1 Awano wawo iwakulu wa tsikolo iwoyile na nene Ezra kulawa Babeli mna ghamatsuwa ghayatawale mfalume Aritashasta: 2 Imkulu wa ilukolo lwa Finehasi tsa Gerishomu, wa ilukolo lwa Itamari tsa Danyeli, wa ilukolo lwa Daudi tsa Hatushi, imwana wa Shekaniya, 3 wa ilukolo lwa Paroshi tsa Zekaria, koya hamwe na wamale miya na hamsini wa ilukolo lwake iwandikighwe hamwe. 4 imkulu wa lukolo lwa Pahati Moabu tsa Eliehoenai, imwana wa Zerahia, koya hamwe na wamale miya mbili, 5 wa lukolo lwa Zatu tsa Shakania imwana wa Yahazieli, koya hamwe na wamale miya ndatu, 6 wa lukolo lwa Adini tsa Ebedi, imwana wa Yonasanina, koya hamwe na wamale hamsini, 7 wa lukolo lwa Elamu tsa Yeshaya, imwana wa Ataliana, koya hamwe na wamale sabini, 8 wa lukolo lwa Shefatia tsa Zebadia, imwana wa Mikaeli, koya hamwe na wamale semanini, 9 wa lukolo lwa Yoabu tsa Obadia, imwana wa Yehieli, koya hamwe na wamale miya mbili kumi na nane, 10 wa lukolo lwa Bani tsa Shelemoti, imwana wa Yosifia, koya hamwe na wamale miya imwe na sitini, 11 wa lukolo lwa Bebai tsa Zekaria, imwana wa Bebai, koya hamwe na wamale ishirini na nane, 12 wa lukolo lwa Azigadi tsa Yohanani, imwana wa Hakatani, koya hamwe na wamale miya imwe na kumi, 13 wa lukolo lwa Adonikamu tsa Elifeleti, Yeueli, na Shemaya koya hamwe na wamale sitini, awano tsawoya hambele. 14 Iwakulu wa lukolo lwa Bigwai tsa Utai na Zakuri iwoyile hamwe na wamale sabini.

15 Tsaniwatinganitsa hamwe iwanu wose hambalimbali ha ghumto ighughenda kuna ghumji ghwa Ahava. Tukala ako matsuwa madatu. Haniwakaghule iwanu na watambika, sonile baye hata Mlawi yumwe. 16 Apfo niwakema pfilongotsi awano watse kuna nene: Eliezeri, Arieli, Shemaya, Elinatani, Yaribu, Elinatani, Natani, Zekaria na Meshulamu. Pfipfila niwakema walangulitsi weli, Yoyaribu na Elinatani. 17 Kuya niwaghala kwa Ido, chilongotsi wa iwanu akula Kasifia, na nimlomba yeye na wayaghe, na awala iwasang'ane mna ing'anda ya Imulungu wetu, watughalile iwanu iwatsosang'ana mna Ing'anda ya Imulungu. 18 Kwaapfila Imulungu wetu yana uluso tsakahamwe na twetwe, wawo watughalila Sherebia, imunu yana udaha mkulu iyolawa mna ilukolo lwa Mahili, mwanaghe Lawi na mtsukulu wa Isiraeli, yeye katsa na iwanaghe wamale na ndughu tsake, wosewose tsa kumi na nane. 19 Pfipfila watughalila Hashabia na Yeshaya, iwolawa mna ilukolo lwa Merari, iwatsile na ndughu tsawo na wehwa wawo, wose wose tsa ishirini. 20 Pfipfila watughalila wanu miya mbili na ishilini iwosang'ana mna ing'anda ya Imulungu, iwanu awo sekulu tsawo tsawasaghulighwa na Daudi na pfilongotsi wake wawapfile Walawi. Mataghwa ghose gha iwanu awano tsaghandikighwa.

21 Kuya nilaghitsa wose tufunge baho hana ghumto Ahava, na twihulumse hambele ha Imulungu wetu na kumlomba yatukinge na yatulongotse mna ghumwanza ghwetu, hamwe na iwana wetu, na tsimali tsetu tsose. 22 Tsambona chinyala ukumlomba mfalume yangaye maasikali na wakwila falasi wa ukutukinga na iwanu iwotuhila mnzila kwaapfila tsanongola kumlongela mfalume apfino, "Imulungu wetu yana uluso kahamwe na imunu wowose iyombama, lekeni kowonela maya ng'ulu awala wose iwomleka." 23 Apfo tufunga na tumlomba Imulungu yatukinge, naye kahulika aghala ghatulombile.

24 Kuya niwasaghula wanu kumi na weli, kulawa mna ipfilongotsi wa iwatambika, Sherebia, Hashabia, hamwe na ndughu tsawo kumi. 25 Awano niwapimila ifetsa, inzahabu, na ipfinu ipfilapfighwe na mfalume, walamlitsi, pfilongotsi wake, na iwanu wa Isiraeli wose iwakalile kuko, pfawalapfile pfiwe nambiko ya ing'anda ya Imulungu wetu. 26 Apfino pfipfo ipfinu pfaniwapimile: fetsa tani ishilini na mbili, pfinu pfa fetsa miya imwe, utsito wake kilo sabini, nzahabu kilo elufu ndatu na miya nne, 27 mabakuli ishirini gha nzahabu, utsito wake kilo nane, pfinu pfili pfa shaba inoghile, imelemeta na ina ibei ng'ulu ka nzahabu. 28 Kuya niwalongela, "Mwemwe mwa wanu welile wa IMNDEWA, na ipfinu apfo napfo pfela, ifetsa na inzahabu ilapfighwa kwa IMNDEWA, Imulungu wa iwahenga wenu kwa ukubama wenyegho iwanu. 29 Lelo mpfikalitse mbaka hamtsopfipima keli mghati mwa ipfiheto pfili mna ing'anda ya IMNDEWA ako Yerusalemu, hambele ha iwakulu wa iwatambika, Walawi, na pfilongotsi wa tsikolo tsa Isiraeli."

30 Apfo iwatambika, na Walawi, wabokela na kupfilola ghoya, ifetsa, inzahabu, na ipfinu pfose pfawapimighwe, ili wapfighale Yerusalemu kuna ing'anda ya Imulungu wetu.

31 Mna litsuwa lya kumi na mbili lya ghumwetsi ghwa mwanduso twanza ghumwanza kulawa kuna ghumto Ahava tughenda Yerusalemu. Imulungu wetu yana uluso tsakakala na twetwe, katukinga na iwanu iwotuhila na awala iwoboka iwanu mnzila. 32 Hatupfikile Yerusalemu tubwihila kwa matsuwa madatu. 33 Mna litsuwa lya kane, hatuli twamghati mwa ing'anda ya Imulungu, tuipima ifetsa aila, inzahabu na ipfinu apfila, kuya tupfika mna ghamoko gha mtambika Meremoti, imwana wa Uria. Eleazari, imwana wa Finehasi, na Walawi weli tsawakala hamwe naye, Yozabadi mwana wa Yeshua, na Noadia, imwana wa Binui. 34 Chila chinu chipetighwa na chipimighwa, na chila utsito wa chila chinu wandikighwa. 35 Kuya iwanu wose iwoyile kulawa kuna isi ya mhamo wamlapfila Imulungu wa Isiraeli nambiko tsa ukulakatsighwa. Walapfa ng'ombe wamale kumi na mbili wawe nambiko ya Waisiraeli wose, ng'unzu tisini na sita na wanang'olo sabini na saba, mene kumi na weli wawe nambiko ya ukuleghusa tsinzambi. Wanyama wose awano tsawalapfighwa wawe nambiko ya ukulakatsighwa kwa IMNDEWA. 36 Pfipfila waweng'a iwakulu iwamwapfile mfalume na pfilongotsi wa isi tsa magharibi ya ghumto ghwa Eufurati ghamalaghitso ghaweng'ighwe na mfalume, nawo tsawawapfila iwanu na ing'anda ya Imulungu.