1 Mna ghumwaka ghwa saba mtambika Yehoyada kalangusa ingupfu yake. Kelaghana na pfilongotsi awano iwalongotse maasikali miya miya: Azariya mwana wa Yehoramu, Ishmaeli mwana wa Yehohanani, Azariya mwana wa Obedi, Maaseya mwana wa Adaya, na Elishafati mwana wa Zikiri. 2 Wanga mna isi yose ya Yuda na wawakema hamwe Walawi na pfilongotsi wa tsikaya tsa Isiraeli waghende Yerusalemu.

3 Kuko iwanu wose iwetingane weka laghano na mfalume mna ing'anda ya Imulungu. Yehoyada kawalongela, "Lola, imwana yuno wa mfalume yuyo iyatsakuwa mfalume ka IMNDEWA pfayalongile kwa iwatsukulu wa Daudi. 4 Namwe mtsotenda apfino: selusi yenu imwe mwemwe watambika na Walawi imsang'ana mna litsuwa lya ukubwihila, mtsokalitsa ghamalango gha ing'anda ya Imulungu, 5 selusi iyaghe itsokalitsa ing'anda ya mfalume na selusi ingi itsololesa Lilango ilikemighwa Lilango lya Msingi. Na wanu wamwenga wose wakale hana ichibwalu cha ing'anda ya IMNDEWA 6 Mleke kumleka munu yungi wowose yengile mna ing'anda ya IMNDEWA, wengile watambika na Walawi waliyeka iwatsosang'ana. Awo wodaha kwingila kwaapfila wawo wetenda wela, lekeni iwanu wangi wose watsotenda chayalaghitse IMNDEWA. 7 Walawi watsomtsunguluka mfalume, chila munu yakinde isilaha mmoko mwake. Imunu wowose iyatsoghetsa kwingila mna ing'anda ya Imulungu katsokomighwa. Mkale habehi na mfalume kokose kwayoghenda."

8 Walawi na iwanu wose wa Yuda watenda ka pfayalaghitse mtambika Yehoyada. Chila chilongotsi wa maasikali kawemilila iwanu wake, awala iwang'ali womalitsa ing'onde yawo, na awala iwang'ali wakwanza ing'onde yawo mna litsuwa lya ukubwihila, kwaapfila Yehoyada ng'amlekile baye munu wowose yoke. 9 Kuya mtambika Yehoyada kaweng'a pfilongotsi wa maasikali miya miya imigoha, na tsingao tsing'ulu na tsindodo tsa mfalume Daudi itsikalile mna ing'anda ya Imulungu. 10 Kuya kawemitsa iwanu wose iwokalitsa wamtsunguluke mfalume aku chila munu kakinda isilaha mmoko mwake wamtsunguluka mfalume habehi na hanu ha ukutambikila na habehi ha ing'anda ya Imulungu, kulawa ubali wa kusini mbaka ubali wa kaskazini wa ing'anda ya Imulungu. 11 Kuya Yehoyada na iwanaghe wamale wamlapfa kunze imwana wa mfalume, wampfatsa litaji, wambaka ghamapfuta yawe mfalume, na wamwing'a ichitabu cha lilaghano. Iwanu wadeng'elelela aku wokemelela, "Imulungu yakwike mfalume!" 12 Malikia Atalia hayahulike iwanu wotsuma na womdeng'elela mfalume, kawaghendela iwanu awo hana ing'anda ya IMNDEWA. 13 Hayasungulile kamwona mfalume kema habehi na ingutso yake ikalile hanu ha ukwingilila aku iwakulu na watowa malati wamtsunguluka. Iwanu wose wadeng'elela na watowa tsimalati na awala iwakwimba aku wotowa tsingoma tsawo wang'ali wowalongotsa iwanu mna ukudeng'elela ako. Baho Athalia kadegha ghamaghwanda ghake, kakemelela, kalonga, "Wanibiduka! Wanibiduka!" 14 Kuya mtambika Yehoyada kawalapfa kunze pfilongotsi iwolongotsa maasikali miya miya, na iwakulu wa maaskali, kawalongela, "Mlapfeni mna imisululu, na imunu wowose iyomuwinza mkomeni na limaghe." Kwaapfila mtambika tsakalonga, "Mleke kumkomela mna ing'anda ya IMNDEWA." 15 Apfo wamghogha Atalia, na hawapfikile hana inzila ya Lilango lya Falasi lya ing'anda ya mfalume, wamkomela baho.

16 Yehoyada keka laghano ka yeye mwenyegho, na mfalume na iwanu wose wawe wanu wa IMNDEWA. 17 Kuya iwanu wose waghenda kuimwagha ing'anda ya kumtambikila Baali, kuko watulatula tsimatsabau na ipfinyagho pfili mumo, kuya wamkoma Matani, mtambika wa Baali hambele ha tsimatsabau atso. 18 Naye mtambika Yehoyada kaweka iwatambika iwolawa mna ilukolo lwa Walawi wakalitse ing'anda ya IMNDEWA, ka apfila Daudi pfayalaghitse. Pfipfila kawalaghitsa walapfe nambiko tsa ukulakatsighwa ka pfayandikighwe mna Ghamalaghitso gha Musa, hamwe na ukudeng'elela na ukwimba. 19 Pfipfila keka wakalitsi hana lilango lya ing'anda ya IMNDEWA, ili munu wowose ing'ayelile yaleke kwingila. 20 Pfipfila kawasola pfilongotsi wa maasikali miya miya, iwanu iwomanyika wa Yuda, iwakulu wa isi na iwanu wose wali muisi, waghenda kumsola mfalume na wahulumka naye kulawa kuna ing'anda ya IMNDEWA mbaka kuna ing'anda ya mfalume. Wengila kuna ing'anda ya mfalume kwa kwang'ila lilango lya kuchanya, na wamwika mfalume yakale mna ichighoda cha mfalume. 21 Apfo iwanu wose iwali muisi wadeng'elela. Kuya ghumji ghose tsaghukala tulu kwaapfila Atalia kakomighwa.