1 Apfo Eliashibu, imtambika mkulu, hamwe na ndughu tsake iwatambika, waghenda kutsenga keli Lilango lya Wang'olo, walitenda lyele, weka imilango yake, na waghendelela kutsenga mbaka kuna ghumnala ghwa Mia Imwe, nagho pfipfila waghwika kwa Imulungu a watsenga keli mbaka kwaghuli ghumnala ghwa Hananeli. 2 Na hayalawile yeye watsenga iwanu wa Yeriko, na hawalawile iwanu wa Yeriko, katsenga Zakuri imwana wa Imri. 3 Na Lilango lya Somba, litsengighwa keli na iwana wa Senaa, watengenetsa imighamba ya chuma na waimisa imilango yake na ghamakomeo ghake. 4 Hawatsighile awo, katsenga Meremoti imwana wa Uria, na mtsukulu wa Hakozi. Hayalawile ayo, katsenga Meshulamu imwana wa Berekia, na mtsukulu wa Meshezabeli. Kuya Sadoki, imwana wa Baana naye katsenga. 5 Hayatsighile Sadoki watsenga iwanu wa ghumji ghwa Tekoa, lekeni pfilongotsi wao walema ghendo ukusang'ana ing'onde yaweng'ighwe na iwakulu wao.

6 Na Lilango lya Ghumwande litsengighwa keli na Yoyada, imwana wa Pasea, na Meshulamu imwana wa Besodeiya, watengenetsa imighamba yake, weka imilango yake, ghamakomeo, na tsimalamingo tsake. 7 Hawatsighile awo, iwatsengile keli tsa Melatia, iyolawa mna ghumji ghwa Gibeoni, na Yadoni iyolawa mna ghumji ghwa Meronoti, na iwanu wa Gibeoni, na wa Mispa, awo tsawalongotsighwa na imkulu wa ghumkoa ighuli kumwambu mwa ghumto Eufurati. 8 Hawatsighile iwanu awo, kautsenga Uzieli, imwana wa Harihaiya, yumwe wa mafundi wa nzahabu. Na hayamalitse yeye, katsenga keli Hanania, yumwe wa mafundi iwotengenetsa ghamapfuta ighonung'ila ghoya. Nawo waghutsenga keli ghumji ghwa Yerusalemu mbaka ghupfika hana Ubanda Mghatsi. 9 Kuya hawatsighile wawo, katsenga Refaiya, imwana wa Huri, imkulu wa inusu ya ghumji ghwa Yerusalemu. 10 Hayatsighile yeye, Yedaya, imwana wa Harumafu, katsenga keli ubanda hanu ihelolesa na ing'anda yake. Kuya katsa Hatushi, imwana wa Hashabineia, katsenga hanu hawinzile. 11 Naye Malikiya, imwana wa Harimu, na Hashubu, imwana wa Pahati Moabu, watsenga keli hanu hawinzile, na watsenga Ghumnala ghwa Ghamatanulu. 12 Kulawa aho, iyatsengile keli Shalumu imwana wa Haloheshi, iyang'ali yolongotsa nusu ya ghumji ghwa Yerusalemu, yeye katsenga aku neghe tsake womwapfila. 13 Lilango lya Kulwanda litsengighwa keli na Hanuni, na iwanu iwokala Zanoa, walitsenga, wemisa imilango yake, weka ghamakomeo ghake, na tsimalamingo tsa ukuhindila, na wautsenga keli ubanda kwa utali wa futi elufu imwe na miya tano, mbaka upfika kwalili Lilango lya Tsalala. 14 Lekeni Lilango lya Tsalala litsengighwa keli na Malikiya, imwana wa Rekabu, mkulu wa isi ya Beti Hakeremu, kalitsenga, kemisa imilango yake, keka ghamakomeo ghake, na tsimalamingo tsake tsa ukuhindilia. 15 Na Lilango lya Imbwibwi litsengighwa keli na Shalumu, imwana wa Kolihoze, imkulu wa wilaya ya Mispa, kalitsenga keli, katima ichiswili hanu aho, kemisa imilango yake, keka ghamakomeo ghake, na tsimalamingo tsake tsa ukuhindilia. Na katsenga ubanda wa Tsimbu lya Siloamu lili habehi na ibostani ya mfalume, mbaka kuna tsingatsi itsihulumka kulawa kuna ghumji ghwa Daudi. 16 hayatsighile yeye, katsenga keli Nehemia, imwana wa Azibuki, mkulu wa nusu ya wilaya ya Beti Zuri, katsenga mbaka hanu helolesa na ghamakaburi gha Daudi, na mbaka litsimbu litengenetsighwe, na mbaka kuna ing'anda ya maaskiali wana ingupfu.

17 Hayatsighile Nehemia, watsa Walawi kuutsenga keli ubanda: Kanza Rehumu imwana wa Bani, kuya Hashabia, mkulu wa nusu imwe ya wilaya ya Keila, yeye kawatsengela keli ubanda iwanu wa wilaya yake. 18 Na hayatsighile yeye, watsenga ndughu tsawo, iwalongotsighwe na Bavai, imwana wa Henadadi, mkulu wa nusu ya kabili ya wilaya ya Keila. 19 Kuya katsenga keli Ezeri, imwana wa Yeshua, mkulu wa Mispa, hanu hangi henuke helolesa na ing'anda ya ukwikila tsisilaha, ahala hana ikona ya ubanda. 20 Kuya Baruki, imwana wa Zabai, keyunda ghendo, katsenga keli hanu hangi, kulawa ahala hana ikona ya ubanda mbaka hanu ha ukwingilila kuna ing'anda ya mtambika mkulu Eliashibu. 21 Hayatsighile yeye, Melemoti mwanaghe Uria, na mtsukulu wa Hakozi, katsenga keli hanu hangi kulawa hana lilango lya ing'anda ya Eliashibu mbaka kwaitsighile ing'anda ya Eliashibu.

22 Hayatsighile, watsenga keli iwatambika, iwang'ali wokala habehibehi na ghumji. 23 Kulawa wawo Benjamini na Hashubu watsenga keli hanu helolesa na tsing'anda tsawo. Na kulawa wawo Azaria mwana wa Maaseiya, na mtsukulu wa Anania, katsenga keli habehi na ing'anda yake. 24 Hayatsighile, Binui, imwana wa Henadadi naye katsenga keli hanu hangi, kanzila hana ing'anda ya Azaria mbaka ubanda hauhunduka, na mbaka hana imembe. 25 yatsighile yeye, hanu hangi hatsengighwa keli na Palali, mwana wa Uzai, kulawa ahala haupindile ubanda, na ghumnala ighulawilila uchanya, kuna ing'anda ya hachanya ya mfalume, habehi na ichibwalu cha iwabetetsi. Kulawa yeye, Pedaya imwana wa Paroshi, 26 hamwe na iwatumighwa wa ing'anda ya Imulungu, iwang'ali wokala mna ichidunda cha Ofeli, watsenga keli hanu helelosa na Lilango lya Ghamatsi, lili ubali wa Mashariki, na ubali wa ghumnala mtali ighulawilila uchanya.

27 Kulawa wawo, iwanu wa Tekoa watsenga lwakeli hanu hangi, helolesa na ghumnala mkulu mtali, mbaka kwauli ubanda wa Ofeli. 28 Na kulawa hachanya ha Lilango lya Wafalasi watsenga keli iwatambika, chila yumwe katsenga hanu helolesa na ing'anda yake. 29 Kulawa awo, Zadoki imwana wa Imeri, katsenga lwakeli hanu hangi helolesa na ing'anda yake. Na kulawa yeye, katsenga keli hanu hangi Shemaya mwana wa Shekania, iyobetetsa Lilango lya Mashaliki. 30 Hayalawile yeye, Hanania mwana wa Shelemia, na Hanuni imwana wa sita wa Zalafu, watsenga hamwe hanu hangi. Kuya Meshalumu mwana wa Barekiya katsenga keli hanu hangi helelosa na ichiheleto chake. 31 Kulawa yeye, Malikiya, mwana wa iyotengenetsa pfinu pfa nzahabu, katsenga keli hanu hangi mbaka ing'anda yawokala iwatumighwa wa ing'anda ya Imulungu na ya wachulutsi, ilolesa na Lilango lya Ukaghutsi, na mbaka kuna ichiheleto cha kuchiswili cha imembe. 32 Na kulawa ichumba cha kuchiswili cha imembe, mbaka kuna Lilango lya Wang'olo, watsenga keli iwotengenetsa ipfinu pfa nzahabu na iwachulutsi.