1 Mfalume Dario kalaghitsa, iwanu wabamebame mna tsing'anda tsikighwe ipfitabu pfa tsikumbukumbu tsa chifalume ako Babeli. 2 Na ichitabu wachipata kuna ghumji ghwa Ekibatana mna isi ya Media. Na aghano ghagho ighandikighwe mumo:

3 "Mfalume Koreshi hayatawale mna ghumwaka ghwa mwanduso kalaghitsa ing'anda ya Imulungu itsengighwe keli mna ghumji ghwa Yerusalemu, hawe hanu ha ukulapfila nambiko tsa ukulakatsighwa, chimo chake chiwe futi tisini na ughatsi wake uwe futi tisini. 4 Chila hamtsenga kotsi ndatu tsa ghamabwe, mwike kotsi imwe ya mighamba mchanya mwa ghamabwe agho. Ihatsina ya mfalume itsoliha chila chinu. 5 Pfipfila ipfinu pfose pfa nzahabu na fetsa pfayasolile Nebukadneza kulawa kuna ing'anda ya Imulungu ako Yerusalemu na kupfighala Babeli pfobamighwa pfuye, na chila chinu chikakale hanu hake mna ing'anda ya Imulungu."

6 Baho mfalume Dario kawaghalila usenga auno: "Kwa Tatenai mkulu wa isi ya magharibi ya Efurate, Shetari Bozenai na pfilongotsi wayagho wa isi ayo, kaleni kutali na ing'anda ayo. 7 Ilekeni isang'ano aino ya ukutsenga ing'anda ya Imulungu ighendelele. Mlekeni mkulu wa isi ya Yuda na pfilongotsi wa Wayahudi waitsenge ing'anda aino ya Imulungu bahala haitsengighwe ghumwande. 8 Pfipfila, nolaghitsa mwemwe mtsowapfila mna isang'ano ayo. Ihatsina ya mfalume itsowaliha iwanu iwosang'ana bila kukawa, nayo itsolawa kuna ikodi ilawa isi ya maghalibi ya ghumto ghwa Eufurat, ili ing'onde ayo ileke kwima. 9 Chila tsuwa, bila kuleka, mtsoweng'a iwatambika wa Yerusalemu chila chinu chawobama, wawe wang'ombe wadowado, wang'unzu, au wang'olo wadowado wa nambiko tsa ukulakatsighwa kwa Imulungu wa kulanga au ingano, mkele, idipfai au ghamapfuta gha nzeituni. 10 Agha ghose tsaghatendeka ili wadahe kumlapfila Imulungu wa kulanga nambiko itsimnoghela na wanombele nene na wanangu tughendelele kukala wagima. 11 Pfipfila nolaghitsa apfino, imunu wowose iyoleka kukinda lilaghitso alino, ghumbiki ighukindilisa ing'anda yake ghung'olighwe, kuswa kwake kosongolighwe, naye yatumbulighwe nagho. Kuya ing'anda yake itendighwe tsalala. 12 Na Imulungu iyasaghule ghumji ghwa Yerusalemu ghuwe hanu ha ukumtambikila yeye, yamghwise hasi mfalume wowose au wanu wowose iwatsolema kulikinda lilaghitso alino, au iyobama kuihinya ing'anda aino ya Imulungu ili mna ghumji ghwa Yerusalemu. Nene Dario nolaghitsa chila munu yalikinde laghitso alino."

13 Apfo Tatenai mkulu wa isi ya magharibi ya ghumto Eufurati, na Shetari Bozenai na pfilongotsi wayao watenda kwa ngupfu tsawo tsose ka apfila ghamalaghitso gha mfalume Dario pfaghabamile. 14 Pfilongotsi wa Wayahudi waghendelela pfinoghile ghendo na isang'ano ya ukuitsenga ing'anda ya Imulungu na wagumighwa ghumoyo na nabii Hagai na Zakaria mwana wa Ido. wamalitsa ukutsenga Ing'anda ka pfawalaghitsighwe na Imulungu wa Isiraeli, na ka apfila pfawalaghitsighwe na Koreshi, na Dario, na Aritashasta, wafalume wa Uajemi 15 Ing'anda ayo ya Imulungu imala mna litsuwa lya kadatu lya ghumwetsi ighukemigha Adari mna ghumwaka ghwa sita ghwayatawale mfalume Dario. 16 Apfo iwanu wa Isiraeli, na iwatambika, na Walawi na iwanu wangi iwoyile kulawa kuna isi ya Babeli wailapfa ing'anda iwe ya Imulungu kwa ndeng'elo ng'ulu. 17 Mna ukuilapfa ing'anda ayo iwe ya Imulungu, walapfa ng'ombe wamale miya imwe, ng'unzu miya mbili, wang'olo wadoghodogho miya nne wawe nambiko, pfipfila walapfa mvulati kumi na weli wawe nambiko ya ukuwaleghusila tsinzambi Waisiraeli, chila yumwe yawe wa chila likabila lya Isiraeli. 18 Pfipfila waweka iwatambika na Walawi mna isang'ano ya Imulungu ako Yerusalemu ka pfayandikighwe mna ichitabu cha Musa.

19 Mna litsuwa lya kumi na nne lya ghumwetsi ghwa mwanduso, iwanu iwoyile kulawa Babeli, isi ya mhamo, wadeng'ela ichihungo cha Pasaka. 20 Kwaapfila iwatambika na Walawi wetenda wenyegho wele, na tsawela ghendo. Wawasubutulila wang'olo wa Pasaka iwanu wose iwoyile kulawa kuna isi ya Babeli, na watambika wayawo, na wakwao iwenyegho. 21 Iwajile wananang'olo wa Pasaka tsa iwanu wose iwoyile kulawa kuna isi ya Babeli, na iwanu wangi iwatsilekile nzila tsa iwanu iwali si Waisiraeli ili wamtambikile Imulungu wa Isiraeli. 22 Kwa matsuwa saba tsawadeng'elela ichihungo cha pfighate ipfilihela hamila kwaapfila IMNDEWA tsakawatenda wadeng'elele ng'ani na kamtenda mfalume Ashuru yawakunde, naye kawapfila mna isang'ano ya ukutsenga ing'anda ya Imulungu wa Isiraeli.