1 Hezekia tsakana miyaka ishilini na mitano hayawile mfalume, na kaitawala Yuda kwa miyaka ishilini na tisa aku kokala Yerusalemu. Mai wake tsakakemighwa Abiya, neghe Zekaria. 2 Katenda ighanoghile hambele ha IMNDEWA, ka sekulu wake Daudi pfayatendile.

3 Mna ghumwaka ghwa mwanduso, na ghumwetsi ghwa mwanduso ghwa ufalume wake Hezekia kapfughula keli imilango ya ing'anda ya Imulungu, kuya kaitsenga keli. 4 Kawengitsa iwatambika na Walawi, kuya kawatinganitsa kuna ichibwalu ichili mashaliki, 5 kawalongela, "Mnitegheletse mwemwe Walawi! Mwitende mwele kuya muitende ing'anda ya IMNDEWA, Imulungu wa iwabala wenu yele. Mpfilapfe ipfinu pfose pfihile ipfili hanu haenzeluke. 6 Kwaapfila iwahenga wetu tsawamtendela ghehile IMNDEWA, Imulungu wetu. Wamleka, na ipfihanga pfawo pfihundukila kutali, na waing'a chisogho ing'anda ya IMNDEWA. 7 Wahinda imilango ya ichikuta cha ing'anda ya Imulungu, watsima ipfitasa, ng'awadusule baye upfumba wala kumlapfila nambiko tsa ukulakatsighwa kuna ing'anda ya Imulungu wa Isiraeli. 8 Apfo IMNDEWA kayonela maya ghendo isi ya Yuda na Yerusalemu, na aghala ghayawatendele ghawakangawatsa na kuwatenda iwanu wose wapfuke, nawo wotwowela, ka apfila pfamkona muwenyegho kwa tsinenge tsenu. 9 Chinu achino chiwatenda aba tsetu wakomighwe, na iwana wetu na wehe wetu waghoghighwe kung'ondo. 10 Lelo ghumoyo ghwangu ghobama ghendo kwilaghana na IMNDEWA, Imulungu wa Isiraeli, yaleke kughendelela kutwonela maya. 11 Lelo wanangu mleke kulibetsa alino, kwaapfila IMNDEWA kamsaghuleni mwime hambele hake na mumsang'anile, muwalongotse iwanu wake mna ukumtambikila na ukumdusulila upfumba." 12 Walawi wano wanza kusang'ana, lukolo lwa Kohati kalawa Mahati mwana wa Amasai na Yoeli mwana wa Asariya, lukolo lwa Merari kalawa Kishi mwana wa Abdi na Azariya mwana wa Yehaleli, lukolo lwa Gerishoni kalawa Yoa mwana wa Sima, na Edeni mwana wa Yoa, 13 lukolo lwa Elisafani, kalawa Shimori na Yeueli, 14 lukolo lwa Hemani, kalawa Zekaria na Matania, lukolo lwa Yedutuni kalawa Shemaya na Uzieli. 15 Awano wawakema hamwe Walawi wayawo, wetenda wela, kuya wengila mghati ka apfila mfalume pfayawabamile watende, wandusa kuitenda ing'anda ya Imulungu yele ka IIMNDEWA pfayalaghitse. 16 Watambika wengila mghati mwa ing'anda ya IMNDEWA, walapfa kunze chila chinu ichihile. Kuya wapfika kuna ichibwalu cha ing'anda ya IMNDEWA, Walawi wapfisola ipfinu apfo na wapfighala kuna ulwanda lwa Kidironi.

17 Wandusa kuchitenda ichikuta cha ing'anda ya IMNDEWA chele kulawa mna litsuwa lya mwanduso lya ghumwetsi ghwa kwanza, na halipfikile litsuwa lya nane waimalitsa. Kuya wasang'ana matsuwa ghangi manane kuitenda ing'anda yose ya IMNDEWA yele, mbaka tsuwa lya kumi na sita lya ghumwetsi agho, chila chinu chimala.

18 Kuya Walawi wengila mghati waghenda kwa mfalume Hezekia, wamlongela, "Tumalitsa kuitenda ing'anda ya IMNDEWA yele, hamwe na imatsabau ya ukulapfila nambiko tsa ukulakatsighwa na ipfinu pfake pfose, na imetsa ya ukwikila ipfighate pfienzeluke nayo yela na ipfinu pfake pfose. 19 Kuya pfinu pfose pfayapfasile mfalume Ahazi hayang'ali kamfalume, ahala hayamlekile Imulungu, tupfiyitsa na tupfilapfa pfiwe pfa Imulungu, na sambi pfa hambele ha imatsabahu ya IMNDEWA." 20 Kuya ilupfi yake lupfilipfili, mfalume Hezekia kawatinganitsa hamwe wakulu wa ghumji, kuya kaghenda nawo kuna ing'anda ya IMNDEWA. 21 Waghala ng'ombe wamale saba, ng'unzu saba, wana ng'olo saba, na mvulati saba, wawe nambiko ya ukuleghusa nzambi kwa iwanu wa ulukolo lwa chifalume, na kwa hanu haenzeluke na kwa iwanu wa Yuda. Kuya mfalume kawalaghitsa iwatambika, wa lukolo lwa Aruni wawalakatse mchanya mwa imatsabahu ya IMNDEWA. 22 Apfo wachinja wang'ombe awo, na iwatambika waimitsa idamu yawo mchanya mwa imatsabahu, kuya wawachinja wang'unzu, na waimitsa idamu yawo mchanya mwa imatsabahu, kuya wawachinja iwana ng'olo awo, na waimitsa idamu yawo mchanya mwa imatsabahu. 23 Pfipfila waghala mvulati wa nambiko ya ukuleghusa nzambi habehi na mfalume na iwanu wose iwakalile baho, nawo weka ghamoko ghawo mchanya mwa wamvulati awo. 24 Kuya iwatambika wawachinja wamene awo mvulati, na waighida idamu yawo mchanya mwa imatsabahu, iwe nambiko ya kuwaleghusila tsinzambi Waisiraeli wose, welamlitse na Imulungu. Kwaapfila mfalume Hezekia tsakalaghitsa ilapfighwe nambiko ya ukulakatsighwa na nambiko ya ukuleghusa nzambi kwa Waisiraeli wose. 25 Kaweka Walawi mna ing'anda ya IMNDEWA aku wana makeyamba, wangi wana ipfinanda na wangi wana ipfinubi, ka pfayalaghitse Daudi na manabii Gadi na Natani, kwaapfila IMNDEWA tsakalaghitsa apfino kubitila manabii wake. 26 Walawi wema aku wakinda ipfinu pfa ukwimbila pfa Daudi, na iwatambika nawo wema aku wakinda malati tsawo. 27 Hezekia kalaghitsa inambiko ya ukulakatsighwa ilapfighwe mchanya mwa imatsabahu. Hawanzile ukulapfa tsinambiko, iwanu nawo wanza kumwimbila IMNDEWA, aku wanu wangi wanza kutowa tsimalati na ipfinu pfa ukwimbila pfa Daudi. 28 Ghumtingano ghwose ghwa iwanu wenama wamtambikila IMNDEWA, aku ukwimba na kutowa tsimalati kung'ali kughendelela mbaka ukulapfighwa nambiko ya ukulakatsighwa hakumalile. 29 Ukulapfa nambiko hakumalile mfalume Hezekia na iwanu wose wenama wamtambikila Imulungu. 30 Mfalume Hezekia na iwakulu wawalongela Walawi wamwimbile IMNDEWA kwa wila tsa Daudi na tsa nabii Asafu. Apfo iwanu wose wemba kwa ukudeng'elela na wenamitsa ghamatwi ghawo na waabudu. 31 Kuya Hezekia kawalongela iwanu, "Kwaapfila sambi mwemwe mwela hambele ha IMNDEWA, lelo msoghele mghale tsinambiko na nambiko tsa ukulonga mighede mna ing'anda ya IMNDEWA." Apfo iwanu waghala nambiko tsawo na nambiko tsa ukumlongela mighede, na iwanu wose wana imimoyo ya uluso waghala tsinambiko tsa ukulakatsighwa. 32 Mtingano ghwose tsaghughala ng'ombe wamale sabini, ng'unzu miya imwe, na wana ng'olo miya mbili wawe nambiko tsa ukulakatsighwa. Awano wose tsawalapfighwa wawe nambiko tsa ukulakatsighwa kwa IMNDEWA. 33 Pfipfila walapfa ng'ombe wamale miya sita, na wang'olo elufu ndatu, wawe nambiko ienzeluke. 34 Kwaapfila iwatambika tsawachidogho, ng'awadahile baye kuwahuna tsingotsi wanyama awo wose. Apfo ndughu tsawo Walawi wawapfila mbaka hawamalitse isang'ano ayo, na mbaka watambika wangi hawamalitse ukwitenda wela, kwaapfila Walawi tsawalangitsa ukwitenda wele ghendo kubita iwatambika. 35 Kubita tsinambiko atso nyingi itsilapfighwe tsilakatsighwe, pfipfila watambika walakatsa ghamapfuta gha wanyama iwalapfighwe wawe nambiko tsa ukukala tseghamba, na waghida idipfai itsile hamwe na nambiko tsa ukulakatsighwa. Apfo isang'ano ya ukutambika kuna ing'anda ya IMNDEWA yanza keli. 36 Mfalume Hezekia na iwanu wose wadeng'elela ghendo kwa aghala ghose Imulungu ghayawatendele iwanu, kwaapfila ing'ondea aino tsaitendeka himahima.