1 Mna ghumwaka ghwa mwanduso hayatawale Koreshi mfalume wa Uajemu, ili imbuli ya IMNDEWA iyalongile kubitila nabii Yeremia itimile. IMNDEWA kamtenda Koreshi mfalume wa Uajemi yalapfe laghitso alino kwa ukukemelela mna ufalume wake, na pfipfila lilaghitso alyo lilapfighwa kwa ukwandikighwa. 2 "Apfino pfipfo pfayolonga Koreshi mfalume wa Uajemi: IMNDEWA, Imulungu wa kulanga kangaya falume tsose tsili muisi na kanilaghitsa nimtsengele ing'anda ako Yerusalemu mna isi ya Yuda. 3 Lelo chila munu mna mwemwe wose imli iwanu wake, Imulungu wake yakale hamwe naye, na yagheluke yaghende Yerusalemu ako Yuda, yakaitsenge ing'anda ya IMNDEWA, Imulungu wa Isiraeli, yeye yuyo Imulungu iyali ako Yerusalemu. 4 Chila munu iyasighale mgima, akula kokose kwayokala, iwanu iwokala habehi naye wamwapfile kwa kumwing'a fetsa, nzahabu, tsimali na wanyama, pfipfila wamwing'e ipfinu pfayolapfa imunu kwa ukubama imwenyegho pfikawe nambiko kuna ing'anda ya Imulungu ako Yerusalemu."

5 Apfo woka iwakulu wa tsikolo tsa ghamakabila gha Yuda na Benjamini, na iwatambika, na Walawi, na chila munu iyeng'ighwe ghumoyo na Imulungu kughenda kutsenga ing'anda ya IMNDEWA ili ako Yerusalemu. 6 Na iwanu wose iwakalile habehi nawo wawapfila kwa kuweng'a pfinu pfa fetsa, nzahabu, tsimali, wanyama na pfinu pfingi pfa bei ng'ulu, pfipfila waweng'a ipfinu pfayolapfa imunu kwa ukubama imwenyegho pfiwe nambiko ya ing'anda ya Imulungu.

7 Pfipfila mfalume Koreshi kapfilapfa kunze ipfinu apfila pfa ing'anda ya IMNDEWA, ipfisolighwe na mfalume Nebukadineza kulawa Yerusalemu na kupfika mna ing'anda ya imilungu yake. 8 Mfalume Koreshi wa Uajemi kamwing'a Mitiredati ipfinu apfo, mtunza ihatsina naye tsakapfipeta na kamwing'a Sheshibaza, imkulu wa Yuda. 9 Apfino pfipfo ipfinu ipfipetighwe: Masinia selasini tsa nzahabu, bakuli elufu imwe tsa fetsa, pfetetso pfa shaba ishirini na tisa, 10 bakuli ndodo tsa nzahabu salasini, na bakuli ndodo tsa fetsa miya nne na kumi, na pfinu pfingi elufu imwe. 11 Ipfinu pfose pfa nzahabu na fetsa hamwe na pfinu pfimwenga pfose tsa elufu tano na miya nne. Pfose apfino Sheshibaza tsakapfisola na koya napfo Yerusalemu mna matsuwa aghala yeye na iwanu wangi hawoyile Yerusalemu kulawa Babeli, isi ya mhamo.