1 Maaduwi wa wanu wa Yuda na Benjamini hawahulike ka iwanu iwoyile kulawa kuna isi ya Babeli woitsenga keli ing'anda ya IMNDEWA, Imulungu wa Isiraeli, 2 wamghendela Zerubabeli na pfilongotsi wa tsikolo na wamlongela, "Leka tumwapfileni ukutsenga ing'anda ya Imulungu. Kwa apfila hata twetwe twombama Imulungu wenu ka mwemwe na tung'ali tumlapfila nambiko kulawa mna ghamatsuwa gha Esari Hadoni, mfalume wa Ashuru iyatughalile ahano."

3 Lekeni Zerubabeli, Yeshua na pfilongotsi wangi wa kolo tsa Isiraeli wawalongela, "Twetwe ng'atubama baye mwemwe mtwapfile ukutsenga ing'anda ya Imulungu wetu. Twetwe tuwenyegho tutsomtsengela IMNDEWA, Imulungu wa Isiraeli ka mfalume Koreshi wa Uajemi pfayatulaghitse."

4 Baho iwanu iwang'ali wokala hanu aho tsawabama kuwatenyula imimoyo na kuwatenda Wayahudi wapfuke, waleke kughendelela ukutsenga. 5 Pfipfila tsawawahonga pfilongotsi wa isi ya Uajemi wapfulughe achila chawang'ali wobama ukutenda Wayahudi. Tsawatenda apfo mna ghamatsuwa ghose ghayatawale Koreshi mfalume wa Uajemi mbaka mna ghamatsuwa ghayatawale Dario, mfalume wa Uajemi.

6 Mfalume Ahasuero hayanduse ukutawala, iwanu awo tsawawandikila ghamaghomba iwanu iwang'ali wokala Yuda na Yerusalemu. 7 Kuya hayatawale Aritashasta mfalume wa Uajemi, Bishilamu, Mitiredati, Tabeeli na wayaghe wamwandikila baluwa mfalume Aritashasta. Ibaruwa ayo yandikighwa kwa ghumwandiko ghwa chiaramu na lugha ya chiaramu. 8 Pfipfila Rehumu, mkulu wa maasikali, na Shimshai, imwandishi tsawamwandikila Abashasta ibaruwa iilonga Yerusalemu Apfino. 9 "Kulawa kuna nene Rehumu, mkulu wa maasikali, na Shimshai, imwandishi wa isi, hamwe na wayetu, walamlitsi na pfilongotsi wose iwolawa ghumji ghwa Ereki, ghwa Babeli na ghwa Susa mna isi ya Elamu, 10 hamwe na iwanu wa isi tsingi iwasolighwe na Asuri Banipali, imunu mkulu na yana ingupfu, na kawalosa kaweka wakale mna ghumji ghwa Samaria na hanu hangi mna isi ya magharibi ya ghumto Eufurati."

11 Ibaruwa yenyegho ilonga apfino: "Kwa mfalume Aritashasta: Twetwe iwatumighwa wako wa isi ya magharibi ya Eufrati twokulamsa. 12 Twobama ghweghwe umanye ghendo ka Wayahudi iwagheluke kutsa kuna twetwe, awala iwalawile kuna ghweghwe, waghenda Yerusalemu na woghutsenga keli ghumji ghuna iwanu wehile na iwolema kuhulikitsa. Womalitsila ukutsenga ubanda wake na ukutsenga ghumsingi. 13 Ghwe mfalume, twobama umanye ka ghumji aghuno ghung'atsengighwa keli na ubanda wake ung'amala iwanu watsoleka ukuliha ikodi, ushulu, wala ada, na ihatsina yako itsohunguka. 14 Lelo, kwaapfila twetwe twokuhulikitsa ghweghwe, ng'atubama baye twone apfila ghweghwe mfalume wetu pfautsoumbuka, apfo twona pfinogha tukulongele. 15 Ibamighwe mna ichitabu cha tsikumbukumbu tsa sekulu tsako, amwo itsakwoneka ka kulawa ghumwande iwanu wa ghumji aghuno tsa weha na wang'ali wowatsupfa wafalume na iwakulu wa isi. Aghano ghaghutenda ghumji aghuno ghuhinyighwe. 16 Twobama ghweghwe mfalume umanye ghendo ka ghumji aghuno ghung'atsengighwa keli na ubanda wake ung'amala ng'utsodaha baye kuitawala isi ya magharibi ya Eufurati." 17 Kuya mfalume kawedika apfino, "Kwa Rehumu, mkulu wa maasikali, na Shimshai, imwandishi wa isi, na wayenu wose iwokala Samaria na iwokala kungi mna isi ya magharibi ya Eufurati: 18 Ibaluwa yamnitumile itafasilighwa na isomighwa hambele hangu. 19 Tsanilaghitsa iwanu wabame bame mna tsikumbukumbu, na itangika ghendo ka kulawa ghumwande ghumji aghuno ghung'ali ghuwatendela tsengwe iwafalume wake na ghumema iwanu wehile na iwaghobo. 20 Wafalume wana tsingupfu tsawatawala ghumji ghwa Yerusalemu na isi ya maghalibi ya Eufurati aku wang'ali wobokela ikodi, ushuru na ada. 21 Lelo walaghitseni iwanu awo waleke ukutsenga keli ghumji agho mbaka hanitsolaghitsa keli. 22 Kuya mwalangitse mleke kukawa ukutenda apfo. Heule ichinu achino ichighuma wogha chighendelele, na kunitenda nene mfalume nibunzike?"

23 Hawamalitse ukuisoma ibaluwa aino kulawa kwa Aritashasta, Rehumu, Shimshai, imwandishi na wayawo wasumka waghenda Yerusalemu kuwananahitsa Wayahudi kwa ngupfu waleke ukutsenga ghumji.

24 Apfo isang'ano ya ukuitsenga keli ing'anda ya Imulungu mna ghumji ghwa Yerusalemu ima mbaka mna ghumwaka ghwa keli ghwayatawale Dario mfalume wa Uajemi.