1 Haghamalile aghala ghose ghayatendile mfalume Hezekia kwa ukutogholeka, mfalume Senekaribu wa Ashuru kaipfamila isi ya Yuda. Katsa kuna imiji itsungulutsighwe ubanda aku kepfikitsa ka katsoiboka iwe yake. 2 Mfalume Hezekia hayonile ka mfalume Senakaribu katsa kobama kuitowa Yerusalemu, 3 kalamla yeye na wakulu wake, na pfilongotsi wa maasikali wadiwe ghamatsi gha tsimbwibwi itsilkalile kunze mwa ghumiji, nawo wamtogholela, wamwapfila. 4 Tsawetingana hamwe wanu wengi, wadiwa tsimbwibwi tsose hamwe na ghumto ighubitile hanu aho, walonga, "Heule tuwalekelele mfalume wa Ashuru watse na wone ghamatsi tele?" 5 Ili kughwamila ghumji mfalume Hezekia tsakeghuma ghumoyo, kautsenga keli ubanda wose iumwaghike, na mchanya mwake keka minara. Katsenga ubanda ungi wa kunze, kuya kenulila ghamatuta hanu hakemighwe Milo mna ghumji ghwa Daudi. Kubita agho tsakatenda pfiheleto na ngao ketseketse. 6 Mna ghumji iwanu wose tsawalongotsighwa na pfilongotsi wa maasikali, kuya kalaghitsa iwanu wetingane hamwe hana ichibwalu ichili hana Lilango lya ghumji. Baho tsakawaghuma ghumoyo iwanu, kawalongela, kalonga, 7 "Mgangamale na mwitowe chilume, mleke kupfuka wala kutenyuka hambele ha mfalume wa Ashuru, na maasikali wake iwali wengi kwaapfila yatuli naye twetwe mkulu kubita iyali naye Senakeribu. 8 Yeye kenatso tsingupfu tsa chimunu, ila twetwe tuna IMNDEWA, Imulungu wetu, iyotwapfila na iyotutowela ing'ondo yetu." Acho chayalongile mfalume Hezekia chiwaguma ghumoyo ghendo iwanu awo. 9 Hambele chidogho Senakaribu mfalume wa Ashuru na maasikali wake wose, tsawang'ali woghupfingila ghumji ghwa Lakishi, kawatuma wasenga wake waghende Yerusalemu kwa Hezekia, mfalume wa Yuda na kwa iwanu wose wa Yuda iwakalile Yerusalemu, kalonga, 10 "Apfi pfipfo pfayolonga Senekaribu, mfalume wa Ashuru, Angu mwihuwila choni ghendo mbaka mng'ali mwokala Yerusalemu, ghumji ghupfingilighwe? 11 Hezekia hayolonga, ‘IMNDEWA Imulungu wetu katsotukombola kulawa mna ghamoko gha mfalume wa Ashuru.’ Lekeni yeye kowaghutsukila. Yeye kowabamani mfe kwa nzala na mfe kwa ng'ilu hayowalongela apfo. 12 Angu si yeye baye Hezekia iyahahinyile hanu henulighwe ha ukutambikila na matsabahu tsake, na kuwalaghitsa iwanu wose wa Yuda na Yerusalemu ahala hayalongile; ‘Mtsotambika kuna imatsabahu imwe na mtsolakatsa nambiko tsenu mchanya mwake.’ 13 Angu mwemwe ng'ammanyile baye aghala ghose nene na iwahenga wangu apfila pfatuwatendile iwanu wa isi tsingi? Apfi milungu ya isi atso tsingi tsaidaha kutsikombola isi tsawo kulawa mna ghamoko ghangu? 14 Angu mlungu yuhi mna milungu ya isi atso itsihinyighwe na wahenga wangu iyadahile kuwakobola wanu wake kulawa mna ghamoko ghangu? Pfihi lelo namwe mwololela ka Imulungu wenu katsomkombolani kulawa mna ghamoko ghangu? 15 Mleke kumleka Hezekia yawabughe na yawaghutsukile apfo. Mleke kumtoghola munu ayo, kwaapfila kuduhu mlungu wa isi yoyose au mfalume wowose iyadahile kuwakombola wanu wake kulawa mna ghumoko ghwangu, wala kulawa mna ghumoko ghwa iwahenga wangu. Lelo ayo Imulungu wenu katsodaha?" 16 Iwasenga iwatumighwe na mfalume wa Ashuru tsawamlonga pfihile ghendo IMNDEWA, na Hezekia, mtumighwa wake. 17 Mfalume mweyegho kandika baluwa kumligha IMNDEWA, Imulungu wa Isiraeli, kamlonga apfino, "Ka apfila milungu ya isi tsingi pfang'aidahile baye kuwakombola iwanu wawo kulawa mna ghamoko ghangu, pfipfila Imulungu wa Hezekia ng'atsodaha baye kuwakombola iwanu wake kulawa kuna nene." 18 Iwanu awo iwatumighwe na Senakaribu wakemelela kuwalongela kwa chilugha cha Chiheburania iwanu wa Yerusalemu iwakalile mlubanda, tsawabama wawaghele wogha na waghusole ghumji chibohola. 19 Tsawamlonga Imulungu wa Yerusalemu ka wolonga na milungu ya isi tsingi, itendighwe kwa ghamoko gha iwanu. 20 Baho mfalume Hezekia na nabii Isaya, mwana wa Amosi, wamlilila na wamlomba Imulungu iyali kulanga yawapfile mna imbuli aino. 21 Naye IMNDEWA kamtuma malaika wake, kaghenda kuwakoma maasikali, pfilongotsi wa maasikali iwakalile kuna indalo ya mfalume wa Ashuru. Apfo mfalume wa Ashuru koya ukaye yake aku kona chinyala. Baho hayengile mna ing'anda ya mlungu wake, iwanaghe imwenyegho wamkoma baho kwa limaghe. 22 IMNDEWA kamkombola apfo mfalume Hezekia na iwanu wa Yerusalemu kulawa kuna ghumwoko ghwa Senakeribu mfalume wa Ashuru, na kulawa mna ghumoko ghwa maadui wake wose. Imulungu kaweka wakale tseghamba na iwanu wa isi itsili habehi nawo. 23 Iwanu wengi watsa Yerusalemu kumlapfila nambiko IMNDEWA na kumghweka ipfinu Hezekia, mfalume wa Yuda. Tangiya baho na kughundelela Hezekia katogholighwa ghendo na iwanu wose wa isi tsingi.

24 Ghamatsuwa agho Hezekia kaghula ng'ani chidogho yafe. Kamlomba IMNDEWA, naye Imulungu kamwidika na kamwing'a chitango ka katsohona. 25 Lekeni Hezekia tsakeghoda, kaleka kumlongela Imulungu mighede kwa aghala ghayamtendele, apfo IMNDEWA kamwonela maya yeye na iwanu wa Yuda na Yerusalemu. 26 Lekeni hambele Hezekia kamuyila Imulungu, kaleka ghamaghodo ghake, na iwanu wa Yerusalemu watenda pfipfo, baho IMNDEWA kaleka kowonela maya mna ghamatsuwa agho gha mfalume Hezekia hayawile kamgima.

27 Mfalume Hezekia tsakana mali nyingi na tsakatogholighwa sideke na iwanu, na ketsengela tsikano tsakwikila ifetsa, nzahabu, mabwe gha bei ng'ulu, pfilungo, tsingawo na pfinu pfose pfa bei ng'ulu. 28 Pfipfla tsaketsengela makano makulu gha ukwikila tsimbeghu, dipfai na ghamafuta gha mitseituni, na katsenga pfikwama pfa ukufughila wang'ombe na wang'olo. 29 Tsakatsenga miji mingi, na kakala na ng'ombe na ng'olo wengi, kwaapfila IMNDEWA tsakamwing'a mali nyingi. 30 Mfalume Hezekia yuyo iyadiwile ghamatsi gha imbwibwi ya Gihoni, kaghahimbila lukolongo kaghaleka ghabite hasi kwa hasi mbaka ubali wa kulikuswela litsuwa wa ghumji ghwa Daudi. Hezekia tsakebweda mna chila chinu chayatendile. 31 Lekeni iwanu iwatumighwe na wakulu wa Babeli kuna yeye kumghutsa pfinu pfa ukukangawatsa ipfilawile amwo, Imulungu tsakamleka yelamlilile imweyegho, ili yamghetse na kumanya ghose ighali mmoyo mwake.

32 Aghala ghose ghangi ghayatendile mfalume Hezekia na aghala ighanoghile ghayatendile, ghandikighwa mna Ghamaono gha nabii Isaya, mwana wa Amosi na mna ichitabu cha kumbukumbu cha wafalume wa Yuda na Isiraeli. 33 Kuya Hezekia kafa na katsikighwa hachidando ha ipfibaka pfa iwana wa Daudi. Wanu wose wa Yuda na wenyekaye wa Yerusalemu wamwing'a heshima ng'ulu ahala hayafile, naye Manase imwanaghe katawala hanu hake.