1 Mfalume Yehoshafati wa Yuda koya aku kamgima mna ing'anda yake ya chifalume ako Yerusalemu. 2 Lekeni nabii Yehu mwana wa Hanani, kaghenda kumbokela mfalume, kamlongela, "Angu kwakona pfinogha kuwapfila iwanu wehile, na kuwakunda awala iwomwihila IMNDEWA? Lelo imaya ya IMNDEWA ikutsila kwa aghala ghautendile. 3 Lekeni hata apfo kwinagho chidogho ighanoghile ghautendile, ghweghwe tsakupfilapfa ipfinyagho pfa Ashera, mulungu pinga, na tsakughulapfa ghumoyo ghwako ghose ghumbame Imulungu."

4 Mfalume Yehoshafati kakala Yerusalemu, lekeni yang'ali yowangilagha iwanu kwanzila Beeri Sheba ya kuisi mbaka kuna isi ya ipfidunda ya Efuraimu. Tsakatenda apfo ili yawoyitse iwanu kwa IMNDEWA, Imulungu wa iwahenga wawo. 5 Kasaghula walamtsi mna imiji yose ya Yuda itsungulusighwe ubanda, 6 kawalongela apfino, "Mwalangitse ghendo hamuhigha, kwaapfila ng'amuhigha baye ka pfawobama iwanu, lekeni mwohigha ka apfila pfayobama IMNDEWA, iyokala hamwe namwe hamhigha. 7 Apfo lelo mpfukeni IMNDEWA, na hamuhigha mwalangitse kwaapfila kuna yeye IMNDEWA, Imulungu wetu kuduhu ghendo ukubunza, wala kuduhu ukulola ichihanga cha munu na ukubokela hongo." 8 Pfipfila ako Yerusalemu Yehoshafati kasaghula Walawi wamwenga, watambika na wakulu wakolo tsose tsa Waisiraeli wawe walamlitsi, wawahigheghe iwanu iwoleka kukinda ghamaghitso gha IMNDEWA, na wahigheghe ghamaghomba gha iwanu. 9 Tsakawalaghitsa apfino, "Mtende sang'ano tsenu kwa ukutogholighwa, na kwa ghumoyo ghwenu ghose, aku mwompfuka IMNDEWA. 10 Wandughu tsenu wose kulawa mna imiji yawokala hawowaghalilani ghamaghomba, ghawe gha ukukoma au gha ukuleka kukinda ghamalaghitso au gha ukuleka kukinda imiko, malamutsi, mwemwe muwakanye waleke kumtendelela nzambi IMNDEWA. Mng'aleka kutenda apfo, imaya yake itsowatsila mwemwe na ndughu tsenu, lekeni mng'atenda sang'ano tsenu pfinoghile ng'amtsototsa baye. 11 Amariya, mtambika mkulu, yeye katsolongotsa sang'ano tsose tsa IMNDEWA, naye Zebadia mwana wa Ishimaeli, mkulu wa kabila lya Yuda katsolongotsa sang'ano tsose tsa mfalume, na Walawi watsakuwa wakulu wenu. Meleke kutenda kwa kupfuka, na IMNDEWA yakale hamwe na awala wose iwotenda pfinoghile."