1 Ezra hayang'ali yolomba na kutoghola ka katenda nzambi tsake aku kolila na keghwisa hasi hambele ha ing'anda ya Imulungu, Waisiraeli wengi, wamale na mapinga na iwana tsawetingana habehi naye na walila kwa usungu mkulu. 2 Baho Shekania imwana wa Yehieli wa lukolo lwa Elamu kamlongela Ezra, "Ng'atumuhulikitse Imulungu baye kwa kukwela iwapinga wa chigheni wa isi atsino, lekeni hata apfo hana lolelo kwa iwanu wa Isiraeli. 3 Apfo twike laghano na Imulungu wetu, tuwaleke wapinga awano, na iwana wawo kwa kuwinza aghala ghaulongile ghweghwe, na aghala ghawalongile wanu wangi iwokinda kwa kughudema ghamalaghitso gha Imulungu. Ghose ghatendeke ka ghamalaghitso pfagholonga. 4 Lelo winuke, kwaapfila imbuli aino yamna ghamoko ghako, twetwe tutsakuwa hamwe naghwe. Wighume ghumoyo na utende apfo." 5 Ezra kandusa ukuwatenda iwatambika, pfilongotsi, Walawi, na Waisiraeli wose welahe ka watsotenda ka pfailongighwe, nawo watoghola ukwilaha. 6 Kuya Ezra koka hambele ha ing'anda ya Imulungu, kaghenda ukaye kwa Yehohanani mwana wa Eliashibu. Ezra kakala ako chilo chighima bila kuja wala ukunwa chinu chochose kwaapfila yang'ali yolila kwa litotso alila lya iwanu iwoyile kulawa kuna isi ya mhamo 7 Usenga utumighwa chila hanu kuna isi ya Yuda na kuna ghumji ghwa Yerusalemu ka iwanu wose iwalawile kuna isi ya mhamo wetingane Yerusalemu. 8 Usenga awo ulonga ka munu wowose ng'apfikile mna chipindi cha matsuwa madatu ka pfilongotsi pfawalongile, tsimali tsake tsose tsitsosolighwa, naye katsoghomighwa kwilunga na iwanu iwoyile kulawa kuna isi ya mhamo. 9 Mna ghamatsuwa agho madatu, iwanu wose iwakalile mna isi ya Yuda na Benjamini wapfika Yerusalemu na wetingana hana ichibwalu cha ing'anda ya Imulungu, mna litsuwa lya ishirini lya ghumwetsi ghwa tisa. Iwanu wose wang'ali woghudema kwa imbuli yawakemelighwe, na imvula nyingi ing'ali itowa. 10 Bho imtambika Ezra kema kawalongela, "Mtotsa kwa kukwela iwapinga wa isi tsingi, apfo myongetsela isi ya Isiraeli ghamatotso. 11 Lelo muungame hambele ha IMNDEWA, Imulungu wa aba tsenu, na mtende aghala ighomnoghela. Mwibaghule na iwanu iwokala mna isi aino, na muwaleke wapinga wenu wa isi tsingi." 12 Iwanu wose wedika wadamilila walonga, "Ona! Twotenda ka pfaulonga." 13 Pfipfila walonga keli, "Iwanu twawengi ahano, na imvula yotowa sideke. Ng'atudaha baye kughendelela ukwima ahano mchibwalu, mana isang'ano aino ng'aimalitsika kwa litsuwa limwe au matsuwa meli! Kwaapfila tutenda nzambi ng'ulu mna imbuli aino. 14 Ng'apfu pfilongotsi wetu wasighale Yerusalemu wailole imbuli aino yawabamile kulola iwanu wose. Kuya chila yumwe yakwelile ipinga wa kulawa isi ingi yatse kwa nzamu yake, na pfilongotsi na walamlitsi wa ghumji ghwake mbaka imaya ng'ulu ya Imulungu haitsoleghusighwa kuna twetwe." 15 Wose tsawatoghola imbuli aino, ila Yonasani imwana wa Asaheli na Yazeya imwana wa Tikwa wawo ng'awaitoghole baye, na Meshulamu na mlawi Shabatai tsawahamwe nawo. 16 Iwanu wose iwoyile kulawa isi ya mhamo waitoghola imbuli aino. Apfo mtambika Ezra kawasaghula iwamale kulawa kuna pfilongotsi wa tsikolo na kawandika ghamataghwa ghawo. Halipfikile litsuwa lya kadatu lya ghumwetsi ghwa kumi, iwanu awo wandusa ukulola ghoya imbuli aino. 17 Mna litsuwa lya mwanduso lya ghumwetsi ghwa mwanduso wamalitsa imbuli ya iwamale wose iwakwelile wapinga wa chigheni.

18 Awano wawo iwatambika iwakwelile wapinga wa isi tsingi kwa ukulola tsikolo tsao, Lukolo lwa Yoshua, imwana wa Yosadaki na ndughu tsake: Maaseya, Eliezeri, Jaribu na Gedalia. 19 Awano tsawalonga wowaleka wapinga wawo na chila yumwe kolapfa ng'unzu yawe nambiko kwa ajili ya litotso lyake. 20 Iwanu wa lukolo lwa Imeri tsa Hanani na Zebadia: 21 Wanu wa lukolo lwa Harimu tsa Maaseya, Eliya, Shemaya Yehieli na Uzia. 22 Wanu wa lukolo lwa Pashuri tsa Eliehoenai, Maaseya, Ishimaeli, Netaneli, Yozabadi. 23 Walawi tsawakala Yozabadi, Shimei, Kelaya, pfipfila iyamanyike ka Kelita, Petahia, Yuda na Eliezeri. 24 Na iwakwimba tsa Eliashibu, na iwokalitsa ing'anda ye Imulungu tsa Shalumu, Telemu na Uri. 25 Na iwanu wangi wa Isiraeli kulawa lukolo lwa Paroshi tsa Ramiya, Izia, Malikiya, Miyamini, Eleazeri, Malikiya na Benaya. 26 Wanu wa lukolo lwa Elamu tsa Metaniya, Zekaria, Yehieli, Abidi, Yeremoti na Eliya. 27 Wanu wa lukolo lwa Zatu tsa Eliehoenai, Eliashibu, Matania, Yeremoti, Zabadi na Aziza. 28 Wanu wa lukolo lwa Bebai tsa Yehohanani, Hananiya, Zabai na Atilai. 29 Wanu wa lukolo lwa Bani tsa Meshulamu, Maluki, Adaya, Yashubu, Sheali na Yeremoti. 30 Wanu wa lukolo lwa Pahati Moabu tsa Adina, Keleli, Benaya, Maaseya, Matania, Besaleli, Binui na Manase. 31 Wanu wa lukolo lwa Harimu tsa Eliezeri, Ishiya, Malikiya, Shemaya, Shimeoni, 32 na Benjamini, Maluki na Shemaria. 33 Wanu wa lukolo lwa Hashumu tsa Matenai, Matata, Zabadi, Elifeleti, Yeremai, Manese na Shimei. 34 Wanu wa lukolo lwa Bani tsa Maadai, Amramu, Ueli, 35 Benaya, Bedaya, Keluhi, 36 Wania, Meremoti, Eliashibu 37 Mataniya, Matenai na Yaasu. 38 wanu wa lukolo lwa Binui tsa iwo awano: Shimei, 39 Shelemiya, Natani, Adaya, 40 Maknadebai, Shashai, Sharai, 41 Azareli, Shelemiya na Shemaria, 42 Shalumu, Amaria, na Yosefu. 43 Wanu wa lukolo lwa Nebo tsa Yeieli, Matitiya, Zabadi, Zebina, Yadai, Yoeli na Benaya. 44 Iwamale wose awano tsawawakwela wapinga wa chigheni, na wamwenga wawo tsawawelekela wana. Apfo wawaleka wapinga wawo hamwe na iwana wawo.