1 Wanu wa Yuda wamsola Yehoahazi, mwana wa Yosia, wamwika yawe mfalume, yasole hanu ha aba wake. 2 Yehoahazi tsakana miyaka ishirini na midatu hayanzile kutawala, katawala miyetsi midatu aku kokala Yerusalemu. 3 Hambele mfalume wa Misiri kamghogha Yehoahazi kawalaghitsa iwanu wa Yuda walihe kodi ya ghamabwe gha pfetsa kilo elufu ndatu na miya nne na nzahabu kilo salasini na nne. 4 Kuya mfalume Neko wa Misiri kamwika Eliakimu, ndughu yake Yosia, yawe mfalume hanu ha aba wake, na kamwing'a taghwa lingi, kamkema Yehoyakimu. Mfalume Neko kamsola Yehoahazi kamghala Misiri.

5 Yehoyakimu tsakana miyaka ishilini na mitano hayanzile kutawala, katawala kwa miyaka kumi na ghumwe aku kokala Yerusalemu. Katenda ghehile hambele ha IMNDEWA, Imulungu wake. 6 Nebukadineza mfalume wa Babeli, kampfamila, kamwoha na minyololo ya shaba na kamghala Babeli. 7 Kuya Nebukadineza kasola ipfinu pfa ing'anda ya Imulungu, kapfighala Babeli na kapfika mna ing'anda yake ya chifalume ako Babeli. 8 Aghala ghose ghayatendile Yehoyakimu, hamwe na pfinu pfa ukudesa pfayatendile, na ghehile ghayatendile ghandikighwa mna ichitabu cha kumbukumbu cha wafalume wa Isiraeli na Yuda. Yehoyakini imwanaghe kawa mfalume, kasola hanu ha aba wake.

9 Yehoyakini tsakana miyaka kumi na minane hayanzile kutawala, katawala aku kokala Yerusalemu kwa meyetsi midatu na matsuwa kumi. Katenda ighehile hambele ha IMNDEWA. 10 Ghumwaka haghumalile, mfalume Nebukadneza katuma wanu wakamghoghe Yehoyakini, na wamghala Babeli, woya hamwe na ipfinu pfa bei ng'ulu pfa ing'anda ya IMNDEWA. Kuya kamwika Zedekia, ndughu yake Yehoyakini, yawe mfalume wa Yuda na Yerusalemu.

11 Zedekia tsakana miyaka ishirini na ghumwe hayanzile kutawala, katawala aku kokala Yerusalemu kwa miyaka kumi na ghumwe. 12 Katenda ighehile hambele ha IMNDEWA, Imulungu wake, wala ng'ehulumse baye hambele ha nabii Yeremia iyalongile ghamalonga igholawa kwa IMNDEWA.

13 Zedekia pfipfila kambiduka mfalume Nebukadneza iyamtendile yelahe kwa litaghwa lya IMNDEWA ka ng'atsombiduka baye. Zedekia kawa msughu na ghumoyo mkomu, kalema kumhundukila IMNDEWA, Imulungu wa Isiraeli. 14 Pfilongotsi wa watambika na pfilongotsi wa iwanu, na iwanu wenyegho, wose waleka ghendo kuwa wanu wakutogholeka, waigha ighehile ghawatendile iwanu wa isi tsingi; apfo waitenda ing'anda ya Imulungu yoneke iha, iyaitendile yeye imwenyegho ienzeluke ako Yerualemu. 15 IMNDEWA, Imulungu wa iwahenga wawo, yang'ali yowatumagha iwasenga wake kuna wawo, kwaapfila yeye kana libatsi kwa iwanu wake na kwa ing'anda yake. 16 Lekeni wawo waghendelela kuwabetsa wasenga wa Imulungu, ng'awategheletse tsimbuli tsake baye, kuya wawaseka manabii wake mbaka maya ya IMNDEWA iwahulumkila wanu wake, nawo ng'awadahile baye kuhepa. 17 Apfo IMNDEWA kamghala mfalume wa Babeli iyawakomile iwasongolo wawo kwa limaghe mbaka mghati mwa hanu haenzeluka, wala ng'amwonele baye libatsi munu wowose, yawe msongolo au mwali, mnzehe au chikongwe. IMNDEWA kawaleka waghoghighwe na Nebukadneza. 18 Kapfisola ipfinu pfa ing'anda ya Imulungu, pfikulu na pfidodo na ipfinu ipfikalile mna ipfiheloto pfa ing'anda ya IMNDEWA, na apfila pfa ing'anda ya mfalume na iwakulu wake. Pfose kapfighala Babeli. 19 Kailakatsa ing'anda ya Imulungu, kaubomola ubanda wa Yerusalemu, katsilakatsa tsing'anda tsose tsa chifalume, na kapfihinya ipfinu pfake pfose pfa bei ng'ulu. 20 Iwanu iwahonile kawaghogha na kawaghala Babeli. Ako wawa watumwa wake na wa iwanaghe mbaka ufalume wa Uajemi hawanzile kutawala. 21 Apfo chilawila achila chayalongile IMNDEWA kubitila Yeremia, "Isi itsokala hela bila kulimighwa kwa miyaka sabini kuliha ghamatsuwa ghose isi haikalile bila kudeng'elela Isabato."

22 Mna ghumwaka wa mwanduso ghwa ufalume wa Koreshi mfalume wa Uajemi, ili itimile imbuli ya IMNDEWA iyalongile kubitila nabii Yeremia, IMNDEWA kaghulamsa ghumoyo ghwa Koreshi mfalume wa Uajemi, naye kalaghitsa mna ufalume wake wose, kuya kaghala tsimbuli atso kwa kutsandika apfino, 23 "Apfi pfipfo pfayolonga Koreshi mfalume wa Uajemi, ‘IMNDEWA, Imulungu wa kulanga, kangaya tsifalume tsose tsa iisi tsose, kuya kanilaghitsa nimtsengele ing'anda ako Yerusalemu, mna isi ya Yuda. Lelo chila munu mna mwemwe wose imli wanu wake IMNDEWA, na yoke, na Imulungu yawe hamwe naye.’ "