya. 13 Na ndughu tsake iwawile pfilongotsi wa tsikolo tsa aba tsawo, wose tsa miya mbili na alubaini na weli. Pfipfila tsakuna Amashisai kelekighwa na Azareli, Azareli kelekighwa na Azai, Azai kelekighwa na Meshilemoti, naye Meshilemoti kelekighwa na Imeri 14 hamwe na ndughu tsake, wamale iwadahile kwitowa, wose wose tsa miya imwe na ishilini na wanane, chilongotsi wawo tsa Zabidieli mwana wa Hagedolimu. 15 Na Walawi iwakalile kuna ghumji ghwa Yerusalemu wawo awano, Shemaya kelekighwa na Hashubu, Hashubu kelekighwa na Azirikamu, Azirikamu kelekighwa na Hashabia, Hashabia kelekighwa na Buni. 16 Shabetai na Yozabadi, pfilongotsi weli wa Walawi, iwemilile ng'onde tsa kunze mwa ing'anda ya Imulungu. 17 Matania, yelekighwe na Mika, Mika kelekighwa na Zabidi, Zabidi kelekighwa na Asafu, iyawalongotse iwanu mna ukwimba na ukumlongela Imulungu mighede. Naye Bakibukia tsakamwapfila. Na Obadia kelekighwa na Shemaya, Shemaya kelekighwa na Galali, naye Galali kelekighwa na Yedutuni. 18 Na Walawi wose iwakalile mna ghumji ghwenzeluke ghwa Yerusalemu tsa miya mbili na semanini na wane. 19 Na iwanu iwakalitse ghamalango iwakalile Yerusalumu tsa, Akubu, Talimoni na ndughu tsawo, wose tsa wanu miya imwe na sabini na weli. 20 Na Waisiraeli wamwenga, hamwe na iwatambika na iwalawi tsawakala mna imiji yose ya Yuda, chila munu hanu hake. 21 Lekeni iwasang'ane mna ing'anda ya Imulungu tsawakala Yerusalemu hana ichidunda cha Ofeli, na wang'ali wolongotsighwa na Ziha na Gishipa.

22 Na chilingotsi wa Walawi iwakalile Yerusalemu wawo awano: Uzi yelekighwe na Bani, Bani yelekighwe na Hashabia, Hashabia yelekighwe na Matania, Matania yelekighwe na Mika iyolawa mna lukolo lwa Asafu. Iwanu wa lukolo aluno weng'ighwa ing'onde ya ukwimba mna ing'anda ya Imulungu. 23 Tsakuna laghitso kulawa kwa mfalume liwabamile wepangile mna chila tsuwa tsina nani wembe. 24 Na Petahia, mwana wa Meshezabeli, iyolawa mna lukolo lwa Zera mna likabila lya Yuda yang'ali msenga wa mfalume mna ukutenda pfinu pfose pfa iwanu wa Yuda.

25 Wanu wamwenga tsawakala mna imiji ili habehi na mighunda yawo, na wanu wamwenga wa likabila lya Yuda tsawakala Kiriati Ariba na pfijiji pfake na wakala Diboni na Yekabizeeli hamwe na kaye tsili habehi natso. 26 Pfipfila wamwenga tsawakala mna imiji ya Yeshua, Molada, na Beti Peleti, 27 Hazarishuali, na Beeri Sheba na pfijiji pfili habehi. 28 Wamwenga wakala mna imiji ya Sikilagi, Mekona na pfijiji pfili habehi natso. 29 Wamwenga wakala mna imji ya Enirimoni, Sora, Yarimuti, 30 Zanoa, Adulamu na pfijiji pfili habehi natso, wakala Lakishi na mighunda yake, na Azeka na kaye tsake. Apfo iwanu wa Yuda wakala haghati ha Beeri Sheba na ulwanda lwa Hinomu. 31 Iwanu wa likabila lya Benjamini wakala Geba, Mikimashi, Aiya, Beteli na pfijiji pfake, 32 wamwenga wakala Anathothi, Nobu, Anania 33 Hazori, Rama, Gitaimu, 34 Hadidi, Seboimu, Nebalati, 35 Lodi na Ono chikalile ulwanda lwa mafundi. 36 Na Walawi wamwenga wa Yuda tsawakala ako Benjamini.