1 Lelo Sanibalati, na Tobia, na Geshemu, imunu wa Arabu, na iwanu wamwenga iwotuhila hawahulike ka nimalitsa kuutsenga keli ubanda na wala haduhu hanu halekighwe, na matsuwa agho tsasina nyike milango baye mna ghamalango ghake gha ukwingilila, 2 Sanibalati na Geshemu wawatuma wanu kuna nene, walonga, "Tuhulumke tuketingane hana tsikaye tsili mchiwala cha Ono." Kumbe wawo wang'ali wobama wakandaghe. 3 Na nene niwatuma wanu kuna wawo niwalongela, "Ing'onde yanisang'ana nene ng'ulu sideke nene sihulumka baye ako, Angu pfihi nitse ako niileke ing'onde ime?" 4 Nawo wanitumila wanu mala nne kunongele imbuli yiyino, na nene niwedika chichila. 5 Baho Sanibalati kamtuma munu wake kuna nene mala ya tano akuno kakinda ibaluwa ili mwatsi mmoko, 6 nayo yandikighwa apfino, "Kuna mbuli tsenela mna tsiisi tsili habehi, na Geshemu kolonga mbuli atso tsolongesa ghendo, ka ghweghwe na Wayahudi mwobama kumbiduka mfalume, ichinu achino chicho ichiwatenda mwemwe mtsenge ubanda, na kwa imbuli ayo yatuhulike ghweghwe kobama kuwa mfalume wawo, 7 pfipfila ghweghwe kuwasaghula manabii Yerusalemu watangatseghe kulonga: ‘Mna isi ya Yuda kuna mfalume!’ Lelo mfalume Aritashasta katsolongelighwa tsimbuli atsino. Apfo utse twitingane tulamle cha ukutenda." 8 Na nene nimtumila wanu, nonga, "Agho ghaulonga ng'ana ghatendeke baye, agho koghalonga ghwegwe ghumwenyegho kalawa mwitwi mwako." 9 Wose tsawabama ghendo kututenda tupfuke, akuno wolonga, "Ghamoko ghawo ghatsoleghela ukusang'ana, na ing'onde ng'aitsomala baye." Baho nilomba nonga, "Ghwe Imulungu wangu nyongetse ingupfu."

10 Tsuwa limwe ng'enda ukaye kwa Shemaya, mwana wa Delaya mwana wa Mehetabeli, iyohighwe mng'anda mwake, kanongela apfino: "Twitingane mna ing'anda ya Imulungu, na imilango yake tuhinde twipfise, kwaapfila wakutsa kukukoma, ona, leloli nechilo wakutsa kukukoma ghendo." 11 Lekeni nonga, "Angu munu ka nene nitsume? Angu munu ka nene nodaha kutsumila kuna ing'anda ya Imulungu nikaukombole ugima wangu? Mbe, sighenda baye!" 12 Apfo nitanga ka Imulungu ng'amtumile baye, lekeni kanitabilia pfihile kwaapfila Tobia na Sanibalati tsawamhonga. 13 Tsawamliha yanitende nene nipfuke, na nitende nzambi, apfo wang'alihinyile litaghwa lyangu na kunighela chinyala. 14 Nilomba, "Ghwe Imulungu, ukumbuke ghose aghala ghawatendile Tobia na Sanibalati, pfipfila umkumbuke Noadia nabii pinga na manabii wose iwabamile kunitenda nene nipfuke."

15 Apfo ubanda umala ukutsengighwa mna litsuwa lya ishilini na tano lya mwetsi ighukemighwa Eluli. Ubanda utsengighwa kwa matsuwa hamsini na mbili. 16 Maaduwi wose iwotuhila iwali mna isi tsose itsitutsunguluka hawahulike tsawapfuka ghendo, na wona chinyala ghendo, kwaapfila tsawamanya ghendo ka ing'onde aino tsaimalitsika kwa kwapfilighwa na Imulungu wetu. 17 Pfipfila mna ghamatsuwa agho pfilongotsi wa Yuda wang'ali womtumila Tobia baluwa, naye Tobia tsakaghendelela ukuwedika kwa baluwa. 18 Wanu wengi iwali Yuda tsawelaha kumtegheletsa Tobia, kwaapfila tsakamkwela neghe Shekania mwana wa Ara, na imwanaghe Yehonani tsakamkwela neghe Meshulamu, mwana wa Berekia. 19 Pfipfila wanongela ighanoghile ghayatendile Tobia, nawo wang'ali womlongela chila chinu chanongile. Na Tobia yang'ali yotuma tsibaluwa kunenda nene nipfuke.