1 Imwanaghe Asa iyakemighwe Yehoshafati kawa mfalume, kasola hanu ha aba wake, kawatenda maasikali wake wawe na ngupfu ili yekinge na Isiraeli. 2 Kaweka maasikali wake wakale mna imiji yose ya Yuda itsingulusighwe ubanda, mna isi yose ya Yuda, na mna imiji ya Efuraimu iyaibokile Asa, aba wake. 3 IMNDEWA kakala hamwe na Yehoshafati kwaapfila mna miyaka yake ya mwanduso tsakatenda aghala ghayatendile Daudi, sekulu wake, ng'amtambikile baye mulungu Baali. 4 Yeye kamtumikila Imulungu wa aba wake na kaghakinda ghamalaghitso ghake, wala ng'atendile baye aghala ghawatendile iwanu wa Isiraeli. 5 IMNDEWA kautenda ufalume wa Yuda uwe na ngupfu mna ghamoko gha Yehoshafati, na iwanu wose wa Yuda wang'ali womghalila nzawadi, apfo tsakawa na mali nyingi na tsakana ukulu. 6 Ghumoyo ghwake tsaghubama ghendo kumsang'anila IMNDEWA, kubita agho ghose, yeye katsibomola tsimatsabahu itsikalile hanu henulighwe hose ha ukutambikila milungu ingi na ipfinyagho pfa Ashera, imulungu pinga, mna isi ya Yuda. 7 Mna ghumwaka wa kadatu ghwa ufalume wake, Yehoshafati, kawatuma iwakulu awano wakawafunde iwanu iwokala mna imji ya Yuda, tsakamtuma Beni Haili na Obadia na Sakaria na Netanaeli na Mikaya. 8 Pfipfila tsawelongotsa na Walawi tisa na iwatambika weli. Walawi awo tsa Shemaya, Netania, Sebadia, Asaheli, Shemiramoti, Yehonatani, na Adoniya na Tobia na Tobu Adoniya, na iwatambika awo tsa Elishama na Yehoramu. 9 Tsawachisola chitabu cha ghamalaghitso gha IMNDEWA, wanga nacho mna imiji yose ya Yuda aku wowafunda iwanu.

10 IMNDEWA kawaghela wogha wafalume wose iwali habehi na Yuda, wapfuka ukwitowa na Yehoshafati. 11 Wafilisti wangi wamghalila Yehoshafati nzawadi hamwe na fetsa bwelele, na Warabu wangi nawo wamghalila wang'unzu elufu saba na miya saba na mvulati elufu saba na miya saba. 12 Apfo Yehoshafati kaghendelela kuwa mkulu ghendo. Katsenga ubanda na imiji ina hanu ha ukwikila pfinu. 13 Kuya kakala na pfinu pfingi mna imiji ayo ili Yuda. Naye keka maasikali wengi iwadahile ukwitowa ako Yerusalemu, 14 na aghano ghagho ghamataghwa ghawo kwa kulola kolo tsawolawa aba tsawo: Adina tsa chilongotsi wa makingili gha maasikali wa likabila lya Yuda. Tsakawalongotsa maasikali laki ndatu. 15 Wa kabili kwa ukulu tsa Yehohanani, yeye tsakalongotsa maasikali laki mbili na elufu semanini, 16 na wakadatu tsa Amasa mwanaghe Sikiri iyalongotse maasikali laki mbili. Amasa tsakelapfa mwenyegho ghendo kumsang'anila IMNDEWA. 17 Chilongotsi wa makingili gha maasikali iwalawile mna likabila lya Benjamini tsakakala Eliada, imunu iyakindike, naye tsakalongotsa asikali elufu mbili wakindile tsiminde na ngawo. 18 Yawinzile Yehozabadi iyalongotse maasikali laki imwe na elufu semanini iwakalile ghoya kwa ukwitowa kwing'ondo. 19 Iwanu wose awo tsawamsang'anila mfalume ako Yerusalemu, na kubita agho ghose mfalume tsakeka maasikali wangi mna imiji ila itsungulusighwe ubanda mna isi ya Yuda.