1 Hambele, mna ghamatsuwa ghayatawale mfalume Aritashasta wa Uajemi, tsahana munu yumwe iyakemighwe Ezra, mwana wa Seraya, Seraya tsa mwana wa Azariya, Azariya tsa mwana wa Hilikiya, 2 Hilikiya tsa mwana wa Shalumu, Shalumu tsa mwana wa Sadoki, Sadoki tsa mwana Ahitubu, 3 Ahitubu tsa mwana wa Amariya, Amariya tsa mwana wa Azariya, Azariya tsa mwana wa Meroyoti, 4 Meroyoti tsa mwana wa Zerahia, Zerahiya tsa mwana wa Uzi, Uzi tsa mwana wa Buki, 5 naye Buki tsa mwana wa Abishua, Abishua tsa mwana wa Finehasi, Finehasi tsa mwana wa Eleazari, Eliazari tsa mwanawa Wa Aruni mtambika mkulu. 6 Ezra katsa kulawa Babeli, ayuno tsakadaha ukufunda ghoya ghamalaghitso gha IMNDEWA, Imulungu wa Isiraeli ghayamwing'ile Musa. Mfalume tsakamwing'a Ezra chila chinu chayabamile, kwaapfila IMNDEWA Imulungu wake tsakahamwe naye. 7 Mna ghumwaka ghwa saba ghwayatawale mfalume Aritashasta, Ezra kalawa Babeli kaghenda Yerusalemu, kelongotsa na Waisiraeli wamwenga, Watambika, Walawi, wanu iwakwimba, iwokalitsa ghamalango, na iwosang'ana mna ing'anda ya Imulungu. 8 Wapfika mna ghumji ghwa Yerusalemu mna litsuwa lya mwanduso lya mwetsi ghwa tano mna ghumwaka ghwa saba ghwayatawale mfalume Aritashasta, 9 kwaapfila Ezra tsakanza ghumwanza ghwake mna litsuwa lya mwanduso lya ghumwetsi ghwa kwanza, naye kapfika Yerusalemu mna litsuwa lya mwanduso lya mwetsi ghwa tano, kwaapfila Imulungu wake yana uluso tsakahamwe naye. 10 Ezra tsakelapfa kwa ghumoyo ghose mna ukwifunda na ukukinda ghamalaghitso gha IMNDEWA, na ukuwafunda iwanu wa Isiraeli wakinde imiko na ghamalaghitso ghake.

11 Aino iyo ibaluwa Aritashasta iyamwing'ile Ezra, iyaklalile mtambika na mwandishi, na iyamanyile sideke imiko na ghamalaghitso gha IMNDEWA ghayaweng'ile iwanu wa Isiraeli. 12 "Kulawa kwa Aritashasta mfalume wa wafalume, kwa Ezra, mtambika na mlangulitsi wa malaghitso gha Imulungu wa kulanga, nokulamsa. 13 Nolaghitsa apfino mna ufalume wangu, munu wowose wa Isiraeli, au watambika wawo, au walawi, iyobama kuya Yerusalemu kwa ukubama yeye imwenyegho, nayoke hamwe na ghweghwe. 14 Nene na iwanu wangu saba iwonishauli twokutuma ughende ako Yuda na Yerusalemu ukaghutse ghutse ka malaghitso gha Imulungu wako ghawing'ighwe ghokindighwa ghoya. 15 Kutsosola fetsa na nzahabu yatumlapfile Imulungu wa Isiraeli iyokala Yerusalemu, aila nene na iwanu wangu iwonyapfila yatulapfile kwa ukubama tuwenyegho. 16 Pfipfila kutsosola fetsa na nzahabu tsaubokele kulawa mna isi ya Babeli, na ipfinu pfose ipfilapfighwe na Waisiraeli na iwatambika kwa ukubama iwenyegho, pfiwe pfa ing'anda ya Imulungu wawo ili ako Yerusalemu. 17 Kwa tsisendi atso mtsoghulila wango'mbe wamale, wang'unzu, wanang'olo na nambiko ya ipfijo na dipfai na kupfilapfa kuna imatsabahu ya ing'anda ya Imulungu wenu ili Yerusalemu. 18 Ifetsa na inzahabu ikala, kodaha kuitumila na wayagho ka pfaubama na ka Imulungu pfayakona pfinogha. 19 Umlapfile Imulungu wa Yerusalemu pfinu pfose pfawing'ighwe pfiwe pfa ing'anda ya Imulungu wako. 20 Ung'abama chinu chochose cha ing'anda ya Imulungu wako kutsopata kulawa kuna ihatsina ya mfalume. 21 Nene mfalume Aritashasta nowalaghitsa iwanu wose iwotunza tsihatsina tsili mna isi ya magharibi ya ghumto Eufurati, chochose chayobama Ezra imtambika na imwandishi wa ghamlaghitso gha Imulungu wa kulanga yeng'ighwe kwa moyo ghumwe, 22 mbaka kilo elufu ndatu na miya nne tsa fetsa, ingano kilo elufu kumi, dipfai lita elfu mbili, ghamapfuta lita elufu mbili na ghumkele ghoghose ghayobama. 23 Chila chinu chayalaghitse Imulungu wa kulanga chiwe cha ing'anda yake, chitendeke pfipfo ghendo, hela katsoughudubukila ufalume wangu na iwanangu. 24 Pfipfila mmanye ghendo ka mghomighwa kuwekila ikodi, ushuru au ada iwatambika wose, walawi, iwakwimba, iwokalitsa ghamalango, wasang'ana au iwatumighwa wangi wa ing'anda aino ya Imulungu. 25 Naghwe Ezra, kwa ihekima iyakwing'ile Imulungu wako, ayo yuli nayo, uwasaghule iwohigha na walamlitsi iwatsowalongotsa iwanu wose iwokala mna isi ya magharibi ya Eufurati, awala iwokala kwa kukinda ghamalaghitso gha Imulungu wako. Na ayula iyang'aghamanyile baye ghamalaghitso agho, umfunde. 26 Munu wowose iyolema kukinda malaghitso gha Imulungu wako, au malaghitso gha mfalume, yahighighwe ukufa, au yalawe mna isi, au yabokighwe tsimali tsake, au yohighwe kuna ligeletsa"

27 Ezra kalonga, "Yatunyighwe IMNDEWA, Imulungu wa iwahenga wetu, iyamwing'ile mfalume ghumoyo ghwa ukuihamba ing'anda ya IMNDEWA, ili ako Yerusalemu. 28 Kwa uluso wake Imulungu, tsanyapfilighwa na mfalume na iwanu iwomshauli, na pfilongotsi wake iwana uwetso mkulu. Nipata ngupfu mna ghumoyo ghwangu kwaapfila IMNDEWA, Imulungu wangu tsakahamwe na nene, mbaka niweka hamwe pfilongotsi wa Isiraeli ili woye hamwe na nene."