1 Haghatendeke agha ghose, pfilongotsi watsa kunongela, "Iwanu wa Isi ya Isiraeli, iwatambika, na Walawi, ng'awebaghule baye na iwanu wa isi tsingi iwotenda ipfinu pfa ukudesa, ka awala Wakanaani, Wahiti, Waperizi, Wayebusi, Waamoni, Wamoabi, Wamisri, na Waamori. 2 Wayahudi wawakwela iwapinga wa chigheni, na pfipfila wawakwelela wasongolo wawo. Apfo iwanu iwelile wa Imulungu wehanganya na iwanu wa isi tsingi, na pfilongotsi na iwakulu wawo iwanduse ukutenda agho ighehile." 3 Baho hanihulike agho, nidegha ghamabwende ghangu na likanzu lyangu, nitsing'ola mvili tsangu, na ndepfu tsangu kwa usungu mkulu, na nikala hasi aku nikangawala ghendo. 4 Baho iwanu wose wang'ali woghademekela ghamalonga gha Imulungu kwa aghala ghehile gha watendile iwanu iwoyile kulawa kuna isi ya mhamo, hawanduse kwitingana habehi na nene aku ning'ali nikangawala mbaka nemihe, chipindi cha ukulapfa nambiko. 5 Nemihe, ichipindi cha ukulapfa nambiko hachipfikile, nyinuka kwa usungu mkulu ahala hanikalile aku mabwende ghangu na kanzu lyangu ghadegheka, apfo nitowa ghamapfindi na kumgholosela ghamoko IMNDEWA, Imulungu wangu na kumlomba, 6 nilonga, "Ghwe Imulungu wangu, nakona chinyala kwinula uhanga wangu hambele hako. Nzambi tsetu tsiwa lundo kulu kubita chimo cha ghamatwi ghetu, na matotso ghetu ghopfika kulanga. 7 Kulawa ghamatsuwa gha iwahenda wetu mbaka sambi twetwe tukutotsela sideke. Na kwa tsinzambi tsetu, twetwe, wafalume wetu na iwatambika wetu tutawalighwa, tukomighwa, tughoghighwa na tubokighwa mali tsetu na wafalume wa isi tsingi. Na mbaka leloli aino tughelighwa chinyala chikulu ghendo. 8 Lekeni sambi, ghwe IMNDEWA Imulungu wetu, kwa chipindi chidodo, kututendela uluso mkulu na kutuleka wamwenga wetu tuswekuke kulawa kuna utumwa, na twokala wagima hanu ahano haenzeluke. Apfo Imulungu wetu katsipfughula tsinenge tsetu tsone keli na katutenda twone ng'apfu mna utumwa wetu. 9 Kwaapfila twetwe twawatumwa, lekeni Imulungu wetu ng'utulekile baye kuna utumwa. Kuwatenda wafalume wa Uajemi watutendele uluso, na kutuleka tuwe wagima, na kuitsenga ing'anda yako ikalile ibomoka, naghwe kututsengela ubanda wa kutukinga mna isi ya Yuda na ghumji ghwa Yerusalemu. 10 Lekeni sambi tulonge choni, ghwe Imulungu wetu, kwa agho ghose ighalawile? Mana hamwe na ghose ghaututendele twetwe tuleka keli kukinda ghamalaghitso ghako, 11 ghautwing'ile kubitila watumighwa wako manabii, haulongile ‘Isi yamuighendela kuisola iwe yenu, isi ayo iha, na ikodotsolighwa na iwanu iwokala amwo, isi imema ukwiha kwawo kulawa membe imwe mbaka mbembe ingi. 12 Apfo mleke kuwaleka neghe tsenu wakwelighwe na iwana wawo, wala mleke kuwaleka iwana wenu wawakwele neghe tsawo. Mleke kuwaleka wakale tseghamba wala wabwede, apfo mtsokala na ngupfu na kuja pfinu pfinoghile pfa isi ayo, na isi ayo mtsowalekela iwana wenu iwe yawo matsuwa ghose. 13 Ghose ighatupatile ghatupata kwaapfila tsatutenda ghehile na tsatutotsa sideke. Lekeni ghwe Imulungu wetu kutuhigha chidogho hata ka tsinzambi tsatutendile tsanyingi ng'ani, naghwe kuteka wamwenga wetu tuwe wagima ka pfatuli leloli. 14 Apfi tutsakuyila keli kuleka ukughakinda ghamalaghitso ghako na kwikwela na iwanu awano iwotenda ghehile? Angu ng'utsotughudubukila baye, na kutukoma ghendo, na yaleke koneka hata yumwe wetu iyali mgima wala wowose iyodaha ukuswekuka? 15 Ghwe IMNDEWA, Imulungu wa Isiraeli, ghweghwe kuna haki na kutuleka tukale ka pfatuli leloli aino. Twa mna ghamatotso ghetu hambele hako, aku twomanya ka kuduhu wowose yana ihaki ya ukwima hambele hako.’ "