1 Matsuwa agho manabii weli Hagai na Zakaria mwana wa Ido wandusa kuwatabiliya Wayahudi iwang'ali wokala Yuda na Yerusalemu kwa taghwa lya Imulungu wa Isiraeli, iyakalile hamwe nawo. 2 Kuya Zerubabeli, mwana wa Shealitieli, na Yeshua mwana wa Yosadaki hawahulike imbuli ayo wandusa keli ukutsenga ing'anda ya Imulungu mna ghumji ghwa Yerusalemu na wapfilighwa na manabii wa Imulungu. 3 Mna ghamatsuwa ghagho, Tatenai, mkulu wa isi ya magharibi ya Eufurati, Shetari Bozenai na wayawo waghenda Yerusalemu kughutsa, "Angu nani iyawalongele muitsenge ing'anda aino mbaka muimalitse?" 4 Pfipfila waghutsa, "Tsina nani iwotsenga ing'anda aino? Twobama ghamataghwa ghawo." 5 Lekeni Imulungu yang'ali yowakinga iwanzehe wa Wayahudi, apfo iwakulu awo ng'awawaghomile baye mbaka hawamwandikile mfalume Dario na kutegheletsa yolonga choni. 6 Apfo Tatenai mkulu wa isi ya maghambi ya Eufurati, Shetari Bozenai na wayawo wamwandikila baluwa mfalume Dario.

7 Ibaluwa yawamtumile mfalume tsayandikighwa apfino: Mfalume Dario twokulamsa.

8 Ghwe mfalume twobama umanye ka tughenda kuna isi ya Yuda kwaili ing'anda ya Imulungu Mkulu. Iwanu woitsenga Ing'anda kwa mabwe makulu na ubanda wake wakwikighwa mighamba. Isang'ano ayo yotendeka kwa ngupfu na yoghendelela pfinoghile ghendo.

9 Tuwaghutsa pfilongotsi watulongele nani yawalaghitse waitsenge ing'anda aino na kuumalitsa ubanda wake. 10 Pfipfila tughutsa ghamataghwa gha awala iwolongotsa isang'ano aino ili tukulongele ghweghwe.

11 "Wawo watwidika apfino, ‘Twetwe twa watumighwa wa Imulungu wa kulanga na wa isi, na twoitsenga keli ing'anda itsengighwe na kumalitsika miyaka mingi ifosile na mfalume mkulu wa Isiraeli. 12 Kwaapfila wahenga wetu wamtenda Imulungu wa kulanga yaghudubuke, apfo kawaleka waghoghighwe na mfalume Nebukadneza wa Babeli, Mkalidayo, yeye yuyo iyaihinyile ing'anda aino na kuwaghala iwanu ako Babeli. 13 Lekeni mna ghumwaka ghwa mwanduso ghwayatawale mfalume Koreshi wa Babeli, yeye Koreshi kalaghitsa ing'anda aino ya Imulungu itsengighwe keli. 14 Pfipfila kapfuyitsa ipfinu pfa nzahabu na pfa fetsa pfayasolile mfalume Nebukadneza kulawa kuna ing'anda ya Imulungu ili ako Yerusalemu, na kapfika mna ing'anda ya Imulungu wake ako Babeli. Koreshi kapfilapfa ipfinu apfo kuna Ing'anda ako Babeli na kamwing'a Sheshibaza iyamsimike yawe mkulu wa Yuda. 15 Kamlongela, "Sola ipfinu apfino, uke napfo na ukapfike kuna ing'anda ya Imulungu ihili Yerusalemu na ukaitsenge keli ing'anda ayo ya Imulungu bahala haitsengighwe ghumwande." 16 Kuya Sheshibaza katsa, keka ghumsingi ghwa ing'anda ya Imulungu mna ghumji ghwa Yerusalemu, na kulawa ghamatsuwa agho mbaka sambi iwanu wang'ali woghendelela ukuitsenga, lekeni ing'anda ng'ana imale baye.’

17 "Lelo mfalume, ka kwakona pfinogha walongele iwanu wabame mna tsikumbukumbu tsa chifalume mna ghumji ghwa Babeli, ka mfalume Koreshi tsakalaghitsa ing'anda aino ya Imulungu itsengighwe mna ghumji ghwa Yerusalemu. Kuya twokulomba mfalume utulongele chaulamla mna imbuli alino."