1 Haghupfikile ghumwetsi ghwa saba, iwanu wa Isiraeli hawakalile mna imiji yawo, watsa kwitingana hamwe ako Yerusalemu na wawa chinu chimwe. 2 Yeshua imwana wa Yosadaki hamwe na ndughu tsake iwatambika, na Zerubabeli, imwana wa Shealitieli hamwe na ndughu tsake watsenga keli imatsabahu ya Imulungu wa Isiraeli ya ukumlapfila nambiko tsa ukulakatsighwa ka pfayandikighwe mna ghamaghitso gha Musa imunu wa Imulungu. 3 Hata ka tsawawapfuka iwanu iwang'ali wokala mna isi tsili habehi, watsenga imatsabahu bahala haikalile imatsabahu ya ghumwande. Kuya wang'ali womlapfila Imulungu nambiko tsa ukulakatsighwa mchanya hake chila nemitondo na nemihe. 4 Watenda ichihungo cha ipfibanda na walapfa nambiko tsa ukulakatsighwa itsibamighwa mna chila litsuwa, ka pfayandikighwe mna ghamalaghitso. 5 Pfipfila walapfa nambiko tsa ukulakatsighwa tsa chila tsuwa, na nambiko itsilapfighwa mna ichihungo cha mlawo ghwa ghumwetsi, na mna ipfihungo pfingi pfayalaghitse IMNDEWA. Pfipfila chila munu kamlapfila nambiko IMNDEWA kwa ukubama imwenyegho. 6 Hata ka ghumsingi ghwa ing'anda ya IMNDEWA tsang'ana ghutsengighwe baye, iwanu wandusa ukulapfa nambiko tsa ukulakatsighwa kwa IMNDEWA kulawa litsuwa lya mwanduso lya ghumwetsi ghwa saba.

7 Kuya iwanu walapfa fetsa tsa ukuwaliha na iwanu iwotsenga na wasongola mibiki, pfipfila waweng'a ichijo, chokunwa na ghamapfuta iwanu wa imiji ya Tiro na sidoni, nawo watwing'a imibiki ya mikataluba kulawa Lebanoni. Imibiki ayo tsaighalighwa kubitila mna ibahali mbaka Yopa. Agha ghose tsaghatendighwa kwa kwapfilighwa na mfalume Koreshi wa Uajemi. 8 Apfo iwanu wandusa kusang'ana mna ghumwetsi ghwa keli ghwa ghumwaka ghwa keli ahala hawaipfikile kuna ing'anda ya Imulungu kuna ghumji ghwa Yerusalemu. Zerubabeli mwana wa Shealitieli, Yeshua mwana wa Yosadaki, wandughu tsawo wangi, Watambika, Walawi na iwanu wangi iwoyile Yerusalemu kulawa akula kwawaamile tsawelunga nawo mna isang'ano ayo. Walawi wose iwana imiyaka ishirini na kughendelela wasaghulighwa wemilile isang'ano ya ukutsenga ghoya keli ing'anda ya IMNDEWA. 9 Yeshua, na iwanaghe wamale na ndughu tsake hamwe na Kadimieli na iwanaghe, iwalawile mna lukolo lwa Hodavia, wose tsawawemilila iwanu iwang'ali wotsenga ing'anda ya Imulungu. Pfipfila wapfilighwa na iwana na iwatsukulu wa Henadadi, na ndughu tsawo Walawi. 10 Iwanu iwotsenga hawanduse ukwika ghumsingi ghwa ing'anda ya IMNDEWA, iwatambika aku wapfala maghwanda ghawo, wema hanu aho aku wakinda malati mna ghamoko, nawo walawi wa lukolo lwa Asafu wema na matoazi ghawo, wamtunya IMNDEWA ka pfawalaghitsighwe na mfalume Daudi wa Isiraeli. 11 Wemba kwa ukwibokelela, wamtunya Imulungu, wemba apfino,

"Kwaapfila yeye kanogha,

ukukunda kwake kwa Isiraeli,

kwokala matsuwa ghose."

Iwanu wose wamtunya Imulungu kwa litsi kulu kwaapfila ghumsingi ghwa ing'anda ya IMNDEWA ghwandusa ukutsengighwa. 12 Lekeni watambika wamwenga, Walawi na pfilongotsi wa kolo iwakalile wanzehe na iwayonile ing'anda ya mwanduso, wang'ali wolila kwa kukemelela hawonile ghumsingi ghungi ghwa ing'anda ya Imulungu ghwakwikighwa, aku iwanu wangi wang'ali wokemelela kwa ukudeng'elela. 13 Iwanu ng'awadahile baye ukutanga litsi lya ukudeng'elela na litsi lya chililo kwaapfila tsatsihulikika ka tsogho na tsatsihulika kutali sideke.